الموضوع: عاوز اعرف هل في عيوب شائعة في البورا؟وهل في موديلات احسن من التانيه فيها؟

انا أسمع انها كوبي من الأوكتافيا a4 و بالنسبة للسعر تبدأ من 60 ألف و تتطلع حسب الحالة

السيارة لو دخلت مقارنات مع سيارات مماثلة مش هتلاقى قطع الغيار غالية (ميجان- مازدا 3 - بيجو 307).

عيوبها من وجهة نظرى:
- المقاعد الخلفية ضيقة جدا و لو انتا طويل ممكن محدش يعرف يعد وراكز بس فى مقابل كده عندك شنطة كبيرة مقارنة بحجم العربية.
- فى معظم العربيات الركبتها واء بورا او باسات قديم بيبقه فى صوت تزييق من التابلوه الأمامى و الأبواب (لما تيجى تشترى اقفل الزجاج و الكاسيت و امشى فى شوارع مكسرة شوية عشان تشوف الأصوات زيادة ولا ممكن تتعود عليها عادى),
- لو هتجيب الأوتو فالعربية مزعجة لبع الناس على السرعات (على سرعة 100 ك ال RPM بيكون 3200 لفة عكس عربيات تانية ال RPM مبجيبش 2500 لفة على سرعة 100ك) و طبعا مع تزويد السرعة ال RPM بيزيد. هى مش مشكلة اوى لأن مسمعتش ان المواتير ديه تعبت من كده بالعكس مواتير معمرة جدا و الصوت العالى لو فتحت كاسيت مش هتحس بيه اوى.
- المواتير ديه بتاكل زيت بسيط و ديه طبيعتها متقلقش (كنت سالت كذاحد على القصة ديه و اتقالى كده و فعلن موتورى كان حالة ممتازة و مفيش دخنة خالص و كان بياكل زيت حاجة بسيطة).

المزايا:
- سيارة ممتعة جدا فى سواقتها و مش فاهم ليه
- شكل مبيقدمش و ماظونش هبالغ لما اقول ان التصميم الخارجى احلا من الجيتاز
- لو السيارة عفشتها و كاوتشات و شاسيه مضبوط, هتلاقى ثبات ممتع جدا فى المناورات و على سرعات.
- توافر قطع غيار الاستيراد و الجديد بوفرة و بأسعار مناسبة مقارنة يالسيارات الذكرتها قبل كده.
- العربية نسخة محسنة من الأوكتافيا a4 موتور و عفشة و شاسيه واحد (كنت جايب مساعدين مونرو للأوكتافيا فى عربيتى) و تتميز عنها بجودة و شياكة الخامات الداخلية, مساعد لفتح الكابوت.

الاسعار تبتدى فعلن من 60,000 ج للمانيوال (بس أشك فى حالتهم) لغاية متوسط 70,000 ل 72,000 ج للحالات الجيدة و ده لغاية موديل 2002.

لازم تكشف على العربية كويس جدا فى عربيات انصاص كتير فى السوق و عربيات هلكانة.

العربية ديه بتتصنع فى المانيا لغاية م 2001 بعد كده فى اختلاف (تشيكى أو مكسيكى مش متأكد).