كنت هاعمل حادثه وربنا ستر .. الحمدلله و شكرا رينو

**wassim_nasser** · 18-11-2011 03:52 AM

يوم التلات اللي فات كنت رايح من سوهاج للمنيا عشان اقوم بواجب عزا .. مشيت من سوهاج لأسيوط زراعي ومن عند مدخل اسيوط مسكت الصحراوى الشرقى و ماشى السكة كلها 140 160 والعربية تمام وزي الفل .. وبعد ماعديت الكمين اللي عند مدخل المنيا لقيت عربية تريلة لسة عاملة حادثه ومقلوبة عديتها ومشيت وباخد ملف يمين وملتزم بالحارة بتاعتي لقيت اتوبيس جاي بيلف ف المقابل وراح واخد الملف علي ضيق لقيته بيحدف عليا وجاي ف وشى .. لفيت الدركسيون اكتر عشان اتفاداه والمنحنى حاد جدا لقيت العربية لفت حوالين نفسها خمساية وطلعت ف التراب .. طبعا انا لا دست فرامل رجل ولا شديت فرامل اليد لأنى لو كنت عملت كده كانت قلبت .. بس الحمدلله العربية وقفت وحدها و ربنا ستر .. تعليقي علي الموقف ان ثبات اللوجان اكتر من ممتاز والحمدلله علي كل حال وربنا يسترها علينا جميعا

**تامر.محمد** · 18-11-2011 03:57 AM

نفسي اعرف ايه غية المصريين في اللف على الضيق حتى لو هايخليه في العكسي :@

المهم الحمد لله على سلامتك

**النوبي** · 18-11-2011 09:30 AM

لا اله الا الله دي ناس تجيب الشلل يعني لو حد تاني وحصله حاجه بتاع الاتوبيس ده هيعرف ينام بليل دي ناس خلاص فقدت ادميتها
الف حمد لله علي سلامتك

**wassim_nasser** · 18-11-2011 12:40 PM

الله يسلمكوا يا جماعة متشكر لذوقكم .. القضية ياعم تامر مش فذلكة ولا حاجه بس هاقولك اللي فيها .. اكيد انت فاكر ف الفيزيا (ان كنت علمى علوم) قوى الطرد المركزى و هى ان اي حاجه بتلف ف اتجاه دائرى بتواجه قوة بتحاول طردها لبرة .. تعالا نطبق الكلام ده علي سواقتك هاتلاقي انك لو بتاخد ملف شمال وانت حارتك يمين تحس العربية بتميل جامد بينما لو خدت نفس الملف ف الحارة الشمال (حتي لو كنت عكسى) هاتلاقي العربية واخداه مرتاح .. الخلاصة ان الراجل كان الملف بالنسباله شمال راح حدف شمال عشان ياخده مرتاح جه ف وشى وانا مديله عذره عشان اتزان الاتوبيس غير الملاكى مع انه لو كان هدي سرعته كان هاياخد الملف مرتاح بس ف الاول و ف الاخر الحمدلله علي كل حال والسواقة مالهاش كبير