ازاي تعرف المصري في اي مكان !!
بسم الله الرحمن الرحيم
السلام عليكم و رحمة الله و بركاته
ازاي تعرف المصري في اي مكان ؟؟!!
و بما اننا في منتدي سيارات هبتدي بديه و ربنا يستر طريق الجميع ان شاء الله
- لما عربية تعمل حادثة و فى ثوانى تقف
لها يجي 20 عربية و اي شخص في الشارع او محل يجي يجري عشان ينقذوا المصابين و كل شخص يساهم اللي يجيب شنطة الاسعافات الاولية و اللي ينظم المرور عشان الدنيا متقفش و اللي يشيل البطارية عشان متتسرقش او ميحصلش حاجة و اللي يجري يجيب مية و اللي يجري يجيب طفاية و اللي يعرض انه يوصل المصابيين او يتصل بقرايبهم و يعدلوا العربيات او يشيلوها حتي ع جنب عشان الطريق و يفضل الجميع واقف جنب الحادثة لحد ما يتأكدوا انه كله تمام.
يبقوا المصريين
- لما واحدة عربيتها تقف في الشارع سواء عجلة او بسبب اي عطل و هي محتارة
تلاقي الجميع تطوع لتقديم المساعدة
يبقي دول مصريين
- لما الدنيا تقفل و الشوارع تقف في التقاطاعات و تلاقي كل شخص في الشارع نزل عشان يسلك الشارع و الناس تمشي
يبقي مصري
- لما تسأله ع عنوان و يقولك تعالي ورايا بدل ما تتوه و ساعات بيغير طريقه عشان يوريك الطريق
يبقي مصري
- لما تيجي تدفع الأجرة لواحد أول مرة تعرفه و يحلف عليك و يقولك : خلي بقي .
يبقي مصري
- لما واحد يركب مواصلات و معهوش فلوس يدفع تلاقي الناس تبرعت بتمن التذكرة ده لو السواق مقلش خلاص اجرتك عندي
يبقوا مصريين
- لما تلاقي خناقة فى المواصلات كل واحد فيهم بيحلف إنه يدفع الاجرة للتاني .
يبقي مصري
- لما يكون شغال في مطعم او صاحب مطعم و يجيله واحد غلبان عايز ياكل و معهوش فلوس ياكل و تلاقيه طلعله اكل.
يبقي مصري
- لما يكون فيه عيد او اي موسم و تلاقي الناس نازيين يوزوعوا عيش و لحمة و رز او اكل بشكل عام.
يبقوا مصرييين
- لما تلاقيهم عاملين موائد رحمن في رمضان و كله يساعد باللي يقدر عليه و يوزعوا ياميش رمضان.
يبقوا مصريين
- لما اتنين ينزلوا في وسط الشارع يتخانقوا و تلاقي كل الناس جريت و العربيات ركنت عشان ينزلوا يفضوا بينهم و يهدوهم و يصحلوا المشكلة.
يبقوا مصريين
- لما تلاقي شخص عاجز و بيحاول يطلع سلم او ينزل او يعدي الشارع و تلاقي واحد بيجري عليه يساعده او يوقف العربيات كله و يعديه و يعرض انه يوصله كمان لحد المكان اللي هو عايزه بالرغم انه مستعجل
يبقي مصري
- لو صليت في مكان وبعد الصلاة اللي جنبك مد ايده وقالك تقبل الله.
يبقي مصري
- إذا سمعته بعد أن يضحك كتير يقول " خير اللهم إجعله خير " .
يبقي مصري
- لو إتصلت بيه في التليفون , وقال لك من غير مناسبة " كل سنة وإنت طيب " .
يبقي مصري
- لما تنزل تلاقي واحد ساند على عربيتك واول ما يشوفك يضحك ويقولك لا موأخذه.
يبقي مصري
- لو دخلت عليه وكان بياكل ولو حتى عيش و ملح لازم يقولك اتفضل الأكل ويمسك فيك.
يبقي مصري
- لما تلاقي واحد بيقضي العيد فى المقابر مع حبايبه اللي ماتوا.
يبقي مصري
- لما تلاقي ست في الرايحة والجاية عمالة تدعي لأولادها وتخلى الدنيا
تدعيلهم.
تبقي مصرية
- لو شفت واحد وقف فجأة و هو ماشى فى الشارع
و مد ايده على حتة عيش مرمية على الأرض وقام حطها جنب الرصيف.
يبقي مصري
-لما تلاقي ولاد الحتة الواحدة و جيه واحد يعاكس بنت من نفس الحتة بيبقي نهاره اسود من قرن الخروب
يبقي مصري
- لو شفت عامل اول ماخد اجرته قام رافعها لراسه و بص فوق و حمد ربنا قبل مايحط الفلوس فى جيبه.
يبقى مصرى
-لو اديت لواحد فلوس وبدأ يعدها بصوت عالي وبدأ بقوله الله واحد .. ومع
الورقة الثانية : مالوش تاني، ومع الورقة الثالثة: العدد ثلاثة .
يبقي أكيد مصري ابن مصري
-. لما تلاقي ست البيت بتحوش البرطمانات الفاضية سنين السنين بدون استخدام مع انها بتنفع
تبقي مصرية
- لما يكون عندنا ضيوف ويسلموا عشان هيمشوا ويقفوا على الباب يتكلموا ساعه
يبقوا مصريين
- ولما بيمر بأزمة كبييرة , مبينساش يضحك ويطلع نكت و افيهات
ويضحك اللى حواليه وكل العالم يتكلم عليه وعلى خفته
يبقى ده أكيد
شـــــعـــــب مــــــــصــــــر