تقرير صيانة ال 15000 للصني في السبع والمهندس ايمن عبد المتجلي
السلام عليكم ورحمة الله وبركاته
انا عارف ان انا مقصر كتير في المشاركات بس والله غصب عني وعارف ان انتو مش هتزعلو مني ودة بردو عشمي
النهاردة كنت في السبع زهراء المعادي علشان كنت بعمل كذا حاجة:
اولا :
امبارح وانا مروح علي الدائري الطريق كان صعب اوي وكان في حادثة علي الطريق والطريق واقف وفجأة لقيت تريلا بتريح علي الباب الخلفي شمال عندي...حمدت ربنا واسترجعت ومشيت ولما روحت البيت بصيت لقيت الباب مفعوص بس كنت شايف ان هي ممكن تتعمل علي البارد, المهم قررت اني اروح النهاردة السبع واشوف هيقولولي ايه وانا اصلا كدا كدا كنت ناوي اروح ليهم ودة علشان ثانيا اللي هتكتبها دلوقتي.
ثانيا:
من اسبوع من ساعة ما الموجة بتاعة البرد دخلت علينا وانا كل يوم الصبح الاقي المساعد الامامي شمال بيزيق في المطبات وبصراحة كنت متنكد اوي بسبب الموضوع دة وكنت خايف لحسن المساعد يكون ضرب ولا حجر والعربية لسة يدوب مكملتش 15000, المشكلة دي كانت بتظهر الصبح بس لكن باقي النهار مش موجودة ومرة ظهرت بالليل بردو بس الجو كان ساقع اوي يعني خلاصة المشكلة ان التزييق دة بيظهر لما يكون الجو ساقع ويختفي بعد اما ابدا اتحرك بالعربية والعربية تكون سخنت مش باردة
ثالثا:
كنت عايز اروح اعمل صيانة ال 15000
واليكم تقريري عن الزيارة :
روحت النهاردة للسبع زهراء المعادي ومكنتش حاجز بس بصراحة اللي شجعني اني اروح النهاردة هو اني افتكرت احمد مصطفي لما كان بيقول ان احسن وقت تروح التوكيل فيه هو يوم الثلاثاء في وسط الاسبوع علشان مش بيكون زحمة, وفعلا توكلت علي الله وروحت وكنت هناك الساعة 9:00 صباحا وقابلني واحد وقالي انت حاجز قولتلو لا قالي عايز تعمل ايه قولتلو سمكرة فوداني عند المهندس المختص بالسمكرة وقام بص علي العربية وقالي دي لازم تترش ,طبعا انا اكتأبت ,المهم سألت علي المهندس ايمن عبد المتجلي لان انا عارف انو ماسك قسم السمكرة والدهان وانا كنت اتعرفت عليه في المقابلة الخامسة للصقور في جريرة المعادي
المهم قابلت المهندس المحترم ايمن عبد المتجلي وبصراحة انسان اخلاقه عاليه اوي وذوق ومحترم جدا, راح بص علي العربية معايا وقالي ممكن اعملهالك علي البارد بس هيبان اثار بسيطة قولتلو مش مشكلة المهم اني مرشش العربية علشان حرام دي لسة جديدة قالي اطمن ومتقلقش بعد كدة في الاستقبال قولتلهم عايز اعمل صيانة ال 15000 بالمرة فرحت للمهندسة روؤي وبصراحة هي انسانة محترمة جدا وبتحسن استقبال العملاء , وحظي دايما اني بعمل كل مرة الصيانة عندها
المهم شرحتلي اللي هيتعمل في الصيانة وقولتلها علي مشكلة المساعد الامامي وقالت هنكشف عليه
كمان ادوني كوبون ب 15 جنيه علشان اخد بيه اي حاجة من الكافيتريا اللي فوق
المهم قالولي العربية هتخلص بعد 3 ساعات قولت طيب اروح شوية مشاوير وبعدين ارجعلهم ,بعد شوية لقيت المهندسة روؤي بتتصل عليا وقالتلي ان مشكلة المساعد هو ان كاوتشة التراب اتقطعت وسالتني اذا كنت عايز اغيرها ولا لأ قولتلها مش هي المفروض في الضمان ؟؟؟ قالت لأ . الكاوتشات كلها مش في الضمان .
وهنا انا عايز اقول حاجة : ازاي الكاوتشات متكونش في الضمان؟؟ وبعدين هي العربية يدوب مشيت 15000 كيلو يعني لحقت تتقطع ؟؟؟ اعتقد نيسان ايجيبت لازم نحاول نوضح لها انه مينفعش تكون كل الكاوتشات مش في الضمان وبعدين لو الكاوتش دة مصري يبقي المفروض يجيبو نوعية افضل شوية
المهم قولتلها غيري الكاوتشة بتاعة التراب
الساعة 12 اتصلت ب المهندسة روؤي وقالتلي العربية خلصت وروحت عليهم علطول علشان استلم
والحمد لله لقيت الباب اتسمكر كويس بس باين فيه حاجات بسيطة اوي ودة طبعا علشان السمكرة كانت علي البارد روحت علشان ادفع الفاتورة
المهندسة روؤي قالتلي ان البطارية كانت محتاجة مياه فزودوها وقالتلي ان المهندس ايمن عبد المتجلي عملي خصم علي اعمال السمكرة وبصراحة كانت مفحأة لانو خصم كبير
فشكرا جزيلا يا بشمهندس ايمن علي زوقك وعلي كرم اخلاقك
ودفعت الحساب واستلمت العربية والحمد لله المهمة تمت علي خير
واسف علي التطويل
والسلام عليكم ورحمة الله وبركاته
