الموضوع: "سخونة الصنى"

السلام عليكم و رحمة الله و بركاته
نكمل الجزء الثالث من سلسلة سخونة النيسان صنى
للى مش مذاكر
الجزء الأول
الجزء الثانى

كان الجزء الثانى خلص على

المشاركة الأصلية كتبت بواسطة osama_i

السلام عليكم و رحمة الله و بركاته
بعد المداولات قررت أنى بعون الله أعرف العيب فيين
قمت بمراقبة العربية مراقبة شديدة و اكتشفت التالى
صباحاً ببص تحت العربية لقيت بقعت مياه خضراء نص قطرها حوالى 2 سم
الساعة واحدة الضهر و انا رايح مدرسة حبيبة و وصلتها البيت ببص تحت العربية لقيت حوالى 4 نقط خضراء
رحت على البنزينة و بصيت على العربية من تحت لقيت خرطوم التكييف مبلول و عليه مياه مع إن آخر مرة شغلت فيها التكييف كان من أسبوع و على فكرة المياه لونها اخضر؟؟؟؟

قلت قبل ما أعمل حاجة أسأل ايه علاقة المياه الخضراء بخرطوم التكييف؟؟؟؟
يا ريت يا أستاذ fbiahmed صورة توضيحية لدورة المياه كاملة و ياريت لو معاها سربنتينة التكييف.
علشان بعون الله عايز اعرف العيب منين.
و شاكر جداً على حسن التعاون

المشاركة الأصلية كتبت بواسطة walidadel

ياباشا طالما هاتيجي في بلدي يبقي عيب عليك انا اظبطك اعتبر ان الموضوع منتهي يعني

المشاركة الأصلية كتبت بواسطة osama_i

حتلاقينى من الجمعة عندك .....هواااا

المهم وصلت يوم الخميس بفضل الله و كلمت المهندس الكبير وليد بيك عادل يوم الجمعه الصبح و فعلاً اتقابلنا على الساعة 6 مساءاً فى بنزينة موبيل اللى فى شارع الخليفة المأمون "مع انه طول النهار بيلف مع أحمد بيه أزار فى سوق السيارات" كان بعربته و قال لى تعالى ورايا.
يمين فى شمال فى يمين فى شمال لقيته وقف قدام محل بقاله و راكن قدامه عربية ريجاتا و شغالى فيها راجل كبير حوالى 55 سنه .
بعد السلام و التحيه وليد قال للراجل الكبير عندى العربية دى بتنقص ميه شوف لنا وضعها ايه .
فتح الكبوت و بص يمين شمال و لقيته ساب الكبوت و دخل جوه العربية و قام شايل الدواسات لقينا ؟؟؟؟؟؟



يا نهار اسود الميه الخضرا دى جات منين
ثم دى زى ما تكون طالعة من تحت الأرض
ايه يا عم الميه دى قال دى سربنتينة السخن اللى جوه الصالون!
بصينا لبعض أنا و وليد
وليد نادى على الأسطى حمدى حوالى 30 سنة و عاد معاه نفس الفيلم رد عليه بنفس الاجابه
طيب و ايه الحل يا دكتور حمدى قال حاجه من 2 مالهمش ثالث:
1- تتلغى السربنتينه دى على أساس ان محدش بيستعمل السخن.
2- يتعمل كوبرى من الماتور على اساس انه يلغى التسريب لحد ما تروح التوكيل بعد العيد يعالجوا المشكلة.
قبل ما نختار الاجابة استعنا بصديق عمدة النيسان "احمد بيك مصطفى" كلمناه قال لازم نسأل المهندس محمد عبد المنعم من توكيل السبع
و قد كان لقينا المهندس محمد عبد المنعم بيكلمنا و اختار معانا الاختيار الثانى اللى هوا



خمس دقايق و كل المشاكل اتحلت بفضل الله أولاً و بمساعدة وليد بيك عادل و بتنفيذ الاسطى حمدى الله يعمر بيته
شويه صور للمشاكل اللى كانت عندى







تمت تجربة العربية خلال الفترة من الجمعة 4-11 حتى يوم الأحد 13-11 عن طريق :
أول يوم العيد مدينة السادات 240 كيلو رايح جاى
ثانى يوم العيد مدينة الفيوم 180 كيلو رايح جاى
ثالث يوم العيد مدينة الاسكندرية 500 كيلو رايح جاى
رابع يوم العيد مدينة قويسنا 130 كيلو رايح جاى
11-11 مشوار البلد 240 كيلو رايح جاى
كل التجارب كانت صبح و ليل و بأحمال و بدون و بتكييف و النتيجة القربة منقصتش مل متر واحد و مؤشر الحرارة ثابت طوال فترة التجارب
كده على الجاهز اتكلت على الله و رحت التوكيل يوم الأحد 13-11
اتحركت من الهرم على الساعة 11:30 صباحاً وصلت على الساعة 12:10 ظهراً
كلمت المهندس معتز علشان احدد ميعاد للمقابلة و الراجل مشكور قال لى انا مستنيك فى المكتب
وصلت التوكيل على مكتب الاستاذ معتز رأساً حكيت له المغامرة من طق طق لسلام عليكم و الراجل تفهم الموضوع كاملاُ اتصل على المهندس سعيد و قال له حالاً اكشف على ثلاجة السخن و بلغنى بالنتيجة
و بالفعل تم الكشف على الثلاجة و ثبت فعلاً انها عايزة تتغير
قالى ساعة و حنغيرها فى الضمان و فعلاً نص ساعة و لقيت التابلوه على الأرض و الثلاجة بتتغير



و الحمد لله على الساعة 6 مساءاً كانت السربنتية متغيرة و طلعنا جربنا العربية انا و المهندس سعيد و الحمد لله كله تمام.
طبعاً كامل الشكر للأستاذ معتز المحترم و المهندس سعيد على حسن التعاون و لمركز السبع ككل.

----------

----------
----------

لحد هنا ده موضوع اسامة ابراهيم
المشاركة اللى جايه بتاعة شيطان أسامه ابراهيم