فعلا ..لما بيكون على أساس علمي بيبقى " نقد بناء " وكلنا بنستفيد.
أنا كلامي كان عال لمدا سينسور" بديل الشفاط " ، ومجبتش سيرة طرمبة الزيت في حاجة، بل بالعكس زي ما حضرتك تفضلت وقولت اني متفق معاك في حاجات كتير. وهي ان تسخين الموتور شيء أساسي ، لكن طريقة التسخين هي اللي أصبح فيها جدال كبير !!
والموضوع ده بالذات قعدنا نبحث فيه شهرين في موضوع" تسخين الموتور الصح؟" في القسم التعليمي، وكان فيه العديد من المشاركات العلمية ، وأرجو أن يتسع صدرك للنقاش وانا لي الشرف ان في ناس عندها كم وافر من العلم معانا هنا .. زي حضرتك يا هندسة.
لو الخليط عندك صح والحريق صح وتم تسخين الموتور بطريقة صحيحة فالموتور هيوصل للpeak combustion temperatureأسرع وبالتالي الخليط هيحترق داخل غرفة الحريق إحتراق تام يعني مفيش بقايا وقود غير محترق
وبقايا الوقود الغير محترق بتتكثف وتتراكم على جدران الأسطوانات وراس البوجيهات مما يقلل من كفاءة الحريق فتقل درجة حرارة الحريق ويزداد معدل إستهلاك البنزين ويزيد من معدل تلوث الهواء .. حتى وإن كان بنسبة بسيطة.
إحنا متفقين إننا لازم نسخن العربية لحد ما نوصل لدرجة حرارة التشغيل - تقريبا من 85 إلى 95 سيلزيوس
بإحدى طريقتين:
1- الطريقة الأولى: إنك تفضل بتسخنها عالسلانسيه لحد ما توصل لدرجة حرارة التشغيل.
2- الطريقة التانية: إنك تفضل عالسلانسه 30 ثانية تقريبا ثم تبدا تتحرك بعد ذلك بسرعة متوسطة لحد ما توصل لدرجة حرارة التشغيل.
لو عملت سيرش عل أغلب المواقع والمنتديات العلمية - إن مكنش كلها- هتلاقيهم بيقولوا الطريقة التانية هي الأصح
وكاتالوج المستخدم لمعظم الموديلات اللي شوفتها - بيقولوا الطريقة التانية هي الأصح
والكاتلتك لازم يوصل لدرجة حرارة عادم عالية نسبيا عشان يؤدي وظيفته صح- والطريقة التانية هتوصلنا أسرع للدرجة دي.
طيب لو فرضنا ان أنا بمررعادم عالكاتلتك بإستمرار على درجة حرارة أقل من اللي هوبيشتغل عنده-يعني أقل من 400 إلى 800 سلزيوس تقريبا :هيحصل شيء؟؟
هتتجمع أكاسيد الكبريتات اللي نتجت من إحتراق الوقود وخرجت مع العادم على جدرانه الألومنيوم فتتكون عالجدران كبريتات ألومنيوم مما يضعف من كفائته وأكيد ده هيقلل من عمره.
مصدر المعلومة:
المصدر كتالوج المستخدم لسيارة الحج الوالد النيسان - محرك HR16DE- حيث ذكر بالحرف
التسخين:
"اترك المحرك في وضع اللاتعشيق لمدة 30 ثانية على الأقل بعد بدء التشغيل. قم بالقيادة بسرعة متوسطة لمسافة قصيرة أولا، وخاصة عندما يكون الجو باردا."
بناءا على إيه:
توصيات مصنعي السيارات
تحت أي ظروف:
تحت ظروف after start enrichment .. هيتم توضيحه لاحقا.
بصراحة من خلال اللي قريته ودرسته سابقا .. حساس الأكسجين ملهوش علاقة بالتسخين.
لكن ده ميمنعش انه ممكن يكون في أنظمة جديدة بتستخدم السيجنال بتاعته في عملية التسخين .. ووارد جدا ان أكون أنا غلط ،
ياريت حضرتك تنورنا!!
ال MAFsensor بيقيس كمية الهوا اللي داخلة عالموتور بس ، لكن مبيتحكمش فيها.
واللمدا سينسور إستحالة يدي سيجنال لل MAF سينسور.
إزاي يعني : سينسور يدي سيجنال لسينسور..هيستقبلها إزاي؟ ولوإستقبلها هيعمل بيها إيه؟؟
السينسور بيدي السيجنال بتاعته ل control unit فتقوم بدورها هي كمان تدي سيجنال ل actuator .
معلش الرد طويل شوية .. إستحملني.
لما تيجي تدور العربية أول مرة في اليوم.. بتمر بمرحلتين:(بدء الدوارة ، التسخين)
1- cold start بدء الدوارة:
فبيتم ضخ بنزين أكتر لفترة من الزمن ، وده بطريقة من اتنين:
1-1 إما الرشاشات وبمساعدة من حساس مياه التبريد (الرشاشات بترش باستمرار لحظة بدء الإدارة ،وأول مالموتور يدور ترجع كما كانتsequential
1-2 أو رشاش بدء الإدارة (رشاش خامس غير الأربعة التانيين) cold start injector بمساعدة thermo-time switch اللي شبه صباع الحرارة .. والثرموتايم بيحددلك الفترة الزمنية اللي بيفضل فيها cold start injector شغال.
2- warm up التسخين:
الرشاشات بترش بكميات أكبر من المعتاد لحد ما تعدي مرحلة ال after start enrichment اللي سبق ذكرها - بتاعة ال 30 ثانية.
ثم بعد ذلك تقل كمية البنزين اللي بتخرج من الرشاشات تدريجيا لحد ما حساس مياه التبريد يدي السيجنال اللي كلنا منتظرينها " وهي : الموتور وصل بالسلامة لدرجة حرارة التشغيل 85 :95 درجة مئوية.
نقطة الجدل هي : " الشوية اللي بعد ال 30 ثانية " مطلوب منك تخلي الحرارة تزيد بسرعة لحد درجة حرارة التشغيل.
لو فضلت واقف سلانسيه هتاخد وقت أكبر من انك لو بدأت تمشي بالعربية بسرعة متوسطة.
وده بالنسبة للبنزين .. طيب بالنسبة للهوا (مش إحنا زودنا بنزين .. يبقى لازم نزود هوا : إزاي؟)
المسئول عن الهوا الزيادة اللي بيدخل للموتور هو ال auxiliary air device وهو باختصار بيعمل bypass للبوابة فيعدي هوا زيادة فيحس بيه ال maf فيدي سيجنال للكمبيوتر عشان يزود كمية البنزين كما وضحت سابقا.
وبالتالي بديل الشفاط هو ال auxiliary air device وأعتقد إنه موجود في نيسان باسم AAC واختصارها Auxiliary Air Control valve بجوار الإيدلر.
إثبات تاني أن ال لمدا سينسور ملوش علاقة برفع ال rpm لما تيجي تدوور العربية :
حساس الأكسجين عشان يشتغل صح ويتم الأخذ بالقراءات بتاعته لازم درجة حرارة العادم تعدي 200 مئوية لو هو بسخان أما لو من النوعيات القديمة اللي بدون سخان لازم العادم يسخن عن درجة 350 مئوية.
وبالتالي الكمبيوتر بيتجاهل قراءاته أثناء بدء عملية الدوارة ، فازاي يكون هو السبب وقتها في رفع سرعة الموتور !!!
أنا مقولتش هتقصف عمره .. لو رجعت لمشاركتي هتلاقيني قولت : "طبعا مش من يوم وليلة والموتور هيبوظ .. لكن تكرار الموضوع ده هيقلل العمر الإفتراضي للموتور ككل."
حاجة تانية بردو ساعدت في تقليل زمن التسخين والموتور بارد ومتجبركش انك تقعد تسخن كتير .. وهي التطور الكبير في زيوت المحركات وخصوصا الزيوت التخليقية ثنائية درجة اللزوجة.. والمنتدى كله معندوش غير السيرة دي دلوقتي.
يمكن يكون الموتور فيه سخان في البلوك ، ويمكن السبيكة اللي متصنع منها البلوك ألومنيوم متكلفة وتستحمل إجهادات حرارية عالية.
هههههه ..سيبك من كتب الإحتراق الداخلي .. ودورلي على كتب Bosch بتاعة أنظمة حقن الوقود
بس خلي بالك هتلاقي عليها تراب كتير ... هههه
إذن ، فلتكن الحرب !!
جمع ورقك وانزلي .. وانا هجمع ورقي واقابلك " الساعة خمسة أودام الهرم الكبير"
بكرر تاني " الساعة خمسة أودام الهرم الكبير"
وعلى رأي واحد عزيز عليا جدا ا: " متنساش تجيب معاك 2 شورمة كومبو وإزازة بيبسي حجم عائلي" عشان نتسلى في الحرب.
أكيد طبعا ..وانا والله ليا الشرف اني اتحاور مع حضرتك و بأذن الله نوصل للأحسن لينا كلنا.
كلام سليم بس هشيل كلمة "بيتحكم " واقول بدلها "بيقيس" وأكيد الفرق كبيييير.
نفس الفرق بين actuator و sensor.
كلامك سليم ..وترجمة الفقرة السابقة: ان الموتور وهو تحت حمل خفيف(تسارع بسيط أو ماشي بسرعة ثابتة)اللمدا سينسور بيبقى في ال closed loop يقوم الكمبيوتر يعدل كمية البنزين اللي رايحة للموتور ويستنى يشوف النتيجة بتاعة التعديل ده من خلال قراءة اللمدا سينسورشوية فقير وشوية غني لحد ما يوصل للنسبة الستايكومتريك .
مصدر الصور السابقة : Bosch Automotive Injection Systems
مزيد من المعلومات وتأكيدا لما سبق:
http://www.cdxe....book.com/fuelSys/...coldstart.html
المفضلات