تقرير عن صيانة الالف لتيدا 2011 بزيت ليكوي مولي فى مركز اتو ايجيبت
وصف مركز اتو ايجيبت ..
هو مركز كبير جدا .. و فيه امكانيات روعة زي بلاي ستاشن .. مكان للمدخنين .. مصلي .. المكان كله محاط بالزجاج من جوه عشان تشوف عربيتك .. كافيه < بتشرب وبتاكل ببلاش ههههههه , بس مش كل مرة طبعا ههههههه > .. تلفزيون كبير بيبين < وقت دخول العربية .. بدا الصيانة .. انهاء الصيانة .. ووقت الغسيل .. وخلصت ولا لأ > .. في مايقرب من 6 مهندسين صيانة .. بتخش ليهم برقم بينادى عليك عن طريق شاشة برده .. ومن جوه يسيع من الحبايب ألف كبير جدا من جوه وبرده من بره .. من الآخر مركز متكامل بس لسة في حاجات مشتغلتش عشان لسة فاتح .. من آخر مشتغلش بكامل طاقته :))
نيجي بقى لاول ماوصلت ..
أول ماوصلت ياسيدي قابلني شاب كده محترم بيقولي حاجز ولا لأ .. قلتله حاجز .. قال لي اتفضل .. فرحت نازل من العربية .. فـواحد تاني جه .. راح مكيس الكرسي والدركسيون .. وإداني شنطة كده مكتوب عليها نيسان < شنطة حلوة بصراحة هههههههه > .. قال لي حُط فيها أي متعلقات خايف عليها .. قلتله حاضر .. قام قال لي اقفل عربيتك وخلي مفتاحها معاك .. وقال لي اتفضل خوش المركز بقى عند الاستعلامات ...
نيجي للاستعلامات والمهندس الاستقبال ..
دخلت أنا بقى وقابلت أستاذة كده محترمة عن الاستعلامات وقالتلي اسم صاحب العربية ايه .. فقلتلها .. راحت مدياني ورقة الصيانة وكده كانوا مجهزنها وده حاجة عجبتني قوي .. وقالتلي خد رقم واستنى لحد ماتشوف رقمك في الشاشة عن مهندس رقم كذا ... قلتلها متشكر ورحت قاعد ....
نيجي بقى للبيه مهندس الصيانة المحترم .. قعدت قدامه بقى .. وقعدنا نتكلم شوية عن العربية وقلتله عن الفرامل اللي كانت مديقاني .. وقال لي هنشوفهلك بكل اهتمام بصراحة .. كل ده كنا ماشين كويس لحد ماقلتله على الزيت اللي أنا جيبه لكيوي مولي 5w40 top tech
فـاستغرب كده وقال لي إيه الزيت ده .. قلتله ده زيت أنا مجربه .. واحسن من الزيت اللي عندك اللي هو total وزيت المراكز التانية من موبيل وشل وهات عندك بقى .. راح قايلي من قال لك كده .. قلتله قول اللي عندك طيب .. راح قال لي زيت توتال ده زيت نيسان الأصلي اللي بتقول عليه شركة نيسان .. قلتله هو أنا كل مروح مكان يقوللي ده زيت نيسان الأصلي .. ده ناقص اروح مركز في القمر يقولي زيت التعاون زيت نيسان الأصلي هههههه .. راح ضاحك .. راح حب بقى يخوفني شوية .. فقلي إيه بقى .. اش ضمنك إن العربية مفيهاش عيوب صناعة في الموتور وممكن تظهر في حدود 50000 كيلو .. فـممكن يخرجوا الموتور من الضمان بسبب الزيت ده .. قصده هيخدوا حجة الزيت هو اللي عمل المشاكل يعني .. قلتله باقولك ايه .. تصدق وتؤمن بالله في ناس بتحط فيسكو وتعاون في عربيتهم ومحصلش حاجة .. بقى أنا لما اجيب زيت أحسن من توتال وموبيل وشل .. تقولي هيبوظ .. راح ساكت كده .. وشكله اتنرفز .. وراح ايلي خلاص الزيت هيبقى على ضمنتك واحنا مالناش دعوة بيه .. قلتله تمام .. خلصنا كلمنا .. وقال لي اتفضل نروح نشوف العربية .. وشافها وعمل تشك وكل حاجة والي ساعة كده أو ساعة ونص وهتاخدها .. قتله ماشي .. وشكرا .......
مرحلة الصيانة بقى قدام عيني ..
اللي شغالين في العربية 2 أو 3 .. عارفين شغلهم صح .. ايديهم سريعة وحلوة في العربية .. بصراحة ظابطوها.. أنا كنت فرحان لأول مرة في صيانة عشان شايفهم عشان أنا عندي الصني مكنتش بشوف حاجة في مودرن بصراحة ... وخلصت على طول في نص ساعة صيانة وقاعدة في الغسيل سااااااعة ... المهم خلصت .. فرحت رايح اشوفها لقيت الكاوتش اللي قدام يمين ماتغسلش .. اضايقت جدا ورحت اتكلمت مع حد هناك عالغسيل .. حظي بقى إن مهندسة الاستعلامات جنة واقفة جنبي .. فـدخلت جوه للمهندس وشكلها قلتله العميل متضايق من الغسيل .. فطلع بره وداخلها غسيل تاني من 3' ار مايفتح بقه معايا .. فجت العربية .. ونفس المشكلة فيها الغسيل :((((( .. قلت بقى ايه اخش احاسب .. ولما المهندس يسلمني العربية ابقا احكيله واعاتبه ....
الحساب واستلام العربية ..
دخلت عن الكاشير وحسبت على 22 جنيه تنضيف فوم وطبت الزيت ... وادني الفلتر ومصنعية مجانن ...
المهندس بقى طلع معايا .. رحت بقى قايله هو ده الغسيل اللي بتقوله عليه .. قال لي معلش يا فندم .. المغسلة لسه فاتحة جديد .. قصده يعني لسة مفيش خبرة فالغسيل .. قلتله ماشي .. وقال لي هل ممكن اجرب معاك العربية قلتله ماشي .. راح جاري قوي وبعد كده داس فرامل رحت لابس في التابلوه .. قال لي إيه رأيك في الفرامل قلتله حلوة .. بس ليه مش مش نفس دوسة الصني .. راح قال لي ده نظام وده نظام تاني في الفرامل .. لكن هي بصراحة قوية وساعدتني بصراحة كتير في مواقف وحشة جدا ...
لحظة خروجي ....
سألني بقى المهندس إيه راياك في المركز بقى وهل في أي ملاحظة .. قلتله أنتم ليه مش فصلين بين المدخنين وغير المدخنين .. قال لي معلش أصل المركز لسة مكملش ودور للي فوق هيبقى فيه كل ده .. قلتله ماشي .. شكرا ورحت ماشي ..........
تجربة العربية بالزيت الجديد
العربية بقى سحبها تحفة عن الأول .. وبتجيب 4 rbm بسرعة .. الموتور صوته مرتاح قوي لدرجة إني مش سامع صوته خالص وناعم جدا .. بتوصل للسرعات العالية بسرعة اويي ...
في الآخر هي عربية جميلة قوي ..
إن شاء الله قريب هاكتبلكم تقرير عن الصني بالزيت الجديد ليكوي مولي برده .. صيانة 20000 ..........
وشكرا على مساعدتكم فى قسم نيسان لاختيار الزيت ..
احب اكون ساعدتكم بالتقرير ده ..
