الموضوع: "سخونة الصنى"

السلام عليكم و رحمة الله و بركاته
نيجى بقى للجزء الشيطانى أو لمعنى أصح البيزنس

الجزء ده انا بتكلم فيه من ناحية النقد البناء يعنى شايف حاجة غلط من شخص عزيز عليا و مش عايز اخسره

الشخص ده هو مركز السبع كمركز بعيد عن كل الناس اللى فعلاً محترمة و فعلاً كل همها رضا العميل
"و اذا كنتوا اخوات اتحاسبوا"

بالورقة و القلم

(1) الخساير

المركز خسر:
1- جوان وش سلندر "تشخيص خاطئ"
2- ريداتير جديد "نتيجة ارتفاع درجة الحرارة لدرجات عالية"
3- سربنتينة سخن "العيب الأساسى بالسيارة"
4- ونش لنقل السيارة من دهب للقاهرة "1500 جنية"

العميل أسامه خسر :

1- بهدلة ليه و لآسرته "نظراً لسفره المتواصل يعنى لما العربية تسخن لازم تقف بالعربية نصف ساعة فى اى مكان مع الانفلات الأمنى يبقى لاتقدر بثمن"
2- حرمانه من عربيته لمدة اسبوعين منفصلين "يعنى اجازة 10 ايام منهم يومين سفر و 7 فى التوكيل يتفضل يوم أجازة.
و الاسبوع الثانى فى دهب يعنى كل يوم اخد عربية الشغل علشان اجيب بنتى من المدرسة و الصبح واحد صاحبى يوديها"
3- و للأمانة التوكيل عرض انى أأجر عربية على حساب التوكيل و انا اللى رفضت.
4- اتغير للعميل أسامة جوان وش سلندر من باب الخطأ يعنى الماتور اتفتح على 90 ألف يعنى الله أعلم فى حالة البيع الخسارة كام و برضوا للأمانة أنا سئلت الأستاذ شريف و مستنى الرد
http://www.nilemotors.net/Nile/3873927308-post637.html

بالنظر للخساير

* التوكيل خسايره ماديه
* العميل أسامة خسايره معنوية بس لا تقدر بثمن
يعنى انا مستعد أدفع اى مبلغ لأى عضو محترم فى نظير انه يقف مده نص ساعة فى طريق مقطوع هوا و مراته و بناته الأثنين 4،6 سنين و أبنه سنه و شهرين

* خساير التوكيل بسبب سوء تشخيصه
* خساير العميل اسامه بدون سبب

(2) الجانب الفني

التوكيل

1- يوجد بالتوكيل جهاز لضغط المياه للكشف على التسريب
"لم يستخدم لمعرفة سبب المشكلة و الاعتماد الكلى على العامل البشرى فى تشخيص الأعطال بدليل انه يوم تغيير السربنتينه تم استعماله"

2- دورة التبريد فى النيسان عبارة عن (قربة +ريداتر+سربنتينة السخن +.....)
المفروض فى حالة المشكلة المطروحة أو أى مشكلة مماثلة إتباع التالى:
أ- الكشف على الريداتير
ب- الكشف على القربة
جـ - الكشف على ترموستات الكوع
د- الكشف على الخراطيم و الوصلات
هـ - الكشف على سربنتينة السخن
و - الكشف على ......
ز - و على .....
حـ - آخر حاجة أفتح الماتور اشوف وش السلندر"و دى آخر مرحلة"

3- العربية فضلت فى التوكيل أسبوع + أسبوع محدش لاحظ نقص المياه فى السيارة
"يوم ما استلمت العربية كانت ناقصة و تم تزويدها قدامى"

4- يعنى ايه العربية تقعد أسبوع تجارب و لما اجى استلمها ألاقى البطاريه نايمه "يعنى مش أقل من خمس أيام العربية متحركتش"

(3) التقارير

1- ليه فى حالة تشخيص أى عطل ميكونش مكتوب
"بدل ما كل شويه أصل المهندس فلان قال و المهندس فلان عمل"

2- ليه فى حالة تسليم عربية سواء فى الضمان أو غير الضمان ميكونش فى تقرير مكتوب يقول المشاكل فين و اللى اتعمل كذا و بكذا و كذا فى الضمان و كذا مش فى الضمان و اتكلف ....

3- ليه جهاز كشف الأعطال تسأل عليه فى الاستقبال يقول عطلان تروح للمهندس فلان حبيبك يطلع شغال.

الخلاصة

* التشخيص المظبوط يوفر فى الوقت و المجهود و المال
* مش عيب كمهندس محترف انى اقابل مشكله معرفش لها حل انى أسأل أو استشير أى حد "مش عيب"
* مش عيب لما اغير قطعة غيار و العميل مازال مُصر ان العيب مازال قائم انى ابص تانى "فى عربيات بتيجى من اليابان فيها عيب صناعة و العميل هوا اللى بيكتشفه"
* العربية بالنسبة لى ايدى و رجلى اللى بعتمد عليهم فى حياتى اليومية و هى اللى بستأمنها على ولادى و أهل بيتى فياريت شوية اهتمام.

بس كده يمكن أكون طلعت كل اللى جوايه من ناحية الموضوع ده و انا متأكد ان السبع حيجاهد علشان يرضى العملاء اللى زى.
و يا ريت أكون أفدت أى حد من التجربة دى.

و السلام عليكم و رحمة الله و بركاته