تقرير إسترجاع موبايل مسروق
شهر يوليو 2011 أتسرق مني الموبايل قدام سيتي ستارز وأنا سايق
أحد الباعة المتجولين (بيبيع نعناع) لاحظ أن الموبايل (E72) محطوط في الباب، فضل يأفلم عشان يبيعلي نعناع بالعافية وراح ساحب الموبايل من غير ما ألاحظ وهرب (طبعا غباء مني)
بعدها بأقل من دقيقة أخدت بالي أن الموبايل مش موجود وقفت ونزلت أدور عليه بس طبعا فص ملح وداب .. :majd(4):
رحت قسم مدينة نصر أول عملت محضر في ساعتها (من غير السيريال لأنه مكانش معايا)
طبعا ماكنش فيه إهتمام كفاية من الشرطة، على سبيل المثال مرضاش ياخد مواصفات الحرامي
دورت على نايل موتورز لقيت مواضيع قديمة ومعظم الناس بتقول إستحالة يرجع .. بس قلت خليني أعمل اللي عليا وخلاص
بعدها بيومين رحت عشان أثبت السيريال في المحضر وأعرف الإجراءات قالولي ده راح النيابة اللي في الحي السابع
رحت النيابة بعديها لقيت المحضر أتحفظ
المهم قالولي ممكن نطلعه ونعملك طلب تتبع ..وطبعا اضطريت أدفع المعلوم عشان الموضوع يمشي، وقالولي الطلب ده هيتبعت العباسية ومنه يتبعت لشركات المحمول
وبعد ما راح بحوالي أسبوع أداني رقم سري وقاللي تخليه معاك وتسأل بيه بعد كده وتتابع معايا بالتليفون عشان لما يوصلنا رد
أنا شغال في أتصالات، ومالقتش سيريال الموبايل عندنا على الشبكة
وليا معارف في فودافون وبرده مش موجود عندهم، بس معرفش حد في موبينيل
أنا قلت إما يكون محطوط فيه خط موبينيل :_Alshmokh22[1]:، أو يكونوا غيروا سيريال الموبايل زي ما بيعملوا
المهم فضلت أتابع معاه كتير ومفيش أي رد من الشركات لحد ما جالي يأس وهو قاللي من الآخر لو عندك واسطة في الشركات تخليهم يتحركوا غير كده الأمل صعب :H_angry[1]:
لحد ما صحيت يوم على تليفون منه (بعد حوالي شهرين) بيقوللي وصلنا رد من موبينيل بتليفون واسم صاحب الخط المحطوط في الموبايل بتاعك :Lighten:
رحت أخدت منه الرد الرسمي وأديته اللي فيه النصيب وطلع الخط باسم شركة في المعادي..
طلعت على مباحث التليفونات اللي في ألماظة، قالولي أسرعلك روح مباحث تليفونات المعادي لأنه تبع مربعهم
رحت المعادي عملولي محضر ضبط وإحضار وقالولي تابع معانا بالتليفون
كلمتهم أكتر من مرة قالولي أتبعت إستدعاء بس لسه ماحدش جه
لحد ما لقيت مقدم بيكلمني يوم الوقفة قاللي مبروك الموبايل رجع تعالى أستلمه :hlopaet_prv:
ورحت انهارده أستلمته وأديتهم الحلاوة - الشهادة لله محدش منهم طلب أي حاجة وكانوا ذوق معايا ..
واللي عرفتوا أن اللي كان معاه الموبايل سائق وأشتراه من محل موبايلات في شبرا
هو المشوار طويل وممل بس أنا كان صعبان عليا الموبايل عشان كنت جايبه بـ 2200 جنيه وكان بقاله معايا 6 شهور بس
الدروس المستفادة:
1- أحترسوا من الباعة المتجولين والمتسولين ويفضل تقفل الشباك
2- ما ضاع حق وراءة مطالب
أنا عملت التقرير ده عسى أنه ينتفع به أخواني في المنتدى :shyy: