ماذا يحدث في توكيل فولكس؟
[justify]السلام عليكم ورحمة الله
بدون مقدمات
في حاجة غريبة بتحصل في توكيل فولكس مش لاقي ليها سبب لحد دلوقت
روحت اعمل صيانة شاملة لعربيتي في توكيل ابو رواش وقولت بالمرة اغير بارة الدركسيون اليمين (ده على حسب كلام توكيل العبور في صيانة سابقة) وكمان اعرف سبب زنة غريبة مستمرة مع الدوارة
-العربية دخلت 10 صباحا
-المهندس بعد المعاينة : محتاج تغير البار اليمين والشمال اما الزنة دي غالبا فلتر بنزين وكدة كدة هيتغير
- انا : ماشي
- المهندس (بعد ساعتين ) : معلش عندنا البارة الشمال بس والتانية في العبور .. نغير الشمال؟
- انا : ماشي طاب والزنة طلعت من ايه
- المهندس : لا مش الفلتر دي حاجة كانت زانقة على الشكمان !!!!
- استلمت العربية 4 مساءا مع خروج الموظفين
- بعد التجربة ( الدركسيون ملووح شمال جامد جدا) + ( العربية بتحدف ومش موزونة ) + الزنة هي هي
- انا : يا باشمهندس العربية خرجت من التوكيل العن من الاول
-المهندس : طاب معلش هتعبك تعالا بكرة لان مافيش حد يعملها دلوقت
- انا : ماشي ( دمي بيغلي من جوة بس بارد من برا لاني كنت شارب في الكافيتيريا بتاعتهم لمون ب 11 جنيه):tongue:
ساعة دفع الفاتورة السيستم وقع ( عادي ) وبقى التحصيل يدوي ( عادي)
وبقى تقدير الرسوم والضرائب والمصنعية جزافي ( مش عادي طبعا ):untitled 1:
والله العظيم حصل قدامي المهندس بيقول لواحد جنبه فك وتركيب نحط كام تقريبا ؟ التاني يقوله خليها 150 جنيه وطبعا كان التقدير الجزافي لصالح التوكيل مش العميل
وبعد ما حصلت خناقات ومشاكل ادونا ورقة بالمبلغ المدفوع ونبقى نيجي تاني يوم يكون السيستم جه تاني وتطلع فاتورة تفصيلية ولو لينا باقي هناخده
تاني يوم قولت مش رايح انا توكيل العبور عشان البارة التانية ، هما ملزمين يجيبوهالي
روحت متأخر المرة دي ولاقيت طوابير قدامي فعرفت مقدما ان العربية مش هتدخل النهاردة
-انا : انا عايزكم تجيبولي القطعة التانية من العبور ينفع؟
- المهندس : طبعا مافيش مشكلة بس روح لقسم قطع الغيار واعمل اوردر
-انا : ماشي
- بتاع قطع الغيار : مش موجودة حضرتك هنا ولا في العبور كمان
- انا : ازاي ماكانت لسة امبارح موجودة ؟!!!
- بتاع قطع الغيار : ( بعد بحث على الكمبيوتر ) لا مش موجودة خالص
- انا : والعمل ؟
- بتاع قطع الغيار : تعمل اوردر وتدفع 650 جنيه وتيجي كمان اسبوعين
- انا : بكام ؟ ليه؟ ما انا مركب البارة الشمال امبارح ب 400 جنيه
-بتاع قطع الغيار : لا اصله هيبقى سبيشيال اوردر ليك
- انا : وانا مال اهلي ان قطع الغيار ناقصة عندكوا ما اروح اشتري من برا احسن وهتبقى ارخص
روحت قولت للمهندس استغرب وراح بنفسه لبتاع قطع الغيار وكلمه وقال لي طاب استنى 5 دقايق وطبعا وصلت ال5 دقايق لساعة :36_1_50[1]: وهنا المفاجئة بقى
- المهندس : لاقينا البارة يا باشا بس العربية هتبات لان الوقت اتأخر
-انا : (مذهول + بغلي ) : انا محتاج العربية وهاجي بيها بكرة تاني تركبولي البارة اليمين
- المهندس : طاب معلش عايز اتأكد انها هي نفس اللي عندك ولا لأ ياريت تجيب القطعة القديمة نقارنها
- بعد المقارنة الحمد لله طلعت هي زيها
انا : ( في سري : ده انا لو روحت لميكانيكي نص كم كان ارحملي) :angry06:
روحت التوكيل تالت يوم بدري وفعلا البارة اليمين ركبت جنب اختها الشمال وتم استعدال الدركسيون وتظبيط الزوايا والاتزان ولله الحمد
اما بخصوص الزنة المهندس اخر حاجة قال انها من طرمبة البنزين وهي صوتها عالي شوية ولو الصوت مضايقك في حاجة هنغيرهالك
طبعا قولت له الصوت زي الفل مش مضايقني خالص واخدت بعضي وقولت يا فكيييييييييك
بالمناسبة كان عليهم 350 جنيه ليا بسبب التقدير الجزافي
ممكن حد من الاخوة الافاضل يقول لي هما بيخبوا قطع الغيار ؟
طاب بيتاجروا فيها لحسابهم ؟ طاب والفواتير الرسمية اللي بتطلع ؟
طاب يمكن بيخزنوها يمكن تغلى في يوم من الايام؟
الصراحة مش لاقي اجابة للي حصل
[/justify]