عرض للطباعة
السلام عليكم
أنا معايا مونديو 97 المهم كنت عاوز أفك الكاسيت عشان اوصل جاك اريال قام الكهربائي ربنا يسامحه ويغفرله كسر الفيبر اللي حوالين الكاسيت وزراير التكييف وأنا مش عارف ده بيتباع ولا لأ؟ ياريت لو حد يعرف يقولي بكان عشان انا من اسكندرية وهنا بتوع قطع الغيار استحالة يقولك السعر غير لو حتشتري فعلا وياريت تمن فانوس نور الصالون عشان اتكسر برضو وهو بيثبت الاريال والحمدلله علي كل شيئ
الكاسيت بتاع الفورد بيتفك عن طريق معدات خاصة موجودة عند بتوع الكاسيت النضاف بس. عبارة عن شوكتين بيدخلوا في الفتحات الضيقة اللي يمين وشمال الكاسيت وبعدين تشدهم تلاقي الكاسيت طلع معاهم. هو كان بيطلع الكاسيت بمفك ولا ايه؟
ما هو قالي ان معندوش الشوكة بتاعته فقال بدل ما يبهدل حواليه يحله بالفيبرة وبعدين يخلعه من ورا بس المشكلة دلوقتي ان انا مش عارف الفيبرة دي موجودة ولا لأ؟
(الفريم اللي حوالين الكاسيت و زراير التكييف ) يارب حد يفيدني
هاتدور عند بتوع الاستيراد غالبا هاتلاقي الطابلوه كامل في حدود 1000 جنيه بالعدادات من غير الكاسيت
السلام عليكم و رحمة الله و بركاته
أيوه, أنا عارف الحركة الزفت بتاع الكهربائية دول, اللى فعلا, على مايركب الاريال بتاع السقف, يقوم كاسرلك اللمبة بتاع السقف اللى جمب مراية الصالون و على مايركب الكاسيت و لا يحله, يقوم كاسرلك فبرة من اللى فى التابلوه, عالم عاوز الحرق.
أنا فاكر مرة, لقيت الاشارات مش شغالين و روحت لكهربائى أولا مرة أتعامل معاه و كان معرفة لبتاع الدوكو اللى بتعامل معاه, قرر بسلامته أنه يفك ذراع النور, اللى هو أنا مغيره من 4 سنين و ذراع النور ده أصلا جديد ب180 جنيه و عمره من عمر العربية فعلا, يعنى دى أول مرة أغيره فى العربية من ساعة مالعربية طلعت من المصنع سنة 1980, و مستحييييييييييييييييل يكون بايظ, المهم, أنه عشان يوصله, كسر الفبرة الكبيييييييييييرة اللى تحت الدركسيون 4 حتت, كأنى مثلا هاخد العربية من عنده و أروح أرميها فى الزبالة !!!!!!!!!!!
فعلا, عالم عاوزه الحرق بجاز و الغريبة أنك تلاقيه بيتصرف على أنه كبير المهندسين بشركة bmw اللى فى ألمانيا مش اللى فى مصر !!!!
ههههههههههههه بالظبط وياسلام بقي لما الواحد يسأله قبل مايحل بتشتغل فيهم تلاقيه ساب اللي في ايده وبصلك باحتقار شديد وقالك أنا باشتغل في حاجات اعلي من دي كتير ياباشا ربنا يسامحه بقي
عموما شكرا ياجماعة أنا حادور عليها عند بتوع الاستعمال لو مكنش حشوف حد بتاع فيبر شاطر يكملي الموجودة وخلاص
على فكرة من يوم ما جبت العربية و الكاسيت راديو بس و مش عاوز اصلحة خوفا على التابلوه
و المرة الوحيدة الي اتفك فيها كان قطب الي فكة فكان الموضوع مضمون و الحمد لله
و كنت وقفت مرة قدام واحد بتاع كاسيت و طلبت منه يشرحلى هايفك الكاسيت ازاي
قالى ده شغلى و مينفعش اقول على صنعتي لحد طبعا سيبتة و مشيت
محدش بيتعلم ببلاش ياباشا وأنا جديد في الفورد وفي اسكندرية مفيش صنايعي فورد وبس فيه عندنا صنايعية بتاعت العربيات الصعبة عموما يعني تلاقيه فورد علي جيتا علي باسات علي فلوانس
الوحيد اللي كان فورد بس هو نفسه قالي أنا أصلا مش ميكانيكي بس باتاجر في قطع الغيار الاستعمال ومن كتر ما كنت باجرب الحاجة للناس ايدي مشيت فيهم هو كويس وكله بس برضو الصنعة بتفرق والخبرة ليها عامل
أنا كان معايا قبل كدة ميجان موديل 2000 وكانت تحفة بس جه الجيربوكس اتشرخ وانا مسافر وغيرته عند توكيل صيانة لرينو في اسكندرية وكانت النتيجة المؤسفة ان الاي بي اس ترسه اتكسر وملقتش له ترس (كان لازم يبيعوهولي بالكوبلن وانا كنت جايب كوبلن جديد) غير ان العربية بقيت كل حتة فيها تضرب علي حلقات وانتهت ببيعها والحمدلله صدقني ياباشا أهم حاجة الضمير بس احيانا الصنايعي يحب يبقي فهلوي ويتذاكي علي العربية وعشان كدة بتقلب بمصيبة لصاحب العربية وربنا يسترها
الواحد مبيصدق يلاقي صنيعي بيفهم وياسلام لو عندو ضمير يبقا اخر تمام لان اغلب الصنيعية الاما رحم ربي عايزين الحرق
كل قطع الغيار موجوده في الوكاله واسعارها مش غاليه انا لسه جايب وش سلندر كامل عامل ١٢٠٠ جنيه و الفيبر موجود حتي الكشافات الفوج والاستيراد احسن كتير من الجديد حتي الجنوط الاستيراد شكلها تحفه عن الجديد
معلش ياباشا ياريت تبعتلي فين في الوكالة؟ عشان انا من اسكندرية
ووش السلندر ده كامل ولا فاضي وبتاع مونديو؟
وياريت لو عندك رقم تليفون وأسف علي ازعاجك