جدول الصيانة الدورية للسيارة 2107 من التوكيل
أنا كنت عند مهندس الصيانة فالتوكيل و صورت بموبايلي ورقة جدول صيانة اللادا 2107 كنت عاوز أرفعها دايركت بس هيه شكلها وحش قوي فقولت أكتبهالكم .. و كان مكتوب فيها الآتي :
جدول الصيانة الدورية للسيارة لادا 2107
تغيير فيلتر و زيت المحرك كل 5 آلاف كيلومتر أو على حسب نوع الزيت
فحص مستويات الزيوت كل 5 آلاف كيلومتر
تغيير البوجيهات "شمعات الإحتراق" كل 10 آلاف كيلومتر
تغيير أبلاتين و كوندنسر كل 10 آلاف كيلومتر
تغيير فيلتر الهواء كل 10 آلاف كيلومتر
تغيير فيلتر الوقود " البنزين" كل 10 آلاف كيلومتر
تغيير زيت ناقل الحركة "الفتيس/الجيربوكس" كل 10 آلاف كيلومتر
تغيير زيت الكرونة "الترس التفاضلي" كل 10 آلاف كيلومتر
فحص مراوح التبريد كل 5 آلاف كيلومتر
فحص دورة التبريد كل 5 آلاف كيلومتر
تغيير مياه الرادياتير مرة كل سنة
تنظيف تيل الفرامل الأمامي و الخلفي كل 10 آلاف كيلومتر
ظبط التاكيهات كل 20 ألف كيلومتر
تغيير طقم الكاتينة كل 80 ألف كيلومتر
تغيير زيت الدبرياج "القابض" كل 20 ألف كيلومتر
تغيير زيت الفرامل كل 20 ألف كيلومتر
الكشف على صلايب الكردان كل 10 آلاف كيلومتر
تربيط العفشة كل 10 آلاف كيلومتر
ظبط ضغط الإطارات كل 5 ألاف كيلومتر
ترصيص العجل كل 10 آلاف كيلومتر
الكشف على رومانبلي العجل كل 20 ألف كيلومتر
تبديل "تدوير" مكان الاطارات كل 20 ألف كيلومتر
ظبط زوايا العجر كل 20 ألف كيلومتر
الكشف على وصلات دورة الوقود كل 5 آلاف كيلومتر
الكشف على حامض البطارية كل 5 آلاف كيلومتر
الكشف على الأنوار الخلفية و الأمامية كل 5 آلاف كيلومتر
تربيط الاكصدامات الأمامية و الخلفية كل 10 آلاف كيلومتر
تشحيم مفصلات الأبواب كل 5 آلاف كيلومتر
علما بأن الصيانة الدورية تكون كل 5 آلاف كيلومتر
بالعربي كده هم عاوزين الناس تغير زيت موتور بالفيلتر كل ما ييجوا في ميعاد الصيانة الي هوه كل 5 آلاف كيلومتر مهما كان نوع الزيت ونصيحتي اختاروا الزيت الي يعجبكم و امشوا بيه الفترة الصحيحة الموصى بها ودائما غيروا مع الزيت الفيلتر
والمهندس قالي مش لازم تغيير زيت الفتيس و الكرونة و الأفضل أساسا انه يتم تزويد النقص فيهم وعدم تغييرهم و ده كلام سليم سمعته من حوالي 7 ميكانيكية مختلفين
حاجة ثانية (في توكيل الاسكندرية) مافيش أساسا خدمة للعجل أكثر من نفخ العجل ل31 psi و السلام ختام .... لا بيدورو العجل و لا بيرصصوا ولا بيظبطوا زوايا مش عارف ان كان النظام ده هوه هوه الي في باقي مراكز الصيانة
وأكيد حاطين شوية حاجات هبله عشان الي يشوف الورقة يقول يااااه دول هيشتغلوا شغل فظيع زي تشحيم الأبواب وهو كل الي بيعملوه بيدوا رشة wd-40 فالمفصلة و يقوموا قافلين الباب :) و يقولك كشف على الأنوار و مرة كان عندي لمبه فرامل اتحرقت ماكنتش قايللهم عليها فماصلحوهاش غير قبل ما اطلع لما قولتلهم و هزقتهم قولتلهم مش كاتبين بتبصوا على الأنوار أمامي و خلفي قالولي افترضوا انهم شغالين عشان العربية شكلها جديدة وشوية كلام بايخ :) بس غيروا اللمبه ببلاش طبعا لإن دي شامله في تكلفة الصيانة العامة الي بتتكتب فالفاتورة في بند بــ 100 جنيه
وللمعلومة تغيير مية البطارية و تصليح تزييق الأبواب او تسهيل قفلها وفتحها داخل فالصيانة العامة أم 100 جنيه :p وبس كده :d
أتمنى الكلام الي أنا كاتبة يفيد أي حد محتاج يعرف حاجة عن المواعيد القياسية للصيانة
