الموضوع: حاتتفقس في المرور؟ وأغيرها ولا لأ؟

السلام عليكم.. كل عام وانتم بخير الأول
معايا لانوس 2008 لسة مدخلها فرن وطلعت امبارح وأهه بيتجمع فيها.. حاروح ان شاء الله آخدها انهاردة بعد ما السروجي يخلص الصالون.
المهم عشان مليت من اللون قلت أغير شوية فا غيرت درجة اللون الفضي للي بعده علطول.. دي العربية لسة بتتقفل (قلت أغير كاوتش الزجاج كله بالمرة عشان بدأ بنشف من الشمس وكدة وبالمرة غيرت فوانيس وجرايد وكفرات الرفارف وكام حاجة خفيفة)


الدرجة دي ف المرور برضه تعتبر فضي ولا لأ؟ يعني من الآخر لما أجدد أغير لون ولا هو هو اللون عادي؟

سؤال كمان.. العربية مو 2008 لو بعتها علي حالتها كدة (رشة برة وفابريكة جوة) تعمل كام مثلا؟
كمان من رأيكم لو بين اني أبيعها وأجيب مستعمل أعلي أو اني أخليها معايا (ظروف المواقع في شغلي تمنعني حاليا أجيب جديد) ممكن مثلا أطلع بسعر المستعمل ل 65 أمشي في الموضوع ولا أخليها معايا سنتين كمان؟ لو حاخليها حاجنط وأغير كاسيت وكام حاجة كدة فا عشان كدة محتار أصرف عليها ولا أبيع وأغير

وبافتراض اني حاخليها معايا.. أنكل الاكر والفوانيس ولا أسيبهم كدا أحسن؟ ولا أفيم الفوانيس؟ ولو فيمتها حاتقل درجة الاضاءة ولا لأ؟

وسؤال أخير.. هو الستيكر الاسود اللي بيتحط ع العتب من جوة ويطلع جزء منه من تحت الباب ده حاجة معينة ولا اييه بالضبط؟ ويتجاب منين ف اسكندرية؟

المشاركة الأصلية كتبت بواسطة XGoGoX

مش متأكد من سعرها كده بصراحه بس أعتقد تعدي الستين

والله لو عايز رأيي الزيرو له طعم حلو قوي قوي
كفايه إحساسك إنك أول واحد تسوقها
وريحة العربيه وهي جديده كده بتفرق
خليها معاك بس حافظ عليها لحد متقدر تجيب جديد
أو بيعها وأدفع مقدم في عربيه جديده وقسط الباقي

ألف شكر علي ردك... بس مبدءيا ماعتقدش ان سعرها حايجيب حتي ستين عشان رشة برة... بس ربنا يسهل.
بالنسبة للزيرو أنا عن نفسي عاوز وممكن من بكرة تطق ف دماغي وأعملها.. بس أساسا عاوز أقولك العربية دي راحت مواقع كان بيتلعب عليها اكس او.. واتعمل فيها كام نقرة في الكابوت والسقف.. ودخلت فيها نص نقل ف رفرف (غيرت الرفرف والاكصدام خالص) غير الحاجات الخفيفة.. عشان كدة زي ما قلتلك لو جبت زيرو سعرها حايقل بسرعة. دي العربية لسة 2008 واضطريت أرشها

المشاركة الأصلية كتبت بواسطة ahmed_mido1889

سعر العربيه هينزل جامد وخصوصا انها اترشت بالكامل من بره

مانا عارف.. بس أنا كنت شاريها مستعمل من واحدد معرفة وعمل معايا واجب أكتر من اللازم.. خدتها منه ب خمسين ونص فا حتي لو سعرها وقع أربع أو خمس بواكي أنا كسبان فيها (أو علي الأقل مش حاخسر حاجة). ياريت لو تقدر تحددلي سعر مثلا يعني هل 54 نهائي كويس ولا حاتنزل عن كدة؟ مع العلم ان العربية مافيهاش مسمار ناقص يعني كهربا وميكانيكا زي الفل.