الموضوع: لماذا تتحول المقارنات الى مشاحنات

السلام عليكم
بداية احب اكرر حبي و اعجابي بالمنتدى
ودة انا قلته قبل كده كتير
انا ياجماعة دخلت المنتدى هنا و انا لا افقه شيئا عن السيارات و قبل ما يكون عندي سيارة اصلا
لكن الحمد لله اتعلمت و استفدت كتير جدا على الاقل لما جيت اشتري سيارتي
ورغم ان مشاركاتي مش كتير لكن المنتدى بياخد جزء كبير من وقتي

المهم ... انا ملاحظ ان للاسف دايما لما يبقى في مقارنة بين سيارتين من ماركتين مختلفين غالبا ينتهي الموضوع الى مشاحنات و خناقات بين الاعضاء

طبعا كل عضو بيتحيز لسيارته و بيبقى عايز يقنع الناس كلها انها احسن عربية في الدنيا

انا والله بزعل جدا لما بلاقي حاجات كده

خلونا نتفق على حاجة ... الخلاف في الرأي لا يفسد للود قضية

مع ان هنا في مصر الخلاف في الرأي يفسد اي قضية
وده طبعا لاننا بنفتقر للموضوعية في الحوار و الحكم على الاشياء

انا عارف ان ده طبيعي خصوصا يعني لما يبقى الواحد دافع مبلغ و قدره في عربية مش عايز حد يطلع له فيها عيوب

ما اصل لو انا كنت شايف ان في عربية تانية احسن في نفس السعر كنت اشتريتها

فأكيد كل واحد شاري عربية هيا بالنسباله احسن اختيار في السعر ده

وطبعا تختلف احتياجات كل واحد عن التاني و هو عايز ايه بالظبط من العربية

هل عايزها عائلية و اعتمادية
ولا شبابية و منظر
ولا 4*4
ولا زيرو او مستعملة

طبعا انا مش بتكلم هنا عن النقطة دي لاني عمري ماحعرف اعمل موضوع من المواضيع الجامدة اللى في المنتدى واللى منها مثلا موضوع SEATLOVER خواطر..فى الاختيار بين الزيرو والمستعمل

انا بس عايز اقول انه لولا اختلاف الاذواق لبارت السلع

طيب ماتيجو نحاول نعمل حاجة

تعالو نحاول لما نعمل مقارنة نخلي دايما كلامنا على اساس علمي موضوعي

يعني نقول حقائق و اللي مش مصدقها هو حر يشرب من البحر
وبعدين تعالو نكبر دماغنا شوية بمعنى ...

انت قلت حقائق عن عربية معينة
وانت الناس عارفاك في المنتدى و ليك اسمك و الناس عارفة ان معاك العربية
وجه واحد قعد يقولك لأ اللي انت بتقوله غلط
وهو اصلا تلاقيه ماحدش سمع صوته قبل كده

خلاص ياجماعة سيبو كل واحد يقول اللي هوا عايزه و تعالو نكبر عقلنا

مش انت اشتريت العربية و فرحان بيها خلاص بقى سيبك من اي حد عايز يلامض و خلاص

وبعدين لو انا فعلا بفكر في العربية حدور على اكتر من مصدر عشان اتأكد من المعلومة

معلش يا جماعة انا عارف اني طولت عليكم بس ده فعلا عشان دمي بيتحرق لما بشوف الخناقات دي بتحصل
وبقيت خلاص مابفتحش مواضيع المقارنات لانى بقيت متأكد اني لو دخلت حلاقي خناقة والدنيا الصراحة مش ناقصة حرق دم
بس المشكلة ان الموضوع زاد لدرجة ان لو حد بس جاب سيرة انه عايز يشتري عربية تلاقي الناس كلها بتتخانق على انهي احين عربية
كأن كل واحد حياخد نسبة من مبيعات العربية بتاعته

ما علينا
دي كانت مجرد فضفضة لانى بحب المنتدى و زعلان من اللي بيحصل فيه

واتمنى ان مايكونش حد زعل مني