الموضوع: الحلقة الثانية:تحذير شديد لكل الاعضاء من توكيل المقطم

السلام عليكم ورحمة الله
ميت مسا وفل على عيون كل الاعضاء في احلى منتدى
نلتقي في الحلقة الثانية من مسلسل حساسات الفتيس
ودي الحلقة الاولى:

(حموت من الغيظ ,السينيك2 والمية وحساسات الفتيس
مساء الفل على احسن منتدى في الدنيا
حكاية غريبة جدا مع عربيتي السينيك 2 موديل 2005 اشتريتها مستعملة من شهرين
وكانت زي الفل لغاية مابتدت حكاية المياة
البواب غسلهابالخرطوم وهي مقفولة والكبوت مقفول وكله تمام
وفجاه ظهرت رسالة
electronic fault
وبعدها check gearbox
والنقلات رااااااااحت والستب ترونيك راااااح والعربية مش راضيه تدووووور ؟؟؟؟؟؟؟؟؟
حاولت معاها دارت بالعافية على ال N ونقلت على ال D النقلة مش منورة على الشاشة وبتمشي على الاولاني بس وصوت المتور عاااااالي وال RPM على 4000
حمدت ربنا ورحت على عثمان موتور فيصل قالوا حساس النقلات بايظ يتغير ب 700
غيرته وكله تمام النقلات اشتغلت وكله زي الفل
بعدها بيومين ماشي في امان الله على 80كم وشوية مية على الاسفلت كانوا بيسقوا الزرع في نص الطريق و.........طششششش ..................عادي ما كل العربيات عدت عليها اشمعنا انا يعني!!!!!!!!واذ فجأتاااااان !!!!!!
electronic fault
وبعدها check gearbox
تااااااااااني؟؟؟؟؟؟؟؟
النقلات شغالة كويس ومنورة على التابلوه والفتيس بينقل على الثاني والتالت والرابع
فتحت الكبوت وحسست على الحساس الجديد مفيش عليه ميه ,مشيت لقيت الفتيس بينتش جامد بين النقلات والسحب بقى ضعيف جدا رحت تاني على عثمان وهناك كانت الصدمة ....ثلاثة الاف جنية .............ليه..مين..فين..كام؟؟؟� �؟؟؟؟؟؟
ايه اللي حصل ؟؟
حنغير ثلاثة حساسات في الفتيس والزيت وشغل تاني!!!!!!
كل ده عشان مشيت على شوية مية؟
اصل العربية دي حساسة من المية.
طب اعمل ايه؟البسها بامبرز ؟؟؟
ما العربيات الكوري والياباني بيغسلوها في البنزينة شاسيه من تحت وهي مرفوعة بالميه والصابون كمان!!!
ايه الفشل ده؟؟؟
خلصنا من الحساس اللي فوق فاضل الحساسات اللي تحت؟؟؟
مش عارف يعني هيه فرنسا مفهاش مية ولا مطرة؟؟
ايه الحساسات دي مكشوفة مفيش عليها حماية؟؟؟
طب هعمل ايه والشتا داخل؟؟؟
نداء الى كل من يستطيع المساعدة من اعضاء المنتدى حيث ان معلوماتي عن السيارات عامة ضئيلة.
وانامش عارف اعمل ايه ؟
ومازال مسلسل
check gearbox
مستمرا
والى اللقاء في حلقات اخرى.
وشكرا لسعة صدركم والسلام عليكم ورحمة الله.)


طبعا عملت بنصيحة اخواني اللي ردو عليا في الموضوع ورحت توكيل المقطم
وهناك استلموا العربية وشرحت كل الكلام اللي فات للباشا الكبير الجامد اوي مدير الورشة م\ياسر,
سبت العربية وقالولي حنتصل بيك ومشيت, ركبت ميكروباص غلط حلوان بدل السيدة عائشة,ونزلت عند الدايري ومشيت من غير هدف وبسأل قالولي انت في صقر قريش
وفجاة الموبايل بيرن( استر يارب ) :
معاك رينو توكيل المقطم يا ا\محمد
ايوه يا باشا
الفتيس محتاج عمرة وده لازم عشان يتصلح
مسكت نفسي من الصدمة ورديت:ودي حتكلف كام
سبعة الاف جنيه
اتصدمت بكل هدوء :كدا كتير اوي وانا معييش المبلغ ده مش ممكن المبلغ يتلم عن كده شويه
لا عمرة معناها الفتيس ينزل ويتفك بالكامل والمهندسين يشوفو ايه التروس والقطع الخربانة ويغيروها
شكرا مش حأضر ادفع المبلغ ده وانا جاي استلم العربية دلوقتي حساب الكشف كام
70 او 80جنيه بس...........
قعدت افكر اعمل ايه استلف من مين ,وافكر في حل,وافكر,وافكر,افتكرت كان في عضو ربنا يباركله في مشاركة عن احسن الورش اللي شغالة في تصليح الرينو بينصح ب واحد اسمه عادل في صقر قريش وكاتب رقم تليفونه ولحسن الحظ كنت مسجله عندي قلت اروح ممكن اركب فتيس استراد احسن من العمرة مدام الموضوع فيه سبع تلاف جنيه والارقام الكبيرة دي
خدت العربية من التوكيل ودفعت 110 جنيه كشف وقعدت ساعة في الحسابات عشان فضيلة المهندس
الجامد اوي الكبير اوي يبعت امر الشغل عشان احاسب واتكل على الله
ورحت للاستاذ الكبير اوي الجامد اوي الخبير اوي اوي بجد ,اه والله بجد,ا\عادل زوايا
وقولت ان الفتيس بياخر نقلات وبينتش جامد وفيه رسالة check gearbox وموضوع الميه اياه بس مازوتش عن كده , قال لولد عنده نضف الوصلات بالسبراي وشوف, اتضحلي ان الوصلات دي ادام العجلة اللي عند السواق وهيه دي نفس الحتة اللي كانت فيها المية لما طشششششش, وبقى الولد يقللي هات العجله شمال عشان يفك وينضف الوصلات وجربنا مازالت الرسالة موجودة,الاستاذ عادل قاله وديه عند الكهربائ ورحت فك الاكصدام من نفس الجهه وفك ونضف تاني ومن الكبوت شال البطارية ونضف كل الوصلات والامشاط وجربنا نفس العيب, رجعت للاستاذ عادل وصل العربية بالكمبيوتر وشغل البرنامج
وعمل سكان وقال بدون تفكير فيه حساس اسمه oil pressure regulator
وده قاري ضغط الزيت في الفتيس صفر ,ومن هنا الرسالة بتطلع,لام يتغير ,طيب بكام ,450 جنيه استراد
لو عاوز جديد اشتري من التوكيل وعلى العموم انا مصنعيتي 100 جنيه ,سألت في التوكيل بالتليفون
قالولي 750 جنيه ,قالي ممكن يجيبه جديد من واحد جنبه ب650جنيه ,قلتله ماشي وعايز اغير زيت الفتيس كمان ,قاللي ب110جنيه,يبقى كله 860جنيه ,قلت ماشي بس العربية حتتصلح وترجع زي الاول,
بصلي جامد كأني غلطت فيه وقال عيب ,عيب,انا بعمل العربية محبش انها ترجعلي تاني بنفس العطل
وعلى العموم معاك ثلاثة شهور لو حصل حاجة في الحساس اغيره على حسابي,والفتيس بتاعك حالته
ممتازة,ولو متصلحتش متدفعش حاجة ,والحساس ده انا مش واخد فيه ملييم ,انا اهم حاجة عندي اسمي وسمعتي,انا اشتغلت في توكيل المقطم ثلاثين سنة ولسه طالع على المعاش قريب,
الصراحة الراجل شكله واثق من نفسه ,بس انا مش مصدق ,هل ممكن التوكيل يكونوا حرامية يا اما
مفيش كفائة خالص ولاخبرة,مهو مفيش احتمال ثالث ,امال المهندسين اللي هناك بيهببوا ايه.
المهم خلصنا على الساعة 9 ليلا وقالي اركب وانا حسوق وحدث مالم يكن في الحسبان ,العربية بتجري زي الاول ومتحسش بالنقلات ومفيش النتشه الغبيه اياها والسحب جامد ذي الاول, والرسالة رااااااااحت ,الحمد لله وكله تمام .
سالته الفتيس كفاءته كويسه ولا ايه, راح جه في رمله ووقف بعدين داس جامد العربيه حفرت مكانها جامد قاللي تمام عشرة على عشرة ,انا حقولك ايه كانت المشكلة, وراني الحساس البايظ وقشر الكابل بتاعه فلقيت ثلاثه اسلاك محروقين وسايحين على بعض,قالي دي كانت عاملة قفلة في الكمبيوتر
وده سبب الرسالة check gearbox وبناء عليه الكمبيوتر بطل يدي اوامر للفتيس ينقل امتى فالنقلة تيجي متاخر تقوم تحصل النتشه الجامدة دي,وعلى العموم لما تشوف مية امشي بالراحة ومتخليش المية ططرطش تحت العربية جامد عشان زي مانتا شفت الوصلات ادام العجله اللي جنب السواق,

والمية جت على الحساس ده عملت القفلة دي سيحت السلك ده طلعت الرسالة دي,فهمت ولا اعيد تاني .
لا فهمت ,الف شكر يا دكتور عادل يا محترم,
الحمد لله روحت والعربية زي الفل وبقالي عشرة ايام ومفيش اي مشاكل والحمد لله,

طبعا الغرض من الموضوع ده اني افيد كل الاعضاء في المنتدى العظيم ده زي ما انا استفدت,مش التشهير بحد او الدعايةلحد, ولذلك كنت حريص اني انقل لكم التجربة بحذافيرها وبدون اي تحيز ,ولذلك
انا انصح جميع الاعضاء بعدم الثقة الزائده في التوكيل لازم تسأل كتير بره وتتاكد انه مفيش تشخيص عطل خاطئ بقصد اوبدون قصد, يكلفك فلوس كتير من غير داعي ,خصوصا وده في رأيي انه الخبرة في توكيل المقطم في مستوى متدني جدا مع احترامي لجميع الاراء لكن هو ده نتيجة تجربتي معاهم ده اذا ماكانش التشخيص الخاطئ ده لنهب فلوس الناس اللي زيي وحسبنا الله ونعم الوكيل,
وانا كمان انتظرت عشرة ايام قبل ما اكتب المشاركة دي ومشيت كتير بالعربية عشان اشوف النتيجة وماكونش متسرع في الحكم ,وصورة امر الشغل بتاعت التوكيل لسه معايا , وعربيتي سينيك2 موديل 2005 ورقم الشاسيه 32785434 ورقم الموتور28374,
وعلى العموم اتمنى اني اكون قمت بالواجب اللي عليا اتجاه اعضاء المنتدى واسف على الاطالة
وشكرا لسعة صدركم
وربنا مايكتبش عليا حلقات ثانية
والسلام عليكم ورحمة الله

نشكرك على النصيحة وسرد المشكلة وحلها بكل أمانة.