ورجعت من السفر (سلوكيات السواقة)
أجازة العيد ابتديت معايا من يوم الجمعة لحد الخميس
سافرت المنصورة اعيد على جدتي وبعض الاقارب ورجعت القاهرة أول يوم الساعة 2
سافرت الإتنين الساعة 6 شرم ورجعت الخميس الساعة 6 برده
المهم كل بلد وليها ستايل سواقة مختلف يعني مثلا وإنت ماشي على الزراعي بتلاقي الناس ماشية عادي جدا وكام عربية بتعمل غرز مش خطر والطريق ماشي
تنزل على طريق كفر شكر تبتدي بقى المأساه
مش هاقولك بقى إن المشكلة في توكتوك ماشي عكس أو بيقطع الطريق بالعرض لأ المصيبة بتكون فلكاررو والعجل اللي مش متخيلين إن ده طريق سريع
طبعا بقى ماتحاولش إنك تعدي من عربية نقل لإن كلهم طالعين الطريق ده عشان يطَلّعه الملكي فوق الرصيف, شكلهم بيحبوا يتشتموا ويتمرمط بكرامتهم الأرض قبل مايعدوك
في أي بلد ريفي تبع المنصورة بقى التكاتك ملوك الطريق بلا منازع بس طبعا بعد التعامل مع ميكروباصات القاهرة هتقدر توقفهم عند حدهم
نيجي بقى لشرم بعد النفق بيبقى الطريق رايح جاي وسرعته 120/140 والجامد بقى إن من غير كلاكسات ولا فلاشات الناس محترمة حبتين يعني لما حد بيشوف عربية في مرايتو ماشية أسرع منه بيوسع الطريق وبيخد جنب عشان اللي وراه ميروحش يعديه من الحرة المقابلة
توصل شرم بقى وتيجي بالليل تنزل تلاقي زحمة غير طبيعية في نعمة باي وتاكسيات بالعبيط وعندهم غباء منقطع النظير في موضوع الإشارات مبيفهموش يعني إيه حد يديله إشارة
واكتشفت إن الغباء ده رسمي في معظم السواقين هناك حتى لو بره شرم يعني وأنا راجع على طريق السويس كان فييه الانترا "معادي" الشكل اللي فات كنت أنا وهو بنتسلى مع بعض على الطريق وحمار بمرسيدس سبعينات أجرة "نمر تبع سينا برده" بيزنق عليه وقفش ميعادهوش بس بغباوة يا بني آدم إنت مش معدي 120 واللي جاي وراك 160 تلبسه ليه
المهم عدت السفرية على خير ورجعت للشوارع المهببة بـتاعتنا بمطباتها وميكروباصاتها وتكاتيكها
أكتر حاجة مفتقدها في السفرية دي طريق السفر :(