مفهوم الفول اوبشن اتغير ولا ايه ؟

**kimotop** · 28-10-2011 08:47 PM

السلام عليكم

دا سؤال سألته لنفسي لما شوفت الامكانيات دي في عربية " ليجزيس " ومعظم الامكانيات دي في العربيات البي ام والمرسيدس الجديدة

الامكانيات الي فهمتها كالتالي :

جي بي اس تاتش متفوق

سنسور ركن " ودا بيركن لوحده في العربيات البي ام كل الي عليك انك تقوله عايز اركن وتسيب العربية تركن نفسها .

سنسور حوادث " ودا في حالة ان العربية هتخبط او هتتخبط يقوم الكمبيوتر بحساب اامن مكان ممكن العربية تروحه و يروحه اوتوماتيك

سنسور اقتراب من السيارة الي قدامك " يعني لما يجي جسم قدامك على بعد معين يديك انذار

رادار ليلي " يعني وانت سايق العربية بتعمل مسح بالاشعة تحت الحمراء وتبينلك لو في اي كائن حي على محيط واسع من العربية بحيث انك تبقى عارف لو في حاجة ممكن تظهر فجأة

سنسور مطبات " ودا بيعمل مسح للشارع قدامك ويبينلك لو في مطب او منخفض في الطريق قدامك سواء بالليل او النهار

سنسور رجوع في المرايات " يعني لو انت راجع من بين عربيتين ومش شايف الطريق السنسور دا فايدته يعرفك لو في عربية معدية متخبطلكش الشنطة .

سنسور امان للخروج من الحارات " والسينسور دا فايته انك لو هطلع فجأة من الحارة الي انت فيها لحارة تانية يحسبلك اذا كان في عربية جاية بسرعة في الحارة الي عايز تروحها ودا بيظهر عبارة عن سهم احمر في المراية

سنسور نوم " ودا سنسور باصص عليك طول الوقت ولازم تكون باصص قدامك ولو نمت يديك انذار يصحيك

سنسور خطوط الاشارة " ودا مخصص للسفر و فايدته لو انت مسافر بيمشي مع الخطوط المتقاطعة المرسومة على الارض وانت بقى تريح وتسيب العربية تسوق نفسها وفي حالة ان عربية قربت منك من قدام او ورا او الخط مبقاش واضح يديك انذار

سنسور للتكيف " ودا فايدته انه بيوزع الحرارة على حسب درجة حرارة الناس الي راكبة في العربية ويدي لكل واحد درجة الحرارة المناسبة وكمان لو الشمس ضاربة في حتة في العربية فالتكييف يركز في المكان دا

مرايات بتعتم اتوماتيك " ودا في حالة لو حد ضاربلك نور عالي او ضوء الشمس ركز على المراية تعتم لوحدها

مانع سرقة والعربية تبطل لوحدها لو اتسرقت وتبعتلك احداثياتها والمكان الي وقفت فيه

كراسي بالمساج " يعني وانت سايق الكرسي يهزهزك ويدلعك

كراسي بالدفاية " يعني الكرسي يدفيك

كراسي بالميموري " ودا لو اكتر من واحد بيسوق العربية فكل واحد يظبط القعدة الي تريحه على رقم ولما يركب كل الي عليه يسترجع وضع الكرسي الي ظبطه من نفس الزرار

معظم الحاجات تاتش جوة

كاوتشات غير قابلة للثقب

دا غير بقى الحاجات الي في عربيات كتير زي التلاجة و السخان والتابلت الي بتكتب او ترسم عليه من غير ما يتهز وانت ماشي والكراسي الي بتغير وضعها وكمبيوتر الاعطال الي بيوريك العطل فين او اي مشكلة تظهر

دا غير ان في امكانية زيادة في عربية ستروين بتقول انك وانت سايق وعايز تعرف سرعتك او اي معلومات من العدادات تظهرلك بالليزر على الازاز قدامك علشان متضيعش ثانية تبص فيها على العدادات لان في خطورة ممكن تحصل خلال الثانية دي لو انت ماشي على سرعة عالية

وحاجات تانية كتير مش فاكرها او مفهمتهاش

والحمد لله نزلت بصيت على عربيتي الفااارهة ال 128 وقولت بكل ثقة " السنسور في الراس مش في كراس "

وشكرا

**abokoko** · 28-10-2011 09:11 PM

على فكره انا عندى فى ال لادا اوبشن مختلف
بتربي عضلات
طول ما انت سايق فانت بتعمل تمارين لعضل الايدين
وكمان تمارين للقدمين

**kimotop** · 28-10-2011 09:21 PM

المشاركة الأصلية كتبت بواسطة abokoko

على فكره انا عندى فى ال لادا اوبشن مختلف
بتربي عضلات
طول ما انت سايق فانت بتعمل تمارين لعضل الايدين
وكمان تمارين للقدمين

ههههههههههههههههههههههههه ههههههههههههههههههههههههه هههههههههههههه
طب انا عندي ولاعة بقى

**abokoko** · 28-10-2011 09:48 PM

ولاعة وكمان مشغل عليها ال mp3 بالريموت
شوفت الدلع
ههههههههههههههههههههههههه هههههههههههههههه

الحمد لله الذى اعطانا ورزقنا اياها وربنا يحفظها لنا نعمة

**minicooper20** · 28-10-2011 10:06 PM

كل ده طيب مينفعش تروح هى المشاوير

**Ahmed Nasser** · 28-10-2011 10:30 PM

ينفع
لو عايز تجيب ولادك من المدرسة
هتنادى على العربية من البلكونة
وتقولها هتيلى العيال من المدرسة
هتقولك 5 دقائق وتكون العيال عندك

**shaddadfalcon1** · 28-10-2011 11:03 PM

الليكزس سمعت عن موضوع الكراسي بالمييموري ده انها بتلقط وش الانسان اللي راكب وتعرف التفضيلات بتاعته وتظبط نفسها عليه

**yoko** · 29-10-2011 01:28 AM

المشاركة الأصلية كتبت بواسطة shaddadfalcon1

الليكزس سمعت عن موضوع الكراسي بالمييموري ده انها بتلقط وش الانسان اللي راكب وتعرف التفضيلات بتاعته وتظبط نفسها عليه

أنا جربتها بقى

**shaddadfalcon1** · 29-10-2011 10:47 AM

المشاركة الأصلية كتبت بواسطة Eng.M Mahran

ايه كمية السناسر دى

والى سايق بيتعب فى ايه بقى و ايه المتعة فى القيادة اساسا من غير ما تبقى ماشى و تفرمل فرامل خطر على قطة ولا كلب ولا تكون بتجرى و مش واخد بالك و تلبس مطب يطيرك و قلبك يوجعك على العربية ولا تخش شارع ضيق و المراية تتخبط

ماهو عشان كده عاملين ال Muscle Cars
عربيه كل اللي تعمله تدور وتمشي علي طول من غير اليكترونيكس كتيير
بس طبعا احنا ملناش دعوه باالكلام ده كله

-

الموضوع: مفهوم الفول اوبشن اتغير ولا ايه ؟

LinkBack

أدوات الموضوع

عرض

-

-

-

المواضيع المتشابهه

خطوات وكيفيه تحويل الفيرنا الهاف اوبشن الى الفول اوبشن خطوه بخطوه....

ما الفرق فى التيدا 2009 بين الفول اوبشن و الهاف اوبشن

هيه الجين تو فول اوبشن غير البيرسونا الفول اوبشن

اللوجان الفول اوبشن

اية الفرق بي ن الياريس الفول اوبشن و الهاف اوبشن ؟

الكلمات الدلالية لهذا الموضوع

المفضلات

المفضلات

ضوابط المشاركة