موقف محرج ..!!!!!

**pendodo2002** · 22-05-2008 11:27 AM

هوا في مواقف كتير اوي
بس ابسطها و اقرب موقف (من كام شهر كدا)
واحد لقيته باعت للمنتدى اللي انا كنت فيه بتاع الكليه ان بنتو معرفش بتعمل عمليه في القلب ومحتاجه دم و فصيله دمها -b (سالب) ... المهم الموضوع ده عرفناه على 11 بالليل ... عملت انا و اصحابي في الكليه شوية اتصالات وعرفنا ان في بنك للدم اسمه البنك السويسري و اتصلنا بيه و اتأكدنا ان في دم (الكلام ده على الساعه 3 بالليل) .... المهم انا قلت اتصل بالراجل (اللي بنتو بتتعالج) ... لأ الوقت متأخر اوي ... بس انا هبعتله مسج على الموبايل .. لو صاحي اكيد هيرد عليا ... ولو نايم يبقا الصباح رباح ...
انا بعت المسج من هنا .. مفيش دقيقتين و لقيت واحد بيتصل تلات ارباع نايم او ضارب حشيش ... بيقولي دم ايه و سويرس مين (مش سويسرا) بقوله مش انتا اللي كانت بنتك عامله عمليه وعايز دم ... بنت مين و عمليه ايه يا زفت انتا مش شايف الساعه كام ؟؟ ... فقلتله الموضوع والقصه ... ده بدل ما يتضبط لقيته انفجر في وشي (اقصد في ودني) و هاتك يا شتايم من كل ناحيه من بدايه شجره العيله لحد اصغر فرع في الشجر و هوبا قفل في وشي ....
بس

**Nile_Storm** · 22-05-2008 11:31 AM

المشاركة الأصلية كتبت بواسطة محمد المشد

اية دة يا عم الشباب 000 دا كان الافضل انك تمشى حافى احسن ، وكمان بتشاور على القبقاب 00 جزاك الله كل خير 000 بش ياترى اللى سرق الجزمة مسبش حتى شبشب قديم 00 الله يسامحة فى اللى عملة فيك
بصراحة موقف صعب لاينسى
بجد مش هنسي الموقف ده ابدا

اصلي كنت لسه في سنه اولي ومن الخضه مقدرتش ارد فشاورت احسن

ياراااااااااااجل دا انا خدت القبقاب بالعافيه من عامل المسجد

**Ashraf A.Kader** · 22-05-2008 03:49 PM

اتصل بي احد اصدقائي ليعلمني بوفاة عمه الذي اعرفه وابنائه معرفة شخصية0فاتصلت باحد الاصدقاء وذهبنا معا بالسيارة للجنازة التي كانت تبعد عن القاهرة قليلا وفي الطريق توقفت السيارات فكانت فرصة لتعزية الابناء فترجلت من السيارة مع صديقي وسلمنا عليهم وفوجئت بالاخ الاوسط يناديني ب(خلود) فنظر الي صديقي ولم يعقب وفي السيارة اتفقنا ان الاخ الاوسط مصدوم من الوفاة وغير متذكر اسمي(رغم اننا عشرة طويلة)0وفي بداية البلدة وقفت السيارات ونزلنا للجنازة وكانت المقابر تبعد مسافة طويلة ولا يمكن دخول السيارات فقابلنا انا وصديقي الاخ الاوسط الذي بادرني بقوله(عامل ايه يا خلود لك واحشة يا راجل)طبعا خلود بشد اللام تصغيير خالد ففوجئت بصديقي والابتسامة علي وجهه وكادت الضحكة تخرج منه فابتعدنا بسرعة منعا للاحراج0بعد الجنازة دخلنا لصلاة المغرب بالمسجد وعند الخروجكان ابناء المتوفي يتراصون امام المسجد لاخذ واجب العزاء وكان الاخ الاكبر يقف بالمقدمة ويلييه الاخ الاوسط وصديقي خلفي فسلمت علي الاخ الاكبر ونادانب باسمي اكثر من مرة اثناء الحديث حيث لم نتقابل منذ فترة وهممت بالسلام علي الاخ الاوسط الذي بادر بقوله (منجلكش في حاجة وحشة يا خلود000طم طم طم)نظرت الي صديقي بجانبي لم اجده وانا وراه وطول الطريق حتي السيارة لم نتوقف عن الضحك حتي عدنا الي القاهرة

**Karim_Monir** · 22-05-2008 03:51 PM

المشاركة الأصلية كتبت بواسطة Nile_Storm

انا كنت في الكليه وعندي سكشن الساعه 2
المهم قلت ادخل اصلي
و للاسف الجزمه اتسرقت
طبعا ادور عليها مش لاقيها خالص
و السكشن معاده جه المصيبه اني كنت لازم احضر عشان رئيس القسم نازل

تخيلو منظري داخل السكشن متاخر و لابس قبقاب في رجليا
و المصيبه ان السكش سيراميك فماشي و القبقاب عمال يطرقع :) تك تك تك تك
و قاعد الدرس طويله وهما في اخرها
و ده بيزعئلي اتاخرت ليه ياولد
مردتش شاورتله علي القبقاب
و انفجرت ماسوره الضحك حواليا :) :)
بجد مش هنسي الموقف ده ابدا

نييييييييههههههههههه
عشان موقف مشابه للموقف المهبب بتاعك ده
اتعلمت اسيب في العربية كوتش خفيف كدة(اسبدرين)وتيشرت خفيف بكم وبنطلون برضه
ومطبقم ومابيتشالوش من العربية صيف شتاء عشان الطوارئ
نيييييهههههههه
قباب
هلكتني من الضحك وكنت هاتطرد من الاجتماع بسببك

**solycar** · 22-05-2008 04:31 PM

المشاركة الأصلية كتبت بواسطة Khalid_Mostafa

انا بقي ليه موقف مش حنساه ...انا ساكن في الدور 11 وكنت في اليوم ده قاعد لوحدي (مراتي كانت في المنصوره مع حماتي ) واهلي كانوا في الساحل الشمالي وقاعد بشورت و مش لابس حاجه فوق وخرجت بره الشقه عشان احط كيس الزباله وهووووووب الباب اتقفل عليا و انا من غير شبشب وبالنمظر ده !!! طب و العمل ؟؟؟ نزلت حافي في الأسنسير واستلفت من البواب تيشيرت و شبشب وكان منظري هوزؤ جداً ورحت لجاري في الشقه الي جنبي و اضطريت انط من بلكونه لبلكونه ...وتقريباً قدرت اعمل كده لأن الأدرينالين كان عالي جداً من شدة الإحراج ...بس حعمل ايه ؟؟؟

لالالالالالالالالالالا مش ممكن بجد
دة ينفع مشهد تليفزيونى

الموقف الوحيد اللى كان نفسى اشوفة
تحفة;):D

**MoToRiZeR** · 22-05-2008 04:44 PM

مرة كنت رايح الجامعة و انا ماشي عالدائري واحد كسر عليا كسرة وحشة اوي .. فا جريت وراه و جيت جنبه و رحت شاتمه شتيمة وحشة اوي .. ببص لقيته الدكتور اللي انا رايح المحاضرة بتاعته .. و اضطريت اعمل drop للمادة دي

الموقف التاني بقي عمري ما هنساه و كل ما افتكره اقعد اضحك

ده كان من 5 سنين ايام ثانوي .. كنت بكلم واحدة من التليفون المباشر في البيت علي موبايلها كتير .. فا جت في الفاتورة 550 جنيه مباشر و ابويا عمل كشف عالفاتورة لقاها معظمها لنمرة واحدة اللي هي بتاعتها .. في مرة بقي كنا مع بعض فا بتقولي النمرة دي بتتصل بيا بقالها 3 ايام واحد مش عارفة اعمله ايه .. فا انا خت الموبايل و متحمس بقي للبني ادم اللي هكلمه ده .. قاللي سلامو عليكم .. هي النمرة دي بتاعة مين؟ قلتله ليه و انت مالك انت ؟! قاللي يا استاذ اتكلم بإحترام .. انا النمرة دي جالي في الفاتورة بتاعتي مكالمات ليها ب 500 جنيه .. عايز اعرف مين صاحب النمرة دي .. و فجأة ابتديت استوعب الدنيا ماشية ازاي .. قفلت علي طول و قلتلها اوعي في يوم من الايام تردي عالنمرة دي خااالص !!

**PRO-DRIVE** · 22-05-2008 04:57 PM

المشاركة الأصلية كتبت بواسطة dehumanizer

مرة كنت رايح الجامعة و انا ماشي عالدائري واحد كسر عليا كسرة وحشة اوي .. فا جريت وراه و جيت جنبه و رحت شاتمه شتيمة وحشة اوي .. ببص لقيته الدكتور اللي انا رايح المحاضرة بتاعته .. و اضطريت اعمل drop للمادة دي

الموقف التاني بقي عمري ما هنساه و كل ما افتكره اقعد اضحك

ده كان من 5 سنين ايام ثانوي .. كنت بكلم واحدة من التليفون المباشر في البيت علي موبايلها كتير .. فا جت في الفاتورة 550 جنيه مباشر و ابويا عمل كشف عالفاتورة لقاها معظمها لنمرة واحدة اللي هي بتاعتها .. في مرة بقي كنا مع بعض فا بتقولي النمرة دي بتتصل بيا بقالها 3 ايام واحد مش عارفة اعمله ايه .. فا انا خت الموبايل و متحمس بقي للبني ادم اللي هكلمه ده .. قاللي سلامو عليكم .. هي النمرة دي بتاعة مين؟ قلتله ليه و انت مالك انت ؟! قاللي يا استاذ اتكلم بإحترام .. انا النمرة دي جالي في الفاتورة بتاعتي مكالمات ليها ب 500 جنيه .. عايز اعرف مين صاحب النمرة دي .. و فجأة ابتديت استوعب الدنيا ماشية ازاي .. قفلت علي طول و قلتلها اوعي في يوم من الايام تردي عالنمرة دي خااالص !!

عجيب الموقف التاني دا

**kimo-nubira** · 22-05-2008 05:07 PM

المشاركة الأصلية كتبت بواسطة Hossam_Hassan

أول مرة اروح اعزى فى حد، كنت فى اعدادى و كان والد احد زملائى بالمدرسة و زميلى ده كان أهلاوى متعصب أوى، و يوم العزاء صباحا كان ماتش للأهلى مش فاكر مع مين و الأهلى اتغلب، المهم و انا داخل على العزاء، عمال احضر الكلمتين اللى باسمعهم فى الأفلام، زى "شد حيلك" و "البقاء لله"، بس ساعة ما مديت ايدى فى ايده لقيت نفسى بمنتهى التلقائية بقوله "هارد لك يا أيمن"، الحمد لله مسكت نفسى بالعافية انى اجرى و دخلت العزاء و انا مكسوف قوى، قعدت ربع واحد و طلعت اجرى، و انا خارج حركت شفايفى من غير ما اتكلم.

لغاية النهاردة باتكسف كل ما افتكر الموقف، بس زميلى ده لو مكنش متعصب قوى و دايما بيتكلم عن الكورة، يمكن مكنش ده حصل

انا بارضو حصل معايا موقف شبه ده شويه كان فيه عزا ورايح انا وابن خالتي المهم ابن خالتي ماشي قدام وداخلين علي الناس اللي بتاخد العزا

وهوووووب راح ابن خالتي متلغبط وبدل ويقول البقاء لله راح قايلهم البقاء للاقووووووي

وانا طبعا رحت لافف ومن كتر الضحك رحت خارج بره ومدخلتش تاني كان موقف عمري ما هنساه وقعدنا نضحك انا وبن خالتي لغايه ماروحنا

**hazem_khidr** · 22-05-2008 05:25 PM

موقف بس مش معايا بس كنت طرف فيه.
كنت في فرح وحد صاحبي و ابن خالي معايا :party:
المهم في الفرح دا قابلت واحد زميلي بالصدفه و كان من اهل العروسه.
فواقفين بنتفرج انا و ابن خالي و زميلي
ففي واحده كانت بترقص
ف ابن خالي بيقولي ابنت دي بترقص حلو اوي
وا نا بغمزه و دا مش عاوز يسكت :):):wacko:

راح صاحبي قاله علي فكره دي بنت عمي !!!!!:boxing_smiley:
فابن خالي اتكسف و قاله انا مش قصدي علي دي انا قصدي علي اللي جنبها
راح صاحبي قاله اللي جنبها تبقي اختها هههههههههههه
حتت موقف كل ما نفتكره نضحك ضحك علي الكسفه

-

الموضوع: موقف محرج ..!!!!!

LinkBack

أدوات الموضوع

عرض

-

-

-

-

-

المواضيع المتشابهه

ايه أكتر موقف محرج حصلك فى حياتك ؟؟؟؟

سؤال محرج

ازاى اروح المنيل مواصلات من موقف العاشر او من موقف مسطرد

او حصلك موقف محرج معا مراتك او خطبتك

سؤال محرج جدااا

الكلمات الدلالية لهذا الموضوع

المفضلات

المفضلات

ضوابط المشاركة