مساعده في كبوت ال 128 (البطاريه اتسرقت )

**khaled_bibo** · 28-11-2011 12:54 AM

بسم الله الرحمن الرحيم

قدر الله و ما شاء فعل

امبارح كنت نايم و صحيت على صوت جارتنا بتخبط و تقول ان في بتاع 15 عربيه بطاريتهم استرقوا

يادوب سمعت الكلمه نطيت من على السرير و نزلت بفتح الكبوت مالقتش البطاريه

و مش عاوز اقولكوا الواحد نفسيا عامل ازاي مش عشان البطاريه نفسها عشان حاجة اتاخدت

غصب عنك

روحت سألت على اسعار البطاريات لقيت الكلورايد السايله ب 320 جنيه!!!!!!!!!!!!!!!

و الجافه نوع اسمه bendex كان ب 450 جنيه !!!!

و اللي اتسرقت كنت جايبها نوع اسمه Marchtelli كانت ب 300 جنيه (كانت احلى حاجة في العربيه و الله ) يوم 2/1/2011 و

مكملتش سنه سبحان الله يعني الحرامي هيبعها بب 50 جنيه و يجبلوا حتتين بانجو و يحرق دمي انا بس

دلوقتي عاوزكوا تفكروا معايا في حل لكبوت ال 128 عشان البطاريه متتسرقش مع استبعاد الاتي

1- فكرة جنزير حوالين البطاريه عشان جاري كان عملها في 128 برضه و كسروا السلسله و خدوا البطاريه ( و العربيه كانت متغطيه كمان !!!!!!!)

2- فكرة الانذار عشان برضه موقفتهمش

3- فكره الجراج عشان انا عندي جراج تحت بيتي و سيبت العربيه مره قبل كده فيه و الفيران اكلت الفرش و السلوك و اتبهدلت عشان اعملهم

و معلش طولت عليكوا بس حبيت افضفض لأني جايب اخري

**Mostafa.Mahran** · 28-11-2011 01:08 AM

انا علشان البطارية لسه جايبها جديدة و بصراحة خايف عليها فاول حاجة اتاكدت من اللسان الى بيقفل الكبوت يكون مظبوط و بيقفل كويس و تانى حاجة عامل على البطارية قفل حديد + و مربوط بمسامير جامد من تحت و تالت حاجة انا اساسا حاطط العربية فى الجراج

**khaled_bibo** · 28-11-2011 01:10 AM

المشاركة الأصلية كتبت بواسطة eng.m mahran

انا علشان البطارية لسه جايبها جديدة و بصراحة خايف عليها فاول حاجة اتاكدت من اللسان الى بيقفل الكبوت يكون مظبوط و بيقفل كويس و تانى حاجة عامل على البطارية قفل حديد + و مربوط بمسامير جامد من تحت و تالت حاجة انا اساسا حاطط العربية فى الجراج

الفكره ان مهما عملت في الكبوت بيتفتح هما ليهم طريقتهم

**Mostafa.Mahran** · 28-11-2011 01:15 AM

هى الفكرة كلها انك بتحاول تاخر موضوع السرقة يعنى الحرامى ياخد وقت اطول و هو بيسرق الحاجة و ده على أمل ان ممكن حد يشوفه او حد يكون معدى ولا حاجة

وربنا يستر و يعوضك خير فى البطارية