الموضوع: مفيش ملف ومفيش مخالفات

تم تجديد الترخيص اليوم
مرور الاميريه بعد نقله والحاقه علي مرور مصر الجديده
اول شيء المخالفات
حمد ا لله كنت رايح النهارده وعامل حسابي علي اقل واجب 2000 حنيه مخالفات مابين رادار وانتظار في الممنوع وانتظار صف تاني
لان مخالفاتي كانت كتير جدا بحكم استهلاكي العالي للعربيه
من سفريات ومحور ودائري وشوارع القاهره الزحمه اللي مافيهاش خرم ابره للانتظار
لكن كان عندي احساس ان مفيش مخالفات لان مرور الاميريه تم نهبه واحراقه بالكامل
قدمت الرخصه في النيابه
وباقول ربنا يسترها
تم النداء
مخالفاتك 210 جنيه
بيني وبين نفسي الحمد لله
هاتدفع
طبعا ادفع هو في احلي من كده
دفعت وبعد كده سالت الناس الموجوده كله بيدفع مابين 150 او 200
او مفيش خالص
وعرفت ان الملفات اتحرقت
وبالتالي مفيش غير المخالفات اللي تم تسجيلها من بعد الثوره
فحصت اثناء الفحص كنت قلقان لاني مركب فاميه اول درجه والرخصه اتسحبت بسببه مره
المهندس لف حوالين العربيه وماتكلمش علي الفاميه لكن انا كنت مظبطه ماخدش غير 10 جنيه
لكن مش هي السبب طبعا
وطلعت علي التراخيص
سلمت الملف الجديد
انتظرت ان الموظفه تقولي استني علي ما تطلب الملف القديم كالمعتاد
مفيش
استلمت الملف وخلصت الورق في 5 دقائق
سالتها مش ها تطلبي الملف القديم
قالت
مفيش
ايه اللي مفيش
مفيش ملف لاي عربيه او موتوسيكل مرور الاميريه
معني كده ان لو حد سارق عربيه مرور الاميريه او اي اداره مرور اتحرقت ببساطه يقدر يرخصها باسمه
ازاي
العربيه في حوزته
يدعي بكل بساطه ان رخصه العربيه تم سرقتها او ضياعها ويطلب فحص لاصدار رخصه جديده باسمه الغير معلوم لديهم
هايتم فحص العربيه باسمه واصدار رخصه تسيير باسمه
الكلام ده اللي عرفته من مهندس الفحص
لكن اللي اعرفه ان اي عربيه ليها نسخه من ورقها ومخالفتها في الاداره العا مه للمرور في الدراسه
الا اذا كان مرور الدراسه تم نهبه وحرقه ايام الثوره