الموضوع: صيانة ال5000

رحت امبارح صيانة ال5000 فى غبور اسكندرية .. عربيتى فرنا 1600 .. العربية كانت عاملة 4400 .. وصلت متأخر جدا حوالى الساعة الواحدة والنصف ظهرا .. وقفت فى الطابور لحد ما جاء دورى .. العامل قام بتغليف الدركسيون بالسوليفان ولبس للكرسى كيس بلاستيك .. وجاء المهندس يشوف طلبات الزبون ايه .. قلت له خد عندك اولا بتحدف يمين لدرجة انى بافضل شادد ايدى على الدركسيون ناحية الشمال لحد ما ثوجعنى .. شوف حجم الحدفة اية وعلى فكرة دى برضة حاجة غريبة ان عربية جديدة وتبقى محتاجة زوايا .. انا مش فاهم لية .. ثانيا بعد ال110 بتبدأ تغربل معايا .. ثالثا وانا داخل على شارع غبور الصبح الكلاكس قطع لوحده ليه ماعرفش . رابعا الموتور على السرعات صوته عالى شويه .. اخد منى العربية وقال لى تعال الساعة خمسة ونصف .. اخدت بعضى وقعدت اتسكع يمين وشمال لحد الساعة اربعة ونص .. رجعت التوكيل وقعدت مستنى شويه لغاية ما لقيتها هاله عليا كدة زى العروسة قلت له كله تمام قال تمام .. اخدت الورق وقرأته لقيت انه جاى جنب الغربلة والترصيص وعامل علامة غلط فسألته ليه قال لى اصل الغربلة اتلغت لان الجهاز بتاع الترصيص بايظ .. الساعة بقت خمسة ونص والوقت اتأخر والدنيا اسودت قدامى اول ما قال لى الجهاز بايظ .. قلت له وبكل هدوء انا مش ماشى من هنا الا لما العربية تتصلح .. وحسيت باحساس المهندس المسكين من رعب الموقف لانه قرأ الغضب فى نظراتى .. ومش عاوز احكى لكم عن نظراتى لان الوقت ما يسمحش دلوقتى .. المهم قال لى بص حضرتك المدير بيصلى وجاى حالا وبيتدور وراه لقاه جاى قال لى هو ده ابو قميص ازرق .. دخلت عليه وبكل ادب وذوق قلت له الموضوع كذا كذا وانا سعادتك مش ماشى .. قال لى هما قالوا لك ان الجهاز بايظ وراح سايبنى وقعد ينادى على مش عارف مين .. المهم قال لى عربية سعادتك دى قلت له ايوه راحوا واخدينها ودخلت على الجهاز وسبحان الله تم ترصيص العجلات والجهاز اتصلح وطلعت .. وانا مش فاهم حاجة ولا عاوز افهم حاجة كل اللى كنت عاوز افهمه انى اخد العربية وامشى .. وعلى فكرة حاسبونى على فيوز الكلاكس وعلى التلرصيص وعلى ضبط الزوايا بالاضافة الى 145 جنيه مصنعية صيانة ال5000 وكل عام وانتم بخير .. احلى ما فى الموضوع ان الجو كان متكهرب وكل شوية واحد ييجى جنب ودنى ويقول لى هو فيه ايه .. ما اردش عليه وابرق له .. يقوم ياخد بعضه ويمشى .. الى لقاء اخر مع فيلم قاهر الاقزام مع صيانة ال 1000 ان كان فى العمر بقية .

خلاص ياصاحبى ماتزعلش نفسك .. يعنى لو عاوز تضبط زوايا مثلا او اتزان اكتر من مرة بتعملها ببلاش طول فترة الضمان يعنى 3 سنين او 50000 كيلو متر .. والله دى حاجة حلوة قوى .. ولا فى الاحلام

لا طبعا ... الحاجات دى مجانا فى صيانة الالف بس (مش عارف فى صيانة الخمسة كمان ولا لأ) ....لأن العربية بتكون لسة ممشيتش لكن بعد كدة بيعتبر عيب استخدام.......ولا انت رأيك اية؟