تجربتى مع مركزالأقصى لصيانة الأوكتافيا
أنقل لكم تجربتي اليوم مع مركز صيانة الأقصى بالمعادي
ذهبت إلى مركز الصيانه فى الساعه 10.30 صباحا ، وتم إستلام السياره منى (octivia fantasia 2011) وأعطاني الأمن رقم وقال إذهب حضرتك للمهندس جوه ، وبالفعل دخلت وجلست حوالى 10 دقائق حتى جاء دورى ، وأخذ المهندس منى الرخصه وقال لى (حنعمل إيه) ، قلت له صيانة 5000.
قال لى الصيانه دى مجانا ، وهنربط عفشه معاها ولو عندك أي ملاحظات ، قلت له أنا بس عاوز أظبط الفوج لايت مع الدريكسيون بحيث يشتغل ويطفى مع حركة الدركسيون ، وأظبط gps ، وبالفعل الموضوع أخذ حوالى ساعة ونصف فقط وتم تظبيط الفوجات ولكن قال لى المهندس حاجه غريبه ، إن gps بتاع السكودا عموما مش شغال فى مصر ، لآن الوكيل فى مصر (أرتوك) ما إستركش ومش راضى يشترك فى الخدمه دي فى مصر ، يعنى المشكله مش فى الجهاز اللى فى العربيه ، المشكله فى الوكيل بتاع العربيه ، قلت للمهندس إزاي يعنى ، قال لي فى شركه إسمها أطلس هى المسئوله عن تقديم الخدمه فى مصر ، بيقوم الوكيل فى مصر بالتعاقد معاها ، وبالتالى بتقوم الشركه بإعطاء العملاء رقم أو كود يتم إدخاله فى الكاسيت وبالتالى يتمكن الجهاز فى السياره من إلتقاط إشارة القمر الصناعي ، أى يتم توليف الجهاز على القمر (زي الرسيفر) ، بس للأسف أرتوك مش عاوزه تقدم الخدمه دى لعملائها فى مصر (توكيل زي قلته) ، ونصحنى المهندس أشتري جهاز gps خارجي أحسن ، وما أحاولش أمش ورا الموضوع ده.
أما عن تقيمي لمركز الأقصي ، فممكن أعطيه 8/10 فى الأداء والخدمه والنظافه