هام جدا لكل من اشترى سياره مستعمله
الساده الاعزاء
انا فتحت هذا الموضوع من اجل ايضاح بعض المعلومات الخاصه بطريقه شراء السياره المستعمله من خلال توكيل او عقد مسجل وهذا لمن اراد شراء سياره للاحتفاظ و ليس للمتاجره
ونحن جميعا نعلم انه يوجد طريقين لشراء السيارات المستعمله و هما الشراء بعقد مسجل مباشره او الشراء بعمل توكيل لحين عمل عقد مسجل ومن هنا يتضح ان العقد المسجل عامل اساسى فى الشراء حيث انه لن يتم نقل ملكيه السياره الا بعد عمل عقد مسجل بالشهر العقارى و هنا يبداء الموضوع
اولاً : مميزات و عيوب الشراء بالعقد المسجل مباشره
1- يضمن حق المشترى فى ملكيه السياره حيث انه يتم فى حضور الطرفين امام مندوب من الشهر العقارى ( ميزه )
2- لابد من نقل ملكيه السياره فى خلال شهر من تاريخ العقد المسجل ( معظم الناس تراها عيب بينما انا اراها ميزه و هذكر لماذا هى ميزه و ليست عيب )
ثانيا : مميزات و عيوب الشراء بالتوكيل
1- الانتفاع بفتره الرخصه الساريه للسياره لحين ميعاد التجديد و توفير المبالغ التى سيتم دفعها ( معظم الناس تراها ميزه بينما اراها عيب لمن اراد الاحتفاظ بالسياره و هذكر ايضا لماذا هى عيب )
2- التوكيل لا يعنى ملكيه الشارى فى السياره حيث ان السياره تظل فى الاوراق الرسميه باسم صاحب السياره و الذى وكل فلان فى قيادتها او التصرف فيها ( اراها عيب و ليست ميزه )
3- لابد من عمل العقد المسجل قبل الذهاب للمرور لنقل ملكيه السياره ( يعنى هتدفع قيمه العقد المسجل ان اجلا ام عاجلا )
4- ضروره الذهاب الى وحده المرور التابع لها السياره لاحضار شهاده مخالفات جديده قبل نقل الملكيه حيث ان القديمه اللى اخدتها من البائع لازم هتكون انتهت مدتها ( هو ده اكبر عيب لانك ممكن تلبس غرامات و انت معملتهاش )
وهنا بقى اقدر افسر ليكوا انا ليه فى بعض الحاجات كنت ماشى عكس الناس
شوفوا احنا هنمشى خطوات نقل الملكيه واحده واحده - الاول بعقد مسجل
1- هيتواجد الشارى و البائع فى الشهر العقارى و يتم عمل عقد مسجل ( الشارى هيدفع قيمه العقد المسجل ايا كانت و على حسب العربيه اللى هيشتريها ودى سهل معرفتها )
2- الشارى هياخد العربيه و العقد المسجل و شهاده المخالفات اللى اخدها من البائع و اللى لسه ساريه و يروح بيهم على المرور فورا ( طب و الفتره الساريه اللى موجوده فى الرخصه - دى الرخصه لسه فيها سنتين ) طب و هو حد قالك انت هتدفع ضريبه العربيه مرتين ؟ ؟ ؟ ؟
طالما الرخصه ساريه يبقى انت مش هتدفع الضريبه ولا هتدفع تأمين عن الفتره اللى العربيه رخصتها ساريه فيهم - - هتدفع بس تمن الفحص و ده بيعمل 30 جنيه ( نموذج فحص سياره + نموذج فحص طفايه + نموذج فحص عادم )
بقى علشان 30 جنيه - بلاش يا عم خليهم مائه جنيه اسيب العربيه ماشيه بتوكيل
3- هتخلص اجراءاتك و تستلم رخصتك اللى بتقول انك مالك السياره
تعالوا نشوف ثانيا بقى لما اشترى بالتوكيل
1- الشارى و البائع فى الشهر العقارى و يتم عمل التوكيل و المبلغ 6 جنيه ( ايه يعنى مش مهم - تؤ مهم انك هتروح تانى الشهر العقارى احسب الوقت و الفلوس المهدره فى ذلك )
2- استلمت السياره و اخدت شهاده مخالفات حتى لو بتاريخ النهارده فاخرها معايا شهر و بعد كده لا يؤخذ بها فى المرور ( يعنى لو خلص الشهر بتاعها هتضطر تروح تجيب شهاده جديده من المرور التابعه له السياره مع مالكها القديم - يعنى لو السياره تبع مرور الاسكندريه و انت هنا فى القاهره يبقى هتروح اسكندريه تجيب شهاده مخالفات جديده )
طب لو طلع على السياره مخالفات ( طبعا مخالفات قديمه على صاحب السياره ووصلت الى المرور بعد ما البائع اخذ شهاده المخالفات الاولى اللى اعطاها لك - نيابه المرور تقولك الشهاده القديمه انتهت و لو كنت نقلت الملكيه خلال الفتره اللى كانت ممنوحه ليك مكنش نزل عليك اى مخالفات ولكن لان السياره مسجله لدينا باسم صاحبها الاول يبقى لازم تدفع هذه المخالفات )
طبعا هى دى اسؤا ما فى التوكيل ( انت و بختك لما تيجى تعمل شهاده المخالفات و كمان انت و بختك مع وكيل النيابه و هل هيرضى يشيل المخالفات ام يخفضها ام يقولك روح على الفرع الرئيسى بالدراسه اشتكى و تقعد سعادتك تلف كام يوم علشان تحاول تخفض المبلغ )
عرفتوا ليه بقى قلت عليها عيب
الناس اللى بتعتبرها ميزه دول التجار اللى بيحبوا يقلبوا فى العربيات و علشان كده دايما تلاقيهم ماشين بتوكيلات و تلاقى العربيه فيها توكيلين و ثلاثه و ساعات اربعه كمان
3- لما تيجى تروح علشان تنقل الملكيه لازم الاول تروح الشهر العقارى و تعمل العقد المسجل و تدفع المبلغ اللى كنت هتدفعه من الاول لو كنت اشتريت بعقد مسجل من اولها ( يعنى روحت الشهر العقارى مرتين و فى الاخر برضه دفعت المبلغ هو هو )
4- قبل ما تروح المرور لازم تروح الاول تجيب شهاده المخالفات الساريه من المرور التابعه له السياره و انت و بختك طبعا و كمان هتروح الشهر العقارى تجيب العقد المسجل وبعد كده هتروح المرور و هناك لازم هتعمل برضه فحص على السياره ( يعنى هتدفع المائه جنيه هتدفعها - طب فرقت فى ايه ) و بعد كده هتدفع بقى ضريبه السياره و التامين عن الفتره الجديده بعد انتهاء الرخصه السياره طبعا
طب بعد كل اللى قريته ممكن اعرف رايك ايه
هل شايف ان التوكيل افضل من العقد المسجل برضه ؟ ؟ ؟