الطريق الدائرى وصناعه الموت والنيسان صنى

**noon_eg** · 14-11-2011 03:56 AM

الف حمدا لله على سلامتك

لا شك ان العربيه الصنى محترمه فى الثبات و عوامل الامان المختلفه بالنسبه للفئه السعريه دى

انا حصل معايا موضوع شبيه
نمت وانا سايق على الزراعى وصحيت لقيت نفسى بينى وبين الخرسانه اللى فى الجنب حوالى 10 متر وداخل فيها بالوش رحت رامى شمال جامد مره واحده ... باعجوبه العربيه استجابت وعومت حاجه بسيطه على الاسفلت وقدرت بفضل الله اسيطر عليها وربنا ستر ماحدش دخل فيا من ورا رغم انى كنت ماشى 90 وفى ملف

على النقيض تماما احد الجيران اتقلب بهيونداى اكسنت الجديده مع انه كان ماشى 50 كم/س فى صلاح سالم يعنى حته زحمه ... جت عربيه بتاخد غرزه من ورا خبطته فى الرفرف الشمال ورا فاتقلبت العربيه مرتين وزحفت على السقف .. انا لما شفت العربيه لقيتها متدمره كنت فاكر انها بسبب السرعه الجنونيه بس لما عرفت الموضوع استغربت جدا

تحيه لشركه نيسان اليابان على تصميمها الجيد .. وعتاب شديد لنيسان مصر على عدم حل المشاكل المتكرره فى العربيه ( واللى بتكره بعض المستخدمين فيها ) رغم مرور 7 سنوات على انتاجها وبيع ما يزيد عن 70 الف عربيه منها فى مصر

وتحيه كبيره لمنتدى نايل موتورز على اتاحه الفرصه للجميع بالاستفاده من التجارب المتنوعه للاعضاء

**noon_eg** · 14-11-2011 03:58 AM

حمدا لله على سلامتك

**Powert** · 14-11-2011 09:57 AM

الطريق دة اسمه طريق الموت وكل الناس فاكرة نفسها بتعرف تسوق وتجري فيه علي 120 وانت طالع

ومحدش عارف انت الحادثة بتيجي في لحظة والعمر لحظة

اخي الكريم ده طريق شغلي كل يوم. ومابحولش ازود فيه عن 90

انت اخطات في حق نفسك لما جريت علي 120 لان السرعة القصوي علي الطريق هي 90.
وربنا يستر طريقك

**Youssef.Awad** · 15-11-2011 01:41 AM

حمد لله على سلامتك يا باشا
انا هاحكى موقفين حصلولى مع الصنى 2010 مانيوال على الزراعى بنها-القاهرة
الاول: العداد 8500 كم - السرعة 100-110 كم - الزمان 10 مساءا -المكان مطلع كوبرى قها القديم يعنى ملف يمين وسرعة وفجأة صوت تخبيط فى الجهة الشمال من العربية ولقيت الطاسات طارت والعربية مش متزنة بس الدركسيون حديد لا بيحدف ولا يعوم ... السبب نقرة فى الاسفلت مكان تجريف القديم قبل ما الطبقة الجديدة تتحط - طبعا وقفت على جنب مطلع الكوبرى ونزلت جبت الطاستين ولقيت الجنط الامامى معووج اوى والكاوتش بيريح واللى ورا شفة الجنط بس معووجة من غير ترييح طبعا كملت لحد منزل الكوبرى وركنت ابدل الاستبن مكان العجلة الامامية ... وكمان اول ما وقفت سمعت صوت طرقعة جامدة وعربية صنى سوبرصالون جنوط اسبور برضه كل المطب ده بس العجلة الامامية شمال اتعوجت جامد وكانت برضه زيرو وثبات برضه ولا كأن حاجة حصلت !!!
التانى: العداد 51000 - السرعة 90-100 كم - الزمان 4 عصرا - المكان بعد كوبرى طوخ فى اتجاه القاهرة ملف برضه شمال وفجأة لقيت جسم حديد على الارض وجيت افاديه ما عرفتش لأن شمالى الحاجز الخرسانى ويمينى عربية بتعدينى جاية طايرة من ورا بالعافية جت فى جنب الكاوتشات اليمين الداخلى وقطعتهم وفى اقل من ثانية الفردتين كانوا ع الارض وانا اقصى الشمال والمفروض اركن يمين ... برضه الحمد لله العربية اتسمرت فى الاسفلت والدركسيون تقيل لحد اما اتأكدت ان الطريق فاضى واديت اشارة يمين وركنت بعدها ب150 متر تقريبا بأمان !!!
العربية دى ثباتها مذهل الحمد لله وفراملها ما شاء الله حتى بدون abs وفعلا باحس فيها بالامان الحمد لله مش زى النيو اكسنت - عربيتى الاولانية - كان زمانها اتقلبت فى الموقف الاول واقل واجب لبست فى عربية تانية فى الموقف التانى