سؤال بخصوص حادث بالتوكيل

السلام عليكم ورحمة الله وبركاته

أنا أختي معاها سيراتو 2010 خليجي وإتخبطت من الشنطة جامد يعني الخسائر إكصدام وشنطة وفانوس يمين على الاقل

دلوقتي هي مأمنة مع قناه السويس وعاوزه تصلح فالتوكيل ، إيه اللي المفروض نعمله عشان أنا اللي هخلص القصة ده
أنا سمعت إن في فرع جديد للتوكيل فتح فالقطامية قريب من محمد زكي وبسماع إنه لسة فاضي وبصراحة عاوز اعملها هناك عشان الوقت بس في سؤال :
هل لازم المقايسة تتعمل في أبو رواش وهما إلي يودوها الفرع دة على أساس إنه فاضي ولا أوديها أنا القطامية علطول ويعملوا المقايسة هناك ؟
أصل الكلام دة لسة قايلهولي واحد صاحبي عربيته إتخبطت ووداها أبو رواش وهما عملوا المقايسة وودوها على القطامية .

أنا أسف يا جماعه العنوان مش مظبوط ، بس أنا مش عارف أعدله
يا ريت الاداره تعادله عشان هيتفهم غلط

انت تروح على طول هناك

الاول تسال بالتليفون فى الشركة على الخطوات
غالباً
توديها التوكيل
تاخد مقايسة
تعمل اخطار فى الشركة
يتعمل معاينة
وشوف المحضر مطلوب على 10000 ولا 5000
ولو 5000 اعمله من دلوقت

خد بالك ان المحضر يتعمل بإسم صاحب العربيه اللي متفق مع شركة التأمين
والعربية عايز تعملها في ابورواش او القطامية براحتك لانه اكيد في سمكرة ودهان في كل فرع
والحمد لله على كل حال

فعلا فية توكيل جديد فتح اسمة السبع اوتوسيرفيس بمنطقة زهراء المعادى
وعنوانة فى المنطقة الصناعية الثانية قطعة 250 زهراء المعادى بجوار نادى وادى دجلة
ودة كمان الرابط بتاع الصفحة الرسمية للتوكيل على الفيس بوك لو حبيت تعرف اى معلومات
الصفحة الرسمية لتوكيل السبع اوتوسيرفيس كيا

اقتباس:

---

المشاركة الأصلية كتبت بواسطة a.saad

انت تروح على طول هناك

الاول تسال بالتليفون فى الشركة على الخطوات
غالباً
توديها التوكيل
تاخد مقايسة
تعمل اخطار فى الشركة
يتعمل معاينة
وشوف المحضر مطلوب على 10000 ولا 5000
ولو 5000 اعمله من دلوقت

---

كلام سليم وبما انى جربت الموضوع ده قبل كده ومأمن برضه مع قناة السويس فاقولك انهم بيطلبوا المحضر على 10000 - الكللام ده السنة اللى فاتت فمش عارف الثورة يمكن خلتهم يغيروا السيستم- وخد بالك ان الاخطار بالشركة لازم يتعمل فى خلال 3 أيام من الحادثة وتسلم بعديها العربية فى الوكيل وهيروح هناك مندوب التأمين - بدون تدخل منك ولا حاجة لوجودك وان كان المفضل تظبط معاه بالتليفون علشان تبقى على دراية امتى هيروح- وهيبدءوا الاصلاح وطبعا هم فى التوكيل مملين جدا فربنا يكون فى عونك ولازم تتابعهم وتزن عليهم باستمرار واخيرا حضرتك اللى هتدفع الاصلاح كاملا فى التوكيل وتاخد فاتورة تطلع بيها على قناة السويس وهناك بيخصموا 10% من ثمن قطع الغيار بس وبيحملوهالك والباقى بتسترده منهم ان شاء الله فى خلال 2-3 اسبوع من تسليمهم الفاتورة ولو فيه قطع غيار تم استبدالها بتطلبها من الوكيل وبتسلمها لشركة التأمين

أنا شاكر جدا لكم يا جماعه وإن شاء الله هنزل أروح الفرع الجديد اللي خلف محمد زكي القطامية وهقوللكم على الاخبار أما أرجع إن شاء الله
والله المستعان

على فكرة قناة السويس ليهم ورشة فى ابو رواش
شركة اصلاح تابعة ليهم
لو وديت العربية ليهم مش بتحاسبهم
هما بيحاسبوا الشركة الام اللى هيا شركة التامين
بس كفائتهم معرفهاش