يا وحوش الميجان دلونى، قررت اجيب جيربوكس كامل لعربيتى الميجان 2 (2005)

**Savorisky** · 30-10-2011 04:21 PM

بعد ما صرفت كتير جدا عشان مشاكل الجيربوكس و للاسف كل اللي صرفته كان على الفاضي عشان كانت كلها مسكنات مش علاج حقيقي للمشكلة، انا بقالي اكتر من سنة بعاني من مشكلة الهبدة المعروفة بتاعت الجيربوكس دا غير (Check Gearbox) و التفويت في التالت ... إلخ، فا قررت اجيب جيربوكس استعمال و الريح دماغي، و محتاج ماشورتكم يا وحوش الميجان و خصوصاً حبيب قلبى ايمن مومو اللي عمر ما حد احتاجله في حاجة و خذله ابداً.

محتاج اعرف الآتى:

1- متوسط سعر الجيربوكس استعمال كام؟
2- ياترى في حد موجود هنا في اسكندرية موثوق فيه ممكن اشتري منه الجيربوكس، ولا لازم اروح القاهرة؟
3- ايه اللى المفروض آخد بالي منه و انا بشتري الجيربوكس ده، يعني لو في اي احتياطات واجب اتباعها
4- ياترى الجيربوكس ده بيجي بزيته الاصلي ولا حشتريه و بعد كده ادخل في متاهة البحث عن الزيت
5- هل شراء و تركيب جيربوكس اسهل ام ان هناك امل في تصليح الجيربوكس بتاعي على يد متخصص جيربوكسات مشهود له بذلك ممكن تنصحوني اروحله؟

و شكرا ليكم جميعاً لاهتمامكم

**nodey** · 30-10-2011 04:44 PM

ربنا معاك اخي
الخطة دي مش سهلة وياريت تعيد حسابتك تاني لان الجير بتاع العربية الخاص بيها مش سهل التفريط فيه
ومين قالك ان الي هتجيبه حالته تمام ممكن يكون واخد نفس المسكنا اللي قولت عليها وبدل ما كنت عندك مشكلة بجير اصبحوا 2 لوني اشك ان اللي هيبع لك الجير مش هياخذ القديم فوق البيعه يظبطه ويبيعه لواحد تاني والحسابة بتحسب
راي حضرتك شوف مركز صيانة جير اتوماتيك تكون واثق في اللي شغالين فيه وتكون سمعتهم سبقاهم
وتوكل علي الله اعمل صيانة شاملة للجير من كلتشلت وطنجرة وبدي فالف جديد وبكدا تكون رجعت الجير زي الزيرو وهيكون هناك فرق طبعا في الاداء علي عكس المستعمل اللي مش عارفين جواه ايه
وده كتيب الطلبات اللي هيحتجها الجير للصيانة الشاملة
Multiupload.com - upload your files to multiple file hosting sites!
تقبل تحياتي

**shawkylotfy** · 30-10-2011 06:39 PM

والله انا من اسكندرية برضو وعندى نفس مشكلة الهبدة لما سعات تعشق الاول وخايف اشترى جيربوكس مستعمل يطلع كان خلعان من عربية هنا فى مصر واشربة ... الناس اليومين دول معندهمش ضمير ... على العموم انا ناوى اروح التوكيل واغير شنابر ديل وزيت للفتيس واشوف ان كان حالها هيصلح..

**Savorisky** · 30-10-2011 07:36 PM

شكرا جزيلا يا nodey على التوضيح دا، بس المشكلة في اني غيرت شنابر ديل الفيتيس ٦ مرات و كل مره بدفع من ٤٠٠ ل ٥٠٠ جنيه و مش بلحق اتهنى بالعربية لان بعد اقل من ٥ ايام بتكون الهبدة رجعت تاني و برجع اتخانق مع مركز الصيانة و اخسرهم و ارجع احاول اصالحهم تاني عشان بكون محتاجلهم و اكيد انت عارف يعني ايه صنيعي مصري.
و غيرت موزع زيت كامل و غيرت ديل فتيس كامل و غيرت مجموعة E1E2 داخل الفيتيس وهي مجموعة تروس كامله و غيرت فلتر زيت اللي جوا الفيتيس و الحزمه الداخليه، و كل ده و الهبده مازالت موجوده، و المشكلة الاكبر ان انا في اسكندرية و اللي بيفهموا في الميجان يتعدوا علي صوابع الايد الواحده و مش لاقي حد يدلني على حد متخصص فتايس ميجان

و بالنسبة للملف المرفق مع ردك انا وجدت فيه شرح لكل اجزاء الجيربوكس ولكن لا يوجد قطع غيار بعينها يمكن استبدالها
عموما الملف ده لوحده كدا عاوز دراسة من سنتين ل ٣ سنين D:

ياريت لو حد يعرف حد متخصص فتايس ميجان في اسكندرية يدلني عليه و اروحله يكون غير سامح الهواري و احمد موسى

**shawkylotfy** · 30-10-2011 07:52 PM

المشاركة الأصلية كتبت بواسطة savorisky

شكرا جزيلا يا nodey على التوضيح دا، بس المشكلة في اني غيرت شنابر ديل الفيتيس ٦ مرات و كل مره بدفع من ٤٠٠ ل ٥٠٠ جنيه و مش بلحق اتهنى بالعربية لان بعد اقل من ٥ ايام بتكون الهبدة رجعت تاني و برجع اتخانق مع مركز الصيانة و اخسرهم و ارجع احاول اصالحهم تاني عشان بكون محتاجلهم و اكيد انت عارف يعني ايه صنيعي مصري.
و غيرت موزع زيت كامل و غيرت ديل فتيس كامل و غيرت مجموعة e1e2 داخل الفيتيس وهي مجموعة تروس كامله و غيرت فلتر زيت اللي جوا الفيتيس و الحزمه الداخليه، و كل ده و الهبده مازالت موجوده، و المشكلة الاكبر ان انا في اسكندرية و اللي بيفهموا في الميجان يتعدوا علي صوابع الايد الواحده و مش لاقي حد يدلني على حد متخصص فتايس ميجان

و بالنسبة للملف المرفق مع ردك انا وجدت فيه شرح لكل اجزاء الجيربوكس ولكن لا يوجد قطع غيار بعينها يمكن استبدالها
عموما الملف ده لوحده كدا عاوز دراسة من سنتين ل ٣ سنين d:

ياريت لو حد يعرف حد متخصص فتايس ميجان في اسكندرية يدلني عليه و اروحله يكون غير سامح الهواري و احمد موسى

واللة نفس قصتى بالظبط بس انا معملتش حاجة خالص فى الفتيس علشان قلبى حاسس ان دة كلة ممكن يكون ملوش لازمة ... انا ممكن اروح بورسعيد نشوف هناك فتايس تكون طالعة من عربية متقطعة ادام عنينا لو كدة هبقى ارد على الموضوع واسيبلك نمرتى ونروح مع بعض

**Savorisky** · 30-10-2011 08:31 PM

شوقي باشا، انت من اسكندرية برضو؟
و يا ترى بتتعامل مع نفس مركز الصيانة اللي انا بتعامل معاه؟
لو ناوي على موضوع بورسعيد ده يبقى احنا محتاجين اسماء ناس بعينهم نروح عليهم مباشرة يا ريت لو يفيدونا وحوش الميجان هنا و يردوا على اسئلتي اللك كتبتها من قبل عشان منروحش و نرجع ايد ورا و ايد ادام

**Hegazio** · 31-10-2011 01:21 PM

ايه يا جماعة مشكلة الفتيس اللي كلكو بتحكو عليها دي؟
انا العربية قعدت 6 سنين و 200 الف كيلو ماعملتش فيه حاجة غير الزيت مرة علي 120 الف !!!
و النتشة اختفت بتحديث السوفتوير سنة 2006
غريبة

**Hegazio** · 31-10-2011 03:54 PM

مانا بعتها .. و جبت الفلوينس ههههههه

**Ahmed Selim** · 31-10-2011 03:57 PM

أنت غيرت سلونويد الفتيس قبل كده ؟

و مركز الصيانة اللى أنت غيرت عنده قطع غيار قبل كده ده هل تقصد بيه التوكيل و لا أيه ؟

لو مش التوكيل جرب تروح التوكيل تكشف على المشكلة و لما يقولك دى كذا.....قولهم مش عامل حسابى على تغيير حاجة و هبقى أجى تانى أغيرها.......و قولنا تحليلهم كان أيه .