إيه اللي يحصل لو عكست كابلات البطارية ...

**graffittiii** · 21-11-2011 09:57 PM

_ صحيت م النوم صليت الصبح وفطرت (( خلص ياحبيبي أنت هتحكيلنا قصة حياتك )) المهم نزلت أدور العربية بعد 5 أيام من الركنة ...
Oops!!... البطارية نايمة وشادة اللحاف .......
الشارع صحرا مافيش حد يزق .... وبعدين أنا أساسا مابعرفش أرمي ...
روحت لواحد كهربائي ف الجوار ...
أنا : تعالي يابن بلدي أعملي توصيلة ودورلي العربية ...
هو : الورشة لوحدها يابيه والواد*#$%# بقاله سنة بيجيب شاي ومجاش بقاله ساعة ..خد الكابلات وبطارية وتعامل ..
أنا : مابعرفش أعمل الكلام ده ...... (( هو أنا شفتها كتير بس بشوفها دايما بتقعد تطلع شرز كده ف قلت بلاش أحسن )) ...
هو : ((ضحكة سخرية )) طيب أقولك علي حاجة مافيش أسهل منها ...خد البطارية دي وحطها مكان القديمة ودور وتعالي وانا أشحنلك القديمة ...
اه فكرة جميلة زي الفل أخدت البطارية ولسه همشي ...
هو : أستني يابيه ...
أنا : (( هو رجع ف كلامه ولا إيه يادي النيلة ))...
هو : هتفك الكابلات بإيه خد مفتاح (مش فاكر كام تقريبا 15 أو 13 )..
أنا:(( ياااه ...والله الدنيا لسه بخير ))...
المهم أخدت البطارية والمفتاح وروحت البيت ..
وبكل سهولة فكيت القديمة ... حطيت الجديدة ... بدور ... ولاالدموع ... مافيش نور ف التابلوه خالص..
شوية كده وببص لقيت .....
لامش هقولكم ...
اللي يعرف إيه اللي حصل له جايزة ربع ج علي أقساط شهرية ...
مع العلم أن بعد كده أكتشفت أني كنت مركب الكابلات معكوسة ....
سبحان الله كان شكلها ف نفس وضعية القديمة والله وف نفس الأتجاه ... يلا خير لايجدي البكاء علي الكابلات المعكوسة ...(( أبقي خدو بالكم كويس )) ...
سؤال الفقرة بقي ...
إيه اللي يحصل لو عكست كابلات البطارية ...
ملحوظة Don't try this @ home .......

**AHMEDCAR** · 21-11-2011 10:05 PM

اقل حاجه ضفيره او كنترول

**Elawany13** · 21-11-2011 10:20 PM

اكيد فيه اجهزة هتتحرق

**yoko** · 21-11-2011 10:27 PM

عملت كده في البونتو!!!!
ربنا يستر ومتكونش طيرت الecu

**Amr Axel** · 21-11-2011 10:49 PM

حبيب هارتي الله عليك اكيد ضميرك ده اللي اتكلم هو السبب
مش عايز احبطك بس النتيجة بتكون فيوزات او كومبيوتر او حساسات او دينامو
يا اما كلهم . يا حاجة منهم , يا حاجتين ..الخ..الخ انت و نصيبك بقي :(
يمكن يكون حظك حلو و مفيش حاجة تحصل الله اعلم

**ahmedhawas** · 21-11-2011 11:16 PM

ممكن فيوزات أو دينامو (كتاوت أو قاعدة سليكونات)
وممكن سلك القطاش الموجب يسيح
وربنا يستر عالكمبيوتر

**graffittiii** · 21-11-2011 11:21 PM

_ اللي حصل أن بعد ثواني كده من التوصيل لقيت دخان طالع من الدينامو وشوية فرقعات ف كابلات البطارية ....

كنت خايف أفك الكابلات أساسا من المنظر بقيت محتار أجيب الطفاية ولا أفك الكابلات وف الأخر قررت أفك الكابلات أصلي خفت لحسن البيت كله يولع ههههههه...

غمضت عيني وأتشاهدت وفكيت أول كابل وقبل ماأفك التاني لقيت الدخان اللي طالع من الدينامو وقف ...
إيه ده بجد ... يااه ربنا يخليك أنك وقفت دأنا هبروزك ف الصالة أنك ماموتنيش...
فعلا الدنيا لسه بخير ...

ف الأخير لما رحت للكهربائي وحكيتله ... بصلي كده والشيطان وزه أنه ياجرب تاني ...
ياعم يهديك يرضيك ... راسه وألف جزمة أنه يجرب ....
قلتله طيب بالتوفيق بقي سبته ووقفت بعيد ....
ركب الكابلات ودور العربية دارت ... !!!! ... ياراجل ...
الخساير بقي لغاية دلوقتي الدينامو غالبا باظ أو عاوز سيليكونات (( ده كلام الكهربائي ))...
دا اللي باين لغاية دلوقتي لسه مش عارف هيطلع إيه تاني ... هعرف بكره بقي وأقولكم بس أنا متفائل خير أنها طالما دارت يبقي ممكن تبقي بسيطة أن شاء الله وترسي علي دينامو جديد وخلاص ...
وفعلا لمبات الأنتظار شغالة علطول مابتطفيش ...

بس أحنا طلع معانا ناس جامدة جدا ف المنتدي ... توقعاتكم صحيحة يارجالة ...
بالنسبة للربع جنية الهدية .... forget all about it ....