الموضوع: نيسان صنى 2011 ex

المشاركة الأصلية كتبت بواسطة PEACEMASTER

نصيحة اخ: انا معايا نيسان صني ex 2011 اوتوماتيك من 6 شهور عاملة 4000 كم
*العربية بصراحة بتحرق بنزين كتير وحسبتها كذا مرة وكانت النتيجة زفت..

فى الاول ياريت حضرتك تقرا الموضوعين دول بعناية واهتمام لأن موضوع استهلاك البنزين ده قتل بحثا وفى الاخر اتضح ان فيه عوامل كتييييييييييير جداااااااا بتأثر عليه ومشروحة فى الموضوع التالى: http://www.nilemotors.net/Nile/185375-a.html
وده كمان موضوع اتعمل وكل عضو يمتلك نيسان قال فيه معدل استهلاكه فى البنزين فى ظروف سواقة مختلفة وكلها كانت مقبولة جدااااا http://www.nilemotors.net/Nile/227761-180.html
ورأيى الشخصى المتواضع ان الموضوع ده عامل نفسى يشعر بيه اى واحد راكب نيسان وصنى بالذات لما يكون لسه مفول العربية وماشى بيها يلاقى مؤشر العداد عمال يتناقص بسرعة غير عادية وده ناقشناه فى موضوع سابق تناول سعة التانك = 50 لتر وامتى اللمبة بتنور: لما تنور بيكون فيه من11-13 لتر بنزين مش 5-6 لتر زى اغلب العربيات وكمان كل شرطة من العداد توازى كام لتر بنزين وده عن تجربة فى عربيتى وجدت ان نص العداد العلوى بيكفى قطع مسافة من 200-240 كم والنص السفلى بيوصل ل400 كم مقسمين كل شرطة كبيرة ب200 كم يعنى التانك كامل 600 كم وعن تجربة برضه مرة فضلت ماشى على تفويلة كاملة للزور - يعنى 50 لتر - حوالى 600 كم ولما فولت تانى اخدت 48 لتر بنزين 92 وكان فى ازمة البنزين من فترة قريبة منهم تقريبا 120 كم ماشى واللمبة منورة وحوالى 60 كم والمؤشر تحت خالص قبل مللى واحد من نهاية العداد
من الاخر الاستهلاك طبيعى وبيعتمد على طريقة القيادة وقريب من اغلب العربيات فى ذات الفئة بغض النظر عن قراية العداد

اما بالنسبة للجزء التانى:

المشاركة الأصلية كتبت بواسطة PEACEMASTER

*مرة كنت في نفق الازهر في شهر 8 وفي عز الحر قام التكييف فصل وبقى شغال مروحة وانا اتسلقت وما اشتغلش تاني الا لما ركنت العربية ورحت مشواري ورجعت شغلته اشتغل من غير اي سبب.
( بصراحة التقفيل المصري باين فيها ... وحش اوي)..

ده برضه حصل معايا فى شهر 7 اللى فات ونفس المكان والتكييف فصل لأن فيه سينسور بيفصل اتوماتيك لما يوصل لدرجة حرارة معينة وما يقدرش يبرد لما يكون فى مكان مكتوم وخنقة ونفق كمان زى الازهر وماشى ع الاول مدة لا تقل عن 30 دقيقة وكل ده حماية للكومبريسور لأن ايه فايدة لما حضرتك تتكيف جوة العربية والكومبريسور يضرب برة وده موجود فى اغلب العربيات الجديدة وفعلا لما طلعت وركنت فى شارع طلعت حرب ونزلت 10 دقايق ورجعت اشتغل تانى بعد اما برد وعلى فكرة ده موضوع قديم كان اتذكر فى احد مشاركات العضو fbiahmed وانا اكدته من الموقف اللى حصلى ده ولا علاقة له بجودة او رداءة التقفيل لأن كل العربيات اللى كانت حواليا كانت كده برضه وفتحوا الشبابيك واللى ما فتحش كان بيتهوا بالمروحة وشوية الهواء البارد جوة الصالون