[تحذير] مطبات جديدة على الصحراوي بعد بوابة القاهرة

السلام عليكم ورحمة الله وبركاته

كان بقالي مدة كبيرة مرحتش داندي مول او ماطلعتش على الصحراوي بشكل عام

النهارده رحت على الساعة 5 المغرب تقريبا الطريق وانا رايح مافيش فيه جديد

المشكلة وانا راجع الدنيا كانت ظلمت طبعا

والطريق ده مافيهوش إنارة للاسف

فيه ملف كبير قبل دخلة النفق اللى بيطلع على الرماية

الملف ده العربيات كلها كانت بتاخده اقل واجب 120

للاسف اتملى مطبات والمطبات دي اول مرة اشوفها وللاسف مطبات صغيرة مش واضحة تماما

عبارة عن تلت مطبات صغيرين ورا بعض وهكذا طول الملف ولان الطريق مافيهوش انارة فصعب جدا ان حد ياخد باله من المطبات دي

وبالفعل لقيت اكتر من عربية عطلانة وراكنة على جمب وواضح انهم لبسو المطبات الى غير كان فيه عربيتين خبطين في بعض

برضوا بسبب المطبات اللى بتتعمل فجاة كدة بدون سابق انذار

وطبعا مافيش اي لافتات او اي تحذيرات ان فيه مطبات او اي حاجة والطريق ضلمة جدا

حتى لو مشغل العالي فجاءة هتلاقي المطبات قدامك لانها صغيرة ومش واضحة

ياريت اي حد بيمشي من الطريق ده ياخد باله

لانه من بداية البوابة لحد الرماية والطريق اتملى مطبات

انا مش عارف المطبات دي اتعملت امتى بصراحة وهل هي لسه جديدة ولا لاء لان بقالي مدة كبيرة مش بمشي عليه

لكن انا قلت اقولكم برضوا عشان لو حد بقاله مدة مش بيمشي على الطريق ده ياخد باله

وربنا يعينا على الاهمال والمطبات اللى بتتعمل فجأة كدة وبدون اي اشارات او تحذيرات

ربنا يسترها معانا

........................

- ممنوع كتابة اللغة العربية بالأحرف الانجليزية ومن لم يتوفر لدية لوحة مفاتيح أو نظام تشغيل يدعم اللغة العربية فعلية استخدام أحد المواقع التي تقوم بتحويل الأحرف الانجليزية إلى أحرف عربية.

5.21ص
29/10/2011

مشرف 14ب

شكرا وجزاك الله كل خير

وفعلا انا اليومين دول بلاقى مطبات فى حتت غريبه

جزاك الله خيرا

تسلم لسه لبسهم

شكرا على التحذير

اتعملت من شهر تقريبا
حاجة تيت اوى وملاهاش لزمة اصلا

شكرا على التحذير

جزاك الله خيرا على المعلومه . بس بجد حاجه تغيظ اوى لآن مفيش اى سبب للمطبات دى اساسا وحتى لو فى سبب واحنا مش عارفينه فكان على الاقل يتعملو صح وبطريقه واضحه لقائدى السيارات بدل العربيات الى بتتكسر وتعرض حياة الناس للخطر.

سبب هذه المطبات علشان الطريق منحدر وكلة لفات ودائماً بيحصل حوادث به علشان كدة عملوا المطبات علشان تخلينا نهدى فى الملفات والمنحدرات علشان كلام احمد صح السيارات بتكون جاية سريعة علية من 120 الى 150 كيلو فى الساعة :untitled 1:

للايضاح
المطبات امام مبنى حازم حسن بمرتفعات الاهرام

شكرا على التحذير وربنا يستر

المطبات دي غبية اوي وفي منطقة مافهاش نور ومافيش اي تحذيرات دي من عند حازم حسن موجودة علي 3 او 4 مرات ,,مرتيين قبل النفق ومرة بعد النفق ,, وفي ناس بتاخدها بسرعة مش همها ,, وفي ناس بتاخدها براحة


وكان فية عربية ماروتي العجلة الشمال بتاعتها طايرة مش عارف شكل العجلة طارت مع المطبات ونزلت علي جنبها اتخرشمت امبارح مش عارف بسبب المطبات ولا اية ,, الكلام ده كان 12 ونص بليل ,,

هو مكان المطبات دى غبى وليس لة اية لزمة، المنطقة الى بيحصل فيها حوادث - خصوصاً التقل الكبير - هو الملف لوصل الدائرى - فوق النفق فى اتجاة الرماية - لان الملف دة بعد منزل وبتكون كل العربيات خدت سرعة جامدة وبعدين ملف 90 درجة والنقل الثقيل لازم بنقلب، وخلال الفترة من اول السنة كان بيبقى فية عربية مقلوبة مرة كل اسبوع او اتنين.
السبب التانى انة كان فية مخرج من منطقة المكاتب فى مرتفعات الاهرام (الى من ضمنها مكتب حازم حسن) ولكن علشان بيوصلوا خط مياة فالمخرج دة مقفول وبالتالى العربيات وهى خارجة من المنطقة بتلف عكس من المدخل وبالتالى بتكون عرضة للى جاى من البوابات فعملوا المجموعة الاولى من المطبات، والمفروض ان المجموعة التانية تكون علشان الملف الى فوق النفق بس مش عارف حطوها بدرى لية.

والسلام ختام

انا مش عارف الناس الى بتعمل مطبات دى بتفكر ازاى ؟؟
على طريق المحله المنصوره ..معرض عربيات فتح جديد فى ملف ..الناس بتاخده بسرعه طبعا ..100 ولا حاجه
ومحدش بيلحق يشوف المعرض
قام البرنس عامل هرمين ..قصدى مطبين
النتيجه
3 شباب ماتو ..وواحد فى العنايه المركزه بقاله اسبوعين فى غيبوبه
ياااااااااااااااااااااااا اااااااااااارب كل واحد بيعمل مطب من دماغه كده يشوف الى الناس بتشوفه بسبب المطبات دى

يبقى انت اكيد اكيد فى مصر

انا لسة لابس التلاتة اللى قدام حازم حسن امبارح على 100 :(

المطبات دى مهمة جدا واتعملت من فترة قبل الملف عشان الناس اللى انت بتقول عليها بتاخد الملف دا اقل واجب 120 وياما شوفت عليه عربيات عاملة حوادث ومقلوبة بليل بسبب الموضوع دا واخرهم التريلة اللى اتقلبت على العربيات التانية وهو دا سبب المطب.

وبعدين بدل الطريق ظلمة وانت مش شايف قدامك مسافة كافية تقدر تهدى فيها او تقف خالص يبقى معلش دا غلط منك باردوا وبالذات انك مش عارف الطريق وشايف ملف جاى فى وشك.

اقتباس:

---

المشاركة الأصلية كتبت بواسطة khaled ayman

انا مش عارف الناس الى بتعمل مطبات دى بتفكر ازاى ؟؟
على طريق المحله المنصوره ..معرض عربيات فتح جديد فى ملف ..الناس بتاخده بسرعه طبعا ..100 ولا حاجه
ومحدش بيلحق يشوف المعرض
قام البرنس عامل هرمين ..قصدى مطبين
النتيجه
3 شباب ماتو ..وواحد فى العنايه المركزه بقاله اسبوعين فى غيبوبه
ياااااااااااااااااااااااا اااااااااااارب كل واحد بيعمل مطب من دماغه كده يشوف الى الناس بتشوفه بسبب المطبات دى

---

كل واحد بيفكر في مصلحته يا باشا

المشكلة ان المطبات دي بتتعمل بدون وعي ! وهو ده اللى بيخلي الخسائر بتاعتها اكبر من نفعها

اقتباس:

---

المشاركة الأصلية كتبت بواسطة yasserelsayad

المطبات دى مهمة جدا واتعملت من فترة قبل الملف عشان الناس اللى انت بتقول عليها بتاخد الملف دا اقل واجب 120 وياما شوفت عليه عربيات عاملة حوادث ومقلوبة بليل بسبب الموضوع دا واخرهم التريلة اللى اتقلبت على العربيات التانية وهو دا سبب المطب.

وبعدين بدل الطريق ظلمة وانت مش شايف قدامك مسافة كافية تقدر تهدى فيها او تقف خالص يبقى معلش دا غلط منك باردوا وبالذات انك مش عارف الطريق وشايف ملف جاى فى وشك.

---

بس انا مش معاك في النقطة دي لان المشكلة الاكبر ان الواحد عارف الطريق

لو طريق اول مرة نمشي عليه هنقول ماشي هتمشي براحة عشان ظلمة وخايف من اي مطب او اي مفاجأة

لكن لما يكون طريق انت حافظه وفجاءة تلاقي عليه مطبات بدون اي تحذيرات وفي حتة الاضاءة بتاعتها معدومة يبقى كدة اللى بيحصل مش منطقي

كان المفروض على الاقل يكون فيه يفطة تحذيرية عشان الناس تاخد بها ويعملو انارة للمطب لكن هتقول لمين

انت لو شفت كمية العربيات اللى كانت واقفة على اليمين عند المطبات دي كنت هتعرف ان المطبات دي اللى عملها ربنا ينتقم منه

اقتباس:

---

المشاركة الأصلية كتبت بواسطة yasserelsayad

المطبات دى مهمة جدا واتعملت من فترة قبل الملف عشان الناس اللى انت بتقول عليها بتاخد الملف دا اقل واجب 120 وياما شوفت عليه عربيات عاملة حوادث ومقلوبة بليل بسبب الموضوع دا واخرهم التريلة اللى اتقلبت على العربيات التانية وهو دا سبب المطب.

وبعدين بدل الطريق ظلمة وانت مش شايف قدامك مسافة كافية تقدر تهدى فيها او تقف خالص يبقى معلش دا غلط منك باردوا وبالذات انك مش عارف الطريق وشايف ملف جاى فى وشك.

---

ازيك يا ياسر عامل ايه ؟
كل سنه وانت طيب
بص انا ضد فكره المطب فى الملف تماما مهما كان السبب
اصل هنعمل مطب فى ملف عشان نمنع حوادث السرعه
هنعمل حوادث من نوعيه واحد يفرمل ييجى واحد يطيره
واحد يفرمل العربيه تعوم منه و يلبس
واحد يطير من فوق المطبات يلبس
وجهه نظرى
اعمل مليوووووووون مطب قبل الملف ..اجبرنى ادخل الملف بالراحه ..لكن متعمليش مطب فى الملف لو كلته العربيه هتعوم منى ...
انا كنت هلبس مطبين فى ملف ولولا انى الحمد لله قدرت افرمل كويس و مكنش حد ورايا ...كنت هطير انزل فوق السطح فى بيتنا

اقتباس:

---

المشاركة الأصلية كتبت بواسطة khaled ayman

ازيك يا ياسر عامل ايه ؟
كل سنه وانت طيب
بص انا ضد فكره المطب فى الملف تماما مهما كان السبب
اصل هنعمل مطب فى ملف عشان نمنع حوادث السرعه
هنعمل حوادث من نوعيه واحد يفرمل ييجى واحد يطيره
واحد يفرمل العربيه تعوم منه و يلبس
واحد يطير من فوق المطبات يلبس
وجهه نظرى
اعمل مليوووووووون مطب قبل الملف ..اجبرنى ادخل الملف بالراحه ..لكن متعمليش مطب فى الملف لو كلته العربيه هتعوم منى ...
انا كنت هلبس مطبين فى ملف ولولا انى الحمد لله قدرت افرمل كويس و مكنش حد ورايا ...كنت هطير انزل فوق السطح فى بيتنا

---

المطبات قبل الملف مش فيه

اذا كان كده ...ماشى الى حد ما (حسب شكل المطب بقى مبحبش انا المطب الى لو كلته اتقلب)

اقتباس:

---

المشاركة الأصلية كتبت بواسطة khaled ayman

اذا كان كده ...ماشى الى حد ما (حسب شكل المطب بقى مبحبش انا المطب الى لو كلته اتقلب)

---

المطبات كمان صغيرة مش تكسر العربية يعنى ولا تطير

بلد ماسكها شوية متخلفين فعلاً

اقتباس:

---

المشاركة الأصلية كتبت بواسطة yasserelsayad

المطبات كمان صغيرة مش تكسر العربية يعنى ولا تطير

---

الكلام ده لو واخد المطب على سرعة قليلة

انما لو انت واحد متعود تمشي في الطريق ده علطول وليكن بسرعة مثلا 100 وده شئ طبيعي بالنسبة لشراع واسع زي ده ومتسفلت كويس وملف واسع جدا ومرتاح وانت حافظه

واتفاجأة بالمطب بليل لما كان لسه معمول ولبسته على السرعة دي وطبعا مش هتلبس مطب واحد هتلبس التلاتة ورا بعض ودخلت على الملف بعد مالبست التلت مطبات

تفتكر ايه اللى ممكن يحصل ؟

على فكرة انا مش معترض على المطبات كل اعتراضي على طريقة التنفيذ يعني تتعمل كدة بدون سابق انذار وبدون لفتات ولا تحذيرات ولا اي حاجة

حرام يعني الناس بتدفع فلوس في العربيات مش بتلاقيها كدة في الشارع عشان لما واحد يلبس المطبات دي ويضطر يغير مقصات ولا مساعدين ويدفع الشئ الفلاني يبقى حرام عليهم

اعمل مطبات براحتك ماشي بس حذر الناس لكن بالطريقة دي لاء

اللى متعود على الطريق تقريبا لازم يبسوا فى الاول,انا حافظ الطريق لقيت العربيات مهديه فا عديت و لبست الاتنين اللى بعديهم,و بعد النفق كنت هلبسهوم بردوا,
عموما المطبات موقعها كويس عشان الناس بتجرى فى الدواران اللى ابل النفق و بعديه حتا,العيب الوحيد انو مفيش اى تحذير ابلى