الموضوع: تعديل الفرامل - أسئله

المشاركة الأصلية كتبت بواسطة eng_maged

1- هل مقاس الطنابير وتيل الفرامل في كل العربيات واحد. ولو لأ ازاي الواحد يعرف المقاس بتاعه

لا طبعا كل عربية ليها تصميم و مقاسات معينة.... ممكن بعض الموديلات تشترك فى تصميم معين لو هى تبع شركة معينة و هنا ممكن تقدر تركب تصميم افضل من بتاع عربيتك باستخدام نظام من عربية اكبر مثلا من نفس انتاج الشركة... لكن صعب انك تاخد نظام فرامل من شركة تانية خالص و تركبة عندك او على الاقل هتحتاج تعديلات كتير اوى عشان الموضوع ينجح فى عربيتك

مقاسات عربيتك ممكن تعرفها لو دخلت على سايت شركة تصنيع طنابير كبيرة زى بريمبو مثلا و تعمل بحث عن عربيتك هتلاقى مقاسات الطنبورة بتاعتك بالضبط... بالنسبة للتيل ممكن تجرب سايت ريمسا مثلا و هتلاقى مقاسات التيل بتاعك

2- هل الطنابير هي المسئوله عن عدد المسامير اللي في الجنط سواء 4 او 5 ولا لا. ولو لأ ازاي الواحد يركب جنط 5 مسامير في عربيه اصلها 4 مسامير

لا المسئول عن الموضوع دة هى الصرة... انت ممكن تجيب طنبورة 4 خرم و تخرمها 5 اخرام او العكس براحتك

3- هل تحويل الفرامل الخلفيه من عادي الى فرامل زي اللي ادام (معلش انا مش عارف الفرق بين اساميهم ياريت حد يوضحهم). هل التغيير ده محتاج مجرد تركيب طنابير وتيل ورا وخلاص ولا الموضوع اكبر من كده. وهل بينفع على كل العربيات.

هو من الناحية النظرية مش محتاج اكتر من اللى انت قولتة فعلا... بس من الناحية العملية الموضوع مش بالسهولة دى لانك لازم تجيب مكونات تنفع تركب على عربيتك و دة هيتطلب اما ان يكون عربيتك اصلا بتنزل بديسكات خلفية فى موديلات اعلى من بتاعتك او فى سوق اوروبا مثلا و تاخد الفرامل منها او ان يكون فية موديل تانى غير عربيتك فية فرامل ورا ديسكات و تكون مقاساتة تنفع عندك و بالتالى تقدر تاخد الفرامل الخلفية من الموديل دة و تركبة عندة

او لو انت غاوى اختراعات ممكن تاخد نظام فرامل خلفى من العربية اللى على مزاجك و تعدلة بحيث يركب عندك و دى قصة هتاخد وقت و فلوس و مجهود كبير جدا جدا

4- هل لو العربيه فيها abs او مفهاش هل ده يبفرق في تغيير الفرامل الخلفيه الى طنابير وتيل

القصة كلها تتخلص فى ان النظام البديل يكون مجهز للABS لو عربيتك فيها ABS

يعنى لو عربيتط بفرامل طبلة ورا و فيها ABS يبقى المفروض الفرامل الديسكات اللى هتركبها تكون مجهزة لABS... بس 99% هتكون الديسكات مجهزة للABS طالما الطبلة اصلا كان فيها ABS

اما لو العربية مفيهاش ABS يبقى مش هيفرق معاك الفرامل الديسكات مجهزة ولا لا لان كدة كدة انت مش هتستخدمة

MMamdouh