أرجو الأنتباه منه لله النصاب و اللى مابيفهمش
السلام عليكم و رحمة الله و بركاته
انا أسف لعدم مشاركتى الايام اللى فاتت بسبب اليأس اللى كنت انا فيه و ما زلت فيه
الموضوع فى عجاله " انا من شهر و نص جيت اركن العربية بالليل لاقيت الدركسيون بيزن زنه الباور و لا قيت الشارع ورايا فيه نقط زيت و كشفت على الزيت لاقيته ناقص ، رحت الصبح و اشتريت علبه استيراد و ركبتها عند الميكانيكى اللى من غير مخ و قاللى كده تمام
و بعديها بيومين مش ثلاثه لاقيت العربية بتجيب زيت رحتله قاللى نغيير العلبه ، المهم ركب علبه و قاللى كده تمام جيت الف الدركسيون و انا لسه امام الورشة لاقيته تقيل كما لو كنت بلف الدركسيون و العربية مش دايره قاللى معلش اظبط زوايه و امشى عليها بس و هيه تخف معاك ، عملت اللى قاللى عليه مفيش فايده برضه الدركسيون تقيل المهم قاللى العلبه مظبوطة بدليل انها مش بتجيب زيت كده تبقى طلمبه الباور غيرت الطلمبة مفيش فايدة قاللى دى مضروبه غيرت واحده تانية برضه مفيش فايده قاللى لآ اشترى جديد المهم اشتريت طلمبه جديدة الغريب ان الدركسيون خف سنه بس برضه تقيل شوفوا الرد السحرى قاللى اصل انت المكنه بتاعتك إكو تك و دى حملها على العفشة تقيل شوية انا بقى فى القصة دى عامل زى اللى راحت للنصاب اللى بيعمل اعمال عشان جوزها مايجبلهاش ضره و بترضى الاسياد و تمشى ورا دماغ الغبى لحد ما تغرق المهم رحت اتخانقت معاه و قلتله لازم يكون فى حل انا نش عارف اسوق العربية كده قاللى تعالى بعد يومين كل ده و هو مستصعب يفك العلبة من الاخر اموت انا مش مشكله رحت بعد يومين لاقيت صاحب محل الاستيراد قاعد عند المعلم قلتله عاوز علبه من الاخر قاللى عندى علبه جديدة و دفعنى فرق و فعلاً العلبه جديدة ركبتها و بعد ما ركبت قلتلة لف الدركسيون لفه قلتلة برضة الآكو تك تقيل قاللى عندك حق القنبله اللى محدش يصدقها ايه إن العلبه جابت زيت بعد 6 ايام كتر خيرها و دى الجديدة كلمته فى التليفون لانى مش قادر اشوف وشه منه لله قاللى تعالالى يا حبيبى طبعا انا حبيبة لانى كل يوم بصبحه الزبون الاهبل بقى تقول ايه و كمان فلوسى حرام المهم قاللى تعالى و قول لبتاع الاستيراد ان العلبه بتجيب زيت و خليه يغيرها ، انا بقى رحت لواحد تانى عل و عسى يكون بيفهم قاللى دور و نزل تحت العربية و قاللى لف الدركسيون طلع قاللى ان العلبه جايبه زيت بس ده مش بسبب ان العلبه اصلا بايظة ده فيه حاجة فى العربية بتخلى العلب تضرب و هو دة السبب اللى لما عرفته بطلت عجب ايه هو السبب ان الماسورة بتاعه الراجع من علبه الدركسيون متنيه و فيها سدد بيضغط على العلبه يقوم الأولسيل بضرب و تجيب زيت " كل ده و صاحبنا عامللى فيها شيخ الصنايعية و يقوللى و الله العظيم باللفظ كده الصنعه مفهاش حاجه ده عيب علبه
انا قولت اكتبلكم عشان تشوفوا الجهل ممكن يعمل ايه انا فوئت بس بعد فوات الاوان لما ابن ...... حلبنى و خد كل فلوسى بس يا جماعه انا كفائه اجيب فلوسى و انا اعرف اطلعها من عينيه بس يا جماعه محدش يسيب نفسه بعد كده لمخ ميكانيكى
