الموضوع: ربط السنتر بشنطة العربيه

اولا الزرار بتاع الباب بيتباع فعلا ب20 جنيه عند فتح الباب او اي حد بتاع سيات واوعي تجيب حاجة تانية لأنه مش هيركب عليها (ناس بتقول هات بتاع هيونداي) مختلف تماما لازم بتاع سيات او فولكس علي ما اعتقد ينفع

ثانيا : الشنطة طبعا بتدخل علي السنتر وبيركبلها صباع عادي زي بتاع الأبواب ودة مش هياخد ربع ساعة فك وتركيب

ثالثا : التانك داخل علي السنتر والدليل هتلاقي مكان بيخرج منه الصباع بتاع السنتر وفي الباب هتلاقي زي دبلة لمكان الصباع بتاع السنتر بس دة بقي مش هتلاقيه غير استيراد للأسف وبيركب من جوة الشنطة في ظهر التانك وهتلاقيه عبارة عن علبة خارج منها بار طويل سنه مدبب وبيتنفخ بالهوا دة لو السنتر عندك هوا مش كهرباء

والله المستعان
،
،

المشاركة الأصلية كتبت بواسطة acoal

شكرا للاستاذ سيد على الرد والتوضيح انا النهارده فتحت الباب اللى ورا لقيت السنتر ده
مع العلم ان البابين اللى قدام مفيهومشى الكلام ده والاسلاك بتاعت السنتر مرميه جوه الباب ومش واصله لحاجه
ويا ترى سلك السنتر بتاع الشنطه بيكون من تحت عند الصباع اللى القفل بيمسك عليه ولا فى القف نفسه
وفعلا انا لقيت الصباع اللى حضرتك قلت عند التانك بس لسه مشوفتش واصله اسلاك ولا لا عليه بس مش شغال على الاطلاق
انا بس كنت عايز اعرف السنتر ده هوا ولا كهربا وهل ينفع انى اجيب عليه اتنين كمان قدام وبتاع الشنطه بدل ما اشترى الاربعه جداد ده فى حاله انه طلع شغال
ولو عايز اجربه اعمل ايه يعنى اوصله كهربا ازاى ولا مينفعشى
احمد عبد السلام

وعليكم السلام
الصورة دي لماكينة سنتر كهرباء مش هواء ودي متركبه زي اللي كانت في عربيتي القديمة الابيزا لأن الابيزا من 94 حتي 99 كانت بتنزل بسنتر هواء اوريجينال

بخصوص تجربتها فانت لو وصلت زوج الأسلاك بتوعها اللي في الصورة دول علي البطارية بلمسه واحدة لو اتحركت يبقي سلمية ولو اتحركت ولقيتها تقيله شيل الكاوتشة بتاعتها و اديها رشة ب wd40 هتلاقيها اشتغلت زي الفل و خلي بالك انها بتشتغل بلمسة واحده تفتح و بعكسها تقفل (يعني بعكس الموجب و السلب علي البطارية

لو عايز تكمل بقية الأبواب لازم هتحتاج تروح لحد متخصص بالسنتر و الأبواب و هو هركبلك اللي ناقص و هتتوصل بجزء كنترول كده بيبقي عند علبة الفيوزات خاص بتشغيل كل وحدات السنتر

بالنسبة لسؤالك وبقية الأخوة حول ربط الشنطة و تانك البنزين بالسنتر زي ما قال الأخ سيد فوق بتحتاج تركيب قفل شنطة كهرباء وده تجيبه استيراد و تجيب قفل تانك كهرباء و هيتوصلو مع بقية وحدات السنتر ولو مالهمش وصلات في ضفيرة العربية هيتمدلهم أسلاك جديدة و بس
وبالتوفيق ان شاء الله

زي المهندس ايهاب ما قال لحضرتك بالظبط

بس انا مع الأسف عندي السنتر كله هواء والحمد لله وكل الأبواب شغالة والحمد لله

انا كان عندي السنتر مش شغال ومطبب بعض المواسير ومفصول بعضها الأخر بسبب ان كالون باب السواق كان القربة بتاعته بايظة

كل الصنايعية نصحوني اكبر دماغي منه واشتغل كهرباء وانه بسيط وان معظم العربيات بتنزل كهرباء لكفائته وقله اعطالة

انا معاك ان لو وحدة كهرباء باظت هي الوحيده الي هتتأثر علي عكس الهواء لو قربة فصلت او خرطومها اتقطع هتخل بالمنظومة بالكامل وجميع الأبواب هتتعطل

لكن انا صممت اني لازم اشغله واشغله علي الأنذار

أشتريت الطرمبة بتاعته استيراد
ولغيت قربة كالون باب السواق وركبت بدالها قربة كهرباء
وصلت جميع الوصلات المطببة ووصلت المفصول
غيرت قربة باب التانك لأنها كانت بايظة وبتنفس هوا
وصلت كالون باب الشنطة

وبعد التجربة لقيته اكتر من رائع

لما بتقفل العربية بريموت الأنذار وحدة باب السواق بتاخد الأشارة وبتقفل وبعدها تتدي الأشارة لباقي الوحدات وبتقفل جميع الأبواب علي التوالي وليس التوازي يعني الباب الشمال ورا اول باب بيقفل بعد باب السواق وبعده الشنطة وبعده التانك وبعده الباب اليمين ورا واخر مرحلة هو باب اليمين قدام
لأن القرب جميعا لازم تملي هوا عشان تقفل اللوك فلو قربة واحدة نفست هوا هتأثر علي ضغط الهوا داخل العربية وبالتالي القرب مش هتملي
والملحوظة ان اللوك بيقفل بالراحة تماما مش خطف زي الكهربا ومن غير اي صوت وشكلها شيك جدا وفعلا بتعمل ابهار لأي حد معاه هيونداي مثلا لأنه لما بيقفل عنده بيلاقي صوت خطف السنتر لكن في الفولكس بتقفل بالراحة وبشياكة

انصحك دور كويس ورا القرب والخراطيم والوصلات بتاعتها وشوف الطرمبة شغالة ولا لاء

لو عايز صنايعي كويس وباله طويل وهيعملك الي انت عايزه
انا ممكن اوصفلك الي عملي السنتر والأنذار وهو نفسه الي دعبس عنده وجابلي القربة بتاعة التانك وعلي فكرة كانت سويدي يعني ممكن تكون بتاعة فولفو والي خلعها من عندي كانت صناعة اسباني لأنها كانت اورجينال العربية

هو عيبه الوحيد انه زحمة وممكن عشان يشتغل عندك يركنك جمبه ساعتين او 3 بس انا بالي اطول منه وكان ممكن استناه لحد 8 ساعات

لو عايز تروحله لازم تروحله قبل 11 الصبح عشان تضمن انك تقفشه وهو لسة فاتح وعلي مايغير هدومه ويبدأ فيها بتاع نص ساعة
كشغل مش تكمل ساعة لكن لو روحتله متأخر هيبقي هتقعد كتير وفي الأخر هيقولك تعالالي بكرة
انا شخصيا علي ما بدأ شغل عندي روحتله والله اكتر من 4 مرات وكل مرة بينها وبين التانية يمكن بالأسبوع

طول بالك واصبر عشان تعمل شغل صح

والله المستعان
،
،