الموضوع: يا جماعه حد عنده فيرن ا1600 اوتوماتيك ؟

الفرن 1600 اتوماتيك ممتازة واتكل على الله وهاتها بس بشرط الحفاظ على الجير بوكس والعناية به بقدر المستطاع لان زعله وحش
ابو سيف

ريح نفسك وخليك فى العادة وابعد عن الاتوماتيك فى الكورى

انا مش باخوفك من الاوتوماتيك لا سمح الله لكن انا فى اعتقادى انك بتكسب نوع من الرفاهية انت محتاج له اثناء قيادة السيارة فى شوارع مصر مع الزحام واشارات المرور وبدل ما تركيزك يروح للمور لا الاول لا التانى لا المور وهكذا يكون تركيزك كله منصب حولك او لمتابعة من معك بالسيارة بشىء اكتر من التركيز يعنى خلاصة الموضوع تركيزك كله للطريق مش للفتيس .. وكمان عمرها ما حتبطل منك .. ده بالنسبه للمكسب الشخصى .. وبالنسبة لسحبها حاول تبعد عن ما هو اتوماتيك اقل من 1500 سىسى علشان تشعر وتستمتع بسحب العربية .. وتشغل تكييفك براحتك .. ده المطلوب من العربية الاتوماتيك .. اما المطلوب منك انت بقى شويه حاجات بسيطة ومهمة لبقاء الجير بوكس اطول مدة ممكنة بحالته
1- ما تجرش ابدا عربية بعربيتك الاتوماتيك
2- ما تنقلش ابدا من D الى P والعربية لسه بتتحرك
3- ما تسيبش العربية ابدا على P بدون ما تشد فرامل الايد
4- وانت فوق ال100 ما تقعدش تلعب فى زرار الاوفر درايف فتح قفل فتح قفل
5- ما تحركش الفتيس من D الى R والعكس والعربية بتتحرك
6- ما تسيبش العربية على N وتنزل وتسيب العربية من غير ما تشد فرامل اليد
7- ما ترفعش رجلك من على دواسة الفرامل وانت على D وتسرح لتلاقى نفسك لابس فى اللى قدامك
8- ما تحاولش تحرك العصايا من D الى 2 او L وانت فوق ال100
9- وانت راكن جنب الرصيف وحتسيب العربية اكسر الدركسيون سنه صغيرة ناحية الرصيف علشان لو العربية لا قدر الله رجعت لوحدها تصد فى الرصيف ولو طلعت لقدام لوحدها تصد برضة فى الرصيف ودى احسن طريقة على فكرة لركن العربية بجوار الرصيف فى منحدر شديد او مرتفع شديد
خللى بالك من لغاليغك واتكل على الله وخش على الاوتوماتيك وادعى لى
وربنا يوفقك للخير .. اللهم امين :roll:

اتكل على الله يا باشا

عربية منتشرة و مش حتتعبك فى صيانتها بس فعلا خد بالك من نصائح الاخ محمد صلاح