حاجة غريبة لاحظتها في اماكن كتير
في الشارع
في محطات المترو
في القطار
وفي اماكن غيرها كتير

وهي كتابة البعض جملة " الكاسيات العاريات في النار " بالاسبراي علي الحيطة
او كتابتها باي شكل في اي ركن او جوه القطار او المترو او حتي الميكروباص

ونفسي اسأل سؤااااااااااال

هو الاخ المحترم اللي كتب جملة زي دي مسمعش عن حاجة اسمها فن الدعوة
متخيل حضرتك لما تقول كده لواحدة مش محجبة هيكون رد فعلها ايه

يا سيدي الفاضل في ناس كتير وخاصة البنات والستات عموما ربنا مكرمهاش بثقافة دينية زي حضرتك
مقرأتش الحديث الشريف اللي حضرتك قرأته

يا جماعة في ناس مغيبة فعلا
بصرف النظر عن مستواها الاجتماعي

يا جماعة في ناس محترمة جدا وبتصلي وبتصوم وسلوكياتها مثال للمسلم الحق
لكن مع الاسف ملقتش اللي يقولها او يكلمها من زمان عن فرضية الحجاب

فياريت الدعوة تكون بطريقة احسن من كده
علي الاقل متديش فرصة للرويبضة واعداء الاسلام انهم يقولوا : " شفتوا .. هو ده الاسلام "

انا مقصدش اني انكر حديث الرسول او اشكك في صحته
ولا بتكلم في فرضية الحجاب من عدمه

انا بقول يس : خلي عندك حس دعوي وانت بتتكلم
وراعي ان مش كل الناس زي بعضها
والرسول نفسه مكنش اسلوبه في الدعوة واحد
وانما اختلف حسب شخص المتلقي
وربنا يصلح بينا الحال ويهدي العاصي