توكيل Maguire بيفتح في مصر !
السلام عليكم
انهاردة بصراحة لما شفته قلت لازم اقولكم ده فدخلت و قعدت معاهم حوالي ساعة الا ربع بنتكلم عن الشركة .. طبعا معظمنا ان مكانش كلنا عارفين براند maguire الامريكية و شهرتها في منتجات العربيات و اللي تكاد تكون الاولى في تصنيع منتجات و ملمعات العربيات و كل ما يخصها.
في فرع بيفتح في اسكندرية و فرع في القاهرة (6 اكتوبر) .. بيعملوا كار كير بس طبعا بمنتجاتهم و المانجر مصري امريكي و حسب كلامه انه تدريباته كانت هناك و هو هنا بيدرب العمال.
انا رحت كار كير كتييير بس طبعا مشفتش حاجة بالنظافة دي ولا بالمبالغ النااااار دي :D
عندهم باكدجات حوالي 5 و عندهم حاجة تانية و هي Pay per hour و هي انك لو محتاج تعمل مثلا حاجة واحدة او اتنين معينين في العربية تدفع بس ساعة الشغل بتاعتها و اللي بتكون في حدود 100 جنيه للساعة
غير انهم بيبيعوا منتجاتهم كلهاااا بس يعني الScratch remover و اللي بالنسبالي كان افضل منتج للسكراتشز جربتها كان بتاعهم كنت جايبه ب 10$ .. عندهم ب115 جنيه
اسعار الباكدجات تبدأ من 45 جنيه (ده اللي هو بينفخ بس في العربية تقريبا :D ) لحد 2800 جنيه
الباجدج الشاملة او المشهورة بتاعتهم حسب كلامه اللي هي ب1500 جنيه ((بس)) :D
بالنسبة ليا كانت انسب باكدج فيها معظم اللي عايزه ب700 جنيه (اللي بعملها في انظف كار كير تاني ب300جنيه ..ايوة)
بس بيدي ضمان 3 شهور لو العربية لزق فيها اي تراب (في باكدجات معينة).. طبعا العربية مش مجرد بوليش دي بيتعملها حاجات لما شفتها قلت ده ولا دكاترة والله في اللي بيعملوه في العربية.
دلوقتي بقى عندي سؤال محيرني.. هل ده هينجح في مصر تفتكرو ؟ يعني الاسعار دي هتمشي معانا ؟