مش عارف اعمل اية فى العيال اللى فى الشارع

مساء الفل
انا عندى عربية 127 2 باب على اد حالتى وكنت مرتاح من دوشة العيال اللى فى الشارع فى موسم المدارس واقتربنا من الاجازات وتقريبا كل اللى فى مدارس ابتدائى وحضانة خلصوا امتحانات وبقوا فى الشارع زى النمل
واللى مجننى ان انا بركن تحت البيت وكل يوم وانا نازل بلاقى المساحة اللى ناحية السائق متشالة شيل والسقف مطبق اقعد ازعق مع البوابة على مين اللى عمل كدة وهى بالتالى متعرفش مين اللى عمل كدة وكل يوم انزل الاقى حاجة شكل فى العربية مع العلم ان انا جالى روشة من الموضوع دة وبقيت ابص على العربية تقريبا كل نصف ساعة ومبلاقيش حد جنبها ودة اللى مجننى ومش عارف اعمل اية لغاية لما قلت وقررت ان انا هغطى العربية كل يوم واشوف اية النتيجة وليت نفس النتيجة السقف مطبق والمساحة مترحلة من مكنها والجديد انهم رسمولى على الغطاء من فوق جدول الضرب ارجوكم افيدونى هل اكهرب العربية ولا اخدها معايا وانا طالع ولا اركب فيها كاميرا عشان اعرف مين السبب ارجوا الافادة انا قدامى جراج بس شكلة غالى علية انا ساكن فى شارع القومية بامبابة شارع متفرع من شارع القومية رجاء الافادة سريعا اعمل اية عشان العيال ترحم عربيتى من اللعب مع العلم ان بيركن ورايا وقدامى وفى الشارع كلة عربيات احدث موديل وعربيتى هى الوحيدة اللى بيحصل فيها كدة مش عارف لية وشكرا ومعلش طولت عليكم

ملحوظة
واحد صاحبى قاللى ركب خوص حديد فى السقف لتقويتة هل هى فعلا مجدية ولا هلقيها مطبقة مع السقف وشكرا

افضل حل فى هذا الصدد هو الغطاء المزيت

خد الزيت اللى هينزل من غيار الزيت وشلفط بيه الغطاء من عند الكبوت وعلى الشنطة وعلى الأبواب، وبعيد تديها شوية تراب فوق الزيت وبعيدن تنفض الغطا، صحيح هيوسخلك الكبوت كام يوم على ما الزيت ينشف لكن صدقنى الكلاب نفسها مش بس العيال هتقرف تطلع على العربية

"
غلاء فاحش جابلى احباط خلانى كنت عايز اولع فى الدنيا كلها بجاز:

بس للأسف ....لقيت الجاز غلى "

معلش التعليق بره الموضوع بس فكرتنى بالغالى

اقتباس:

---

المشاركة الأصلية كتبت بواسطة sab3aawy

افضل حل فى هذا الصدد هو الغطاء المزيت

خد الزيت اللى هينزل من غيار الزيت وشلفط بيه الغطاء من عند الكبوت وعلى الشنطة وعلى الأبواب، وبعيد تديها شوية تراب فوق الزيت وبعيدن تنفض الغطا، صحيح هيوسخلك الكبوت كام يوم على ما الزيت ينشف لكن صدقنى الكلاب نفسها مش بس العيال هتقرف تطلع على العربية

---

تمام 100 100 و ممكن بدل الزيت علبة شحم شعر و اديلوا على الغطا

انا بيهيالى والله اعلم دى مش حركات عيال.ده شكله واحد كبير قصده يضايقك لان سيادتك بتقول عربيات حوليها كتير ومبيحصلهاااش كده ووممكن يكون حكاية جدول الضرب تمويه.صدقنى كل شئ جايز فى الزمن ده

ايه يا عم خالد الافكاردي..؟؟
خبرة السنين مع الشارع المصري الحزين.. :) :) :)

السلام عليكم ورحمه الله وبركاته
اخى العزيز كان الله فى العون
انا عندى نفس المشكله الاطفال احباب الله دائما النادى الصيفى بتاعهم مكانه فوق العربيه
اما بقى الملاهى مكانهاالزجاج الامامى فطبعا زى ما حضرتك عارف ان العيل يطلع على السقف بتاع العربيه وبعدين يتزحلق على الزجاج هبوطا الى الكبوت وطبعا المساحات بتعوق هذه الحركه فمن الاولى كسرها هكذا يفكرون
امامك حالين الاول كما قال الاخ سبعاوى غطاء سياره معفن بكل ما تحمله الكلمه من معنى
الحل الثانى انك لو الى مضيقك واحد عاوز ياخذ مكانك فعليك بالتنفيض حتى ييأس الكل
وتذكر يا اخى بان الممنوع مرغوب يعنى كلما انفعلت وزعقت كلما ذادوا
وربنا معاك ومعانا من اذمة انعدام الاخلاق

ركب انذار عشان تبقي عارف ايه اللي بيحصل في العربية علي الهوا
اول ما تزمر اطلع اقفش الواد اللي قارفك .. لو طلع واد مؤدب هيلم نفسه
لو طلع واد متشرد و مش متربي حطه في الشنطة شوية يتعلم الأدب

انا كل منزل من البيت الاقى خربوش جديد فى العربية برده بفعل العيال.ايه حل المشكلة دى؟

انا ليا راي كهرب العربيه و اعمل حوليها حقول الغام ده الحل الوحيد من وجه نظري
و ابقى قابلني لو لقيت العيال دول ولا العربيه نفسها
الخرابيش دي بالملمعات و الكمباوندات اصل دول عيال مش متربيه لو عاوز حل جزري ربي العيال دي

احسن حل انك تدور على جراج قريب اركنها فيه

الجراج بقي غالي جدا هنا في المحله وصل 250 شهريا!!!!!!!!
الحل الامثل هو حل اخونا الكبير سبعاوي .
فعلا غطاء و زيت و شحم بس يا ريت يجيب نتيجه لان فيه عيال ولاد@%$^&#
مش بتفرق معاهم و بيبقوا عاوزين الحرق
حسبي الله و نعم الوكيل في العيال دي و اهاليهم.
انا مره مسكت ولد عنده 12 سنه كده ضربته في الشارع لاني لقيته بيجرح عربيه وااقفه
اينعم العربيه مش بتاعي بس صعب عليا صاحبها اللي دافع دم قلبه فيها

جهاااز انذار ؟

عندى نفس المشكلة كان عندى عربية لادا 2107 جديدة من حوالى سنة و 6 شهور نزلت مرة لقتها معمولة لوحه سريالى على كل العربية الشنطة الكبوت جميع الابواب كان لونها ازرق بصراحه شكلها كان صعب جدا مقدرتش وبعتها بعدها على طول بهذا المنظر وحاليا معى الاوبترا ولكنى كل يوم احاول ركنها فى مكان بعيد عنهم ولكن ؟؟!!

فعلا نفسى اشترى شقة فى عمارة بجراش