الموضوع: تجربتى فى تغيير اويل سيل كرنك خلفى

السلام عليكم النهاردة غيرت اويل سيل الكرنك الخلفي في عربيتي اللانوس 2001 المشكلة ابتدت تظهر من كام شهر انى لاقيت زيت مش قليل علي كارتيرة الزيت شكيت ان تكون طبة الزيت مش مقفولة كويس رحت البنزينة وخليت الفني يقرصلي عليها شوية وقلي انة في زيت ايوة بس مش من طبة الكرتيرة قلت تكون الكرتيرة اتخرمت من خبطة بسبب المطبات المنتشرة في مصرنا العزيزة رحت للميكانيكي قالي دة اويل سيل الكرنك الخلفي ضرب وحلة الوحيد انة يتغير بس دة شغلانة كبيرة والحكاية ماتستاهلش انك تفك الموتور خلي بالك من الزيت علي فترات وابقي زودة لما ينقص وابقي غيرة لما تيجي تغير الاسطوانة والديسك بالمرة وفعلا التسريب كان قليل واللي بيساعد علي كدة اني استعمالي للعربية قليل
واستمريت علي كدة حوالي 5 شهور لحد ما رحت النهاردة وقررت اني اغير الاويل سيل لما ربنا سهل بفلوس
وبدا الميكانيكي بحل الموتور من ناحية البطارية كدة وانت نازل ولاقيتة جاب الناحية اليمين من الموتور دي كلها علي الارض لحد ما وصل للاويل سيل دة وفعلا مكانة رخم جدا ورا الاسطوانة والديسك واخيرا وصلة ولاقيتة باين ادامي توقعت اني هلاقية غرقان زيت او في جزء من متاكل علي العكس لاقيتة سليم ومفيش علية زيت شكيت في الميكانيكي وقلتلة اكيد كدة اويل سيل الكرنك الخلفي قالي مفيش غيرة في الحتة دي يجيب زيت شالة وركب الجديد حط مادة كدة شبة اللحام حوالين الاويل سيل وقالي دة تاكيد انها ماتجيبش زيت واستني لحد لما نشفت وابتدي يقفل الشغل تاني
بالمرة غيرت جوان غطا تاكيهات لاني كان عندي تعريق زيت علي غطا التاكيهات
دورنا العربية حوالي نص ساعة مفيش زيت نزل قالي كدة تمام بس طبعا انا مش مطمن لحد لما امشى بالعربية يومين واشوف ودي كانت تجربتي مع الاويل سيل
التكلفة اويل سيل كرنك خلفي 41 جنية جوان غطا تاكيهات 33 جنية من توكيل منصور بالاسكندرية مصنعية 140 جنية واي استفسار انا تحت امركم

المشاركة الأصلية كتبت بواسطة zizotito85

وبدا الميكانيكي بحل الموتور من ناحية البطارية كدة وانت نازل ولاقيتة جاب الناحية اليمين من الموتور دي كلها علي الارض لحد ما وصل للاويل سيل دة وفعلا مكانة رخم جدا ورا الاسطوانة والديسك واخيرا وصلة ولاقيتة باين ادامي

هو كدة نزل الفتيس مش الموتور
والف مبروك على الشغل ياباشا وانشاء الله يمنع التسريب