نقل ملكية سيارة من شركة

**ragaee** · 15-11-2011 02:04 PM

يا جماعة أنا بنقل ملكية عربية من شركة و مرورها من محافظة القاهرة (النزهة) لمحافظة الجيزة (الشيخ زايد)، و كانت الخطوات كالتالى
1- الشهر العقارى: تم نقل الملكية وكانت الأوراق المطلوبة هى
* الرخصة (سارية)
* عقد البيع من الشركة
* صورة من السجل التجارى للشركة (ودى ورقة فيها رقم سجل الشركة و شويت أرقام كتيرة كدة)
*صورة البطاقة

و تم دفع مبلغ 1340 جنية

2- مرور النزهة (المرور الأول للسيارة): تم عمل شهادة مخالفات وكانت الأوراق المطلوبة هى
* الرخصة (سارية)
*صورة البطاقة
*وصل صرف لوحات (بنص جنية من المرور)
*صورة من السجل التجارى للشركة

وتم دفع 5 جنية لأن الحمد لله مفيش مخلفات

3- مرور الشيخ زايد (المرور الجديد للسيارة): تم عمل الأتى بالترتيب
* شراء ورق فحص ب 25 جنية من المرور
* أخذ رقم الموتور و الشاسية عن طريق الفنى
* شراء طفاية (120جنية لأن القديمة بايظة و الفنى عرض عليا ان أشوفة و يمشهالى لكن رفضت)
* شراء ملف نقل ملكية (7 جنية و نص)
* ختم ورق الفحص من رئيس الوحدة
* شراء ورق التأمينات (128 جنية و بيختلف حسب نوع السيارة و مدة الرخصة)
* تقديم ملف نقل الملكية ومعه: رخصة السيارة، عقد البيع، شهادة المخلفات، البطاقة، صورة من البطاقة، ورق الفحص، ورق التأمين و صورة من السجل التجارى للشركة
و بعد انتظار ........
يتم أخذ ورقة تسليم اللوح من المرور و تسليم اللوح القديمة و استلام الرخصة المؤقتة (التصريح)

وتم كتابة الأتى على ظهر التصريح
"لحين ورود الملف و المؤسسة"

وبعد الرجوع للموظف قالى ان المؤسسة دى حاجة كدة لازم أجبها من المرور الأول (النزهة) علشان السائق مؤمن علية

والسؤال ياجماعة هل الكلام ده صحيح ولا الناس دى بتبعتنى، ولو صحيح، ايه المطلوب لإستخراج الشئ ده مع العلم ان أنا الأن لا أملك أى شئ للمرور الأول (النزهة)
أفيدنونى أفادكم الله

**Mo3taz Selim** · 15-11-2011 03:09 PM

مبروك ع السياره اولا

حضرتك الكلام مظبوط فعلا و لازم بتجيب شهاده المؤسسه و هو خطاب من المرور موجه للتأمينات التابعه له السياره "لأن فى الشركات لازم أى سياره بيكون ليها سواق مؤمن عليه فى التأمينات"

و لازم يتجاب جواب من التأمينات بشهادة المؤسسه يفيد بغلق ملفها لدى التأمينات و اللى بيساعدك فى الموضوع ده الشركه اللى حضرتك شارى منها السياره

يارب اكون قدرت أفيد حضرتك

**ragaee** · 15-11-2011 03:25 PM

أولاً أنا شاكر اهتمامك يا استاذ معتز،
طب الجواب ده يكون من المرور اللى نقلت منة (النزهة) ولا المرور اللى نقلت لية (الشيخ زايد) مع العلم ان أنا ليس لدى أى شئ الأن يخص مرور النزهة

**Mo3taz Selim** · 15-11-2011 03:40 PM

حضرتك الجواب ده بيكون من المرور اللى حضرتك نقلت منه اللى هو النزهه

المفروض إن الشركه اللى حضرتك إشتريت منها السياره تساعدك فى إستخراج الخطاب ده

**ragaee** · 15-11-2011 03:45 PM

شاكر ليك مرة تانية يا استاذ معتز، أنا بإذن الله هاروحلهم يوم السبت و ان شاء الله أبقى أضيف التفاصيل علشان الكل يستفيد

**Mo3taz Selim** · 15-11-2011 04:13 PM

لا شكر على واجب أستاذى الفاضل

ياريت كمان بما إن حضرتك هاتروح للشركه تطلب منهم إن الشهاده يتكتب عليها تسلسل ملكية السياره لإنه أكيد هايتطلب فى المرور
علشان تخلص فى مشوار واحد

**husam169** · 31-03-2012 12:57 PM

السلام عليكم .انا شاري عربيه من شركه ومؤمن علي سائق .السياره مرور المعادي وانا روحت النهارده مرور طنطا فحصت السياره وقالي روح المرور الاصلي طابق البصمه ......المهم دلوقتي ايه الحل في حكاية مؤمن علي سائق دي علما بان طلبت من الشركه شهادة المؤسسه واخدت منهم شهاده اسمها شهادة تامين ومكتوب فيها ان التامين هينتهي يوم 4/4/2012 اللي هو نفس انتهاء الرخصه والفحص...فياريت لو حد يعرف ايه المطلوب ولو فيه ورق مطلوب تاني لاني رايح بكره او بعده بالكتير ان شاء الله تاني...(انا شاريها بعقد مسجل في الشهر العقاري من 5 شهور ) وشكرررررررررررررررا ارجو الرد العاجل