الموضوع: التجربة الديهـيـومانـزريـة

المشاركة الأصلية كتبت بواسطة dehumanizer

بس للأسف دي تجربة يوم واحد .. من بكرة هرجع اروح في ساعة تاني عشان مش دماغي السكة دي

ما انصحكش خالص و اذا كان على دماغك لازم تعملها update كل شوية

المشاركة الأصلية كتبت بواسطة dehumanizer

بما ان انا كل يوم بنزل احرق في اعصابي و انا راكب الدائري كله و منابنيش غير وجع الدماغ .. قررت اعمل تجربة لمدة يوم واحد علي طريقة if you can't beat them, join them

بس عشان اعرف ايه الاختلاف .. نزلت من الصبح و انا مقرر .. شيلت غطا العربية و ركبت و طلعت :

- لم استخدم الإشارات نهائيا لحد ما رجعت دلوقت
- الكلاكس صديقي
- الفلاشر حبيبي
- مفيش أي التزام بأي سرعة من اللي خلقها ربنا .. فيه حرق عالغيارات كلها!
- بلطجة في السواقة .. لو حتة فاضية احشر نفسي فيها و خلاص مش مهم هعمل ايه بعد كدة
-غرررررز ! ده طبعا معروف
- لم أعير اهتماما لأي بني ادم علي الطريق و عاملت الجميع كجمادات اطير من بينها
- كسر عالناس الرخمة و تزنيق و اللي مش عاجبه رجاء خبط دماغه في الحيط

كنت عايز اعرف الناس اللي مش محترمة عالطريق وضعها ايه نفسيا .. لقيت انهم و الله حاجة زي الفل !

-لأول مرة الناس كلها بتوسعلي ! شايفين واحد اهبل جاي طاير في المرايا فا وسعوا
-الناس بطلت تتحنجل و هي بتعدي ادامي و تخليني اقف تماما ! ده كان فيه اتنين شباب بيعدوا عالدائري و بيني و بينهم بتاع 300 متر .. شافوني جاي طاير زي العبيط قاموا راجعين تاني .. دول لو كانوا امبارح كانوا خلوني ابطل العربية و انام شوية
- سبحان الله اما بقيت اغير الحارة بدون اشارة الموضوع بقي سهل جدا! الأول كنت ادي اشارة الاقي اللي ورايا فجأة قرر يشد حيله و يصمم يعدي مني .. دلوقت يلاقيني بكسر مرة واحدة يقوم مهدي !
- بدل ما اروح في ساعة روحت في 35 دقيقة !
- مشتمتش ولا اتعصبت خالص !

سبحان الله و الله في البلد دي اللي يعيش بلطجي يكسب فعلا!
بس للأسف دي تجربة يوم واحد .. من بكرة هرجع اروح في ساعة تاني عشان مش دماغي السكة دي

انا كنت هاسألك انتى ناوى تكمل فى طريقة السواقة دى .. لكن الأجابة جت فى اخر سطر ....... بس هل لما ترجع مسكين وغلبان وتتعصب وتبقى عايز تشتم وتوصل فى ساعة مش فى 35 دقيقة ..هل بعد ده مش هاتفكر ترجع تانى للتجربة الديهيومانرزية

الموضوع عندي مختلف شوية ,
لما بكون هادي بمشي براحتى و لو حد عايز يعدي بعديه و لو ميكروباص كسر على بستناه , يعني لحد ما إلا إذا واحد خرجني عن شعوري ,
لكن لو مستعجل أو متضايق بقي حاجة تانية , و لكن لما بهدي مبكونش راضي عن طريقة سواقتي أو تعاملي مع الناس ,
أفضل حاجة الوسط ذي ما محمود الحفناوي ما قال (مع تحفظي على وصف الكلاب) ...

المشاركة الأصلية كتبت بواسطة memo_hefnawy

يا جماعه أولا أشكر العضو الفاضل sss على النصيحة و أنا ماعنديش أى مشاكل فى تقبل النصيحة من أيا كان سواء أعرفه أو لأ فالنصيحة طالما لوجه الله فاليجزى الله صاحبها خير الجزاء

لكن أنا مازلت مصر على وصف عابرى الطرق السريعه و الدائرى بأنهم كالكلاب الضاله و عشان أكون دقيق فى الكلام مش كلهم ولكن الغالب منهم

مش هايفهم كلامى ده إلا واحد إتعرض لحادث إنه خبط حد منهم أو كاد أن يخبط حد منهم هايفهم وقتها بس بالظبط الوصف ده ليه و هايفتكر الكلمة دى ساعت لما ركبه تسيب منه بعد الخبطة و أعصابه تفضل بايظه باقيت عمره من السواقه على الطرق السريعه

الناس إللى بتعدى دى ناس يترمى بأرواحها إلى التهلكه عادى جدا واحد بينتحر قدام عينك وش كده طب يا عم عايز تنتحر إرمى نفسك من فوق الجبل ولا من فوق عمارتكم لكن إبعد عنى مش تموت نفسك و تبهدلنى معاك

كام مرة حد شاف حادث بالمنظر ده تلاقى واحد ماشى فى أمان الله على الطريق و على سرعه و لتكن 100 و فجأه بلا أى مقدمات يفاجأ بالعربية إللى أمامه على اليمين أو على الشمال قفز من أمامها شخص ليقف أمامه فى حارته على بعد لا يزيد عن 10 - 15 متر !!!!!!!!!!!!!!!!!!
و الشخص ده ياريته يقف يتسمر مكانه فتعرف تفاديه بأى حركة بهلاونيه حتى

لأ يفضل يروح و يجى يمين و شمال طبعا إنت كمان بتروح يمين و شمال و كل ده فى جزأ من الثانية

و تفاجئ إن عربيتك عامت منك و يا شيلت الراجل يا لبست فى عربية تانية يا شيلته و لبست فى عربية و لبس فيك من وراك عربية أو أكثر !!!!!!!!!!!!!!!!!!!

تقدر تقولى الشخص إللى قفز أمامك من الفراغ ده تقدر تسميه إيه؟؟؟؟؟؟؟؟؟؟؟؟؟؟؟

لو حد منكم لسه شايف إن وصفى ليه مش فى محله يبقى أكيد مش متخيل المنظر و أتمنى من كل قلبى إن ربنا مايكتبهاش على حد سواء عابر أو سايق و ربنا يسترها مع الجميع

+1

من أسبوعين ملمستش دواسة بسبب الموضوع دا...والعابر كان *** ضال برضو!

الله يسامحه ويشفيه.