اقتباس المشاركة الأصلية كتبت بواسطة more_try2 مشاهدة المشاركة
متابع
ويا ريت حد يفهمنا ايه الفرق بين الزيت التخليقى والزيت المعدنى وايهم افيد للماتور واعرفه ازاى وانا بشترى
انا هحاول اقول لحضرتك خلاصة اللي قريته في الموضوع دا .. ويارب افيدك وتكون اجابتي شافية وسليمة ..
الزيت المعدني اساسة الزيت المستخرج من عمليات تكرير البترول وبيتم اضافة اضافات لتغيير اللزوجة مع درجة الحرارة واضافات تنظيف المحرك واضافت تشتيت الرواسب بحيث ما تترسبش على اي جزء في المحرك واضافات منع الأكسدة يعني منع احتراق الزيت بدري ..
أما الزيت التخليقي فبيتخلق 100% في المعمل وبيضاف اليه نفس الاضافات
اللي بيفرق في اسعار الزيوت المعدنية هو كفاءة ونوعية الاضافات عشان كد بتلاقي في حاجة اسمها تصنيف مستوى الخدمة .. يعني اعتقد اقصي درجة كفاءة ممكن تلاقيها على عبوة زيت معدني هي sl وال s يعني لمحركات البنزين وال l هي مستوى خدمة الزيت وكل ما الحرف دا يكون متأخر في الابجدية يكون الزيت أكفأ وأغلى ويعمل كيلومترات اكتر

الزيت التخليقي بيبدأ بمستوى خدمة sm واعتقد في يمكن نوع او نوعين في مصر مستوى خدمتهم sn زي بعض زيوت ليكوي مولي ..

كدا عرفت مستوي الخدمة .. تعالي بقى لدرجات اللزوجة
اي اي زيت تشترية لازم يكون متعدد الدرجات يعني مكتوب عليه بالشكل دا sae 20w-50 مثلا
والرقم الاقل بجانب حرف ال w اختصارا ل winter يعني معامل اللزوجة في درجات الحرارة المنخفضة يعني درجة حرارة الجو اللي بتكون درجة حرارة الزيت وقت تشغيل السيارة وهي لسه باردة .. اما الرقم الاعلي هو معامل اللزوجة تقريبا عند 100 درجة مئوية ..

يقال ان المحرك اللي مشى ميل بالزيت المعدني كأنة مشى خمسة اميال بالتخليقي .. يعني الزيت التخليقي بيحافظ على المحرك لغاية 5 مرات اكتر..

ليه ؟ لان التخليقي بتكون درجة لزوجتة في البرودة اقل بكتير هتلاقي مكتوب على العبوة 5w-40 ,, 0w-50 اما المعدني فاعتقد انه اقل درجة فيه هي شل الاصفر 15w-50 اما الشائع لدرجة تغيظ هو زيوت 20w-50
وبسبب كدا فالتخليقي بيحمي المحرك لحظة بدء الدوران والسيارة باردة لان لزوجتة اقل فبينتشر بسرعة حوالي 3 ثواني وبيكون خفيف على طلمية الزيت اما المعدني فيقال ان بياخد 20 ثانية لغاية ما يقدر يوصل لكافة الاجزاء بيكون فيهم حديد على حديد وتاكل و80% من تآكل المحركات بيحصل وقت التسخين ..
نسيت اقول ان في زيوت نصف تخليقية بتكون تقريبا بينهم يعني في 10w-40 مثلا..

الزيت المعدني على حد علمي فممكن تمشي بيه مسافات من الف واحد ل 5 الاف كيلو حسب جودته ودرجة خدمته

الزيت التخليقي بيوصل ل 10 الاف كيلو وفي ناس بتقول 15 الف وطبعا سعرة ضعف او اكتر شوية من سعر المعدني بس لو حسبتها هتلاقيه اوفر وأأمن ..

أما بقى السؤال الملحمي انت تقدر تستخدم ايه فهو دا المشكلة
اولاً مفروض تشوف كتالوج سيارتك موصي بأيه في الغالب هيكون مديك مستوى خدمة متقلش عنه انما لو زدت فأفضل
كمان بيديك تصنيفات اللزوجة المناسبة لمحركك طبقا لدرجات الحرارة في بلدك ..

ثانياً وهو الأهم : يقال ان لو المحرك مشى كيلومترات كتيرة اكبر من 100 الف مش بينفع معاه التخليقي لان الخلوصات او الفراغات اللي بين اجزاء المحرك وسعت بفعل التاكل البسيط مع الزمن ولو حطيت زيت تخليقي لزوجتة قليله هينقص بسهولة بالرغم من انه هيحمي المحرك اكتر وهتضطر تزودة او تنزلة بدري عن ال 10 الاف كيلو او ال 7 الاف كيلو حسب درجة الامان اللي انت عايزها
فكدا جدواه الاقتصادية فاشلة انما لو المحرك مش بينقص زيت وحالته جيدة فحرام لو مستخدمتش زيت تخليقي
ظهر دلوقتي زيوت بيطلق عليها high mileage او زيوت المحركات اللي قطعت مسافات طويلة جداً زي زيت هولندي اسمه فالفولين ماكس لايف نصف تخليقي ب 190 جنيه بيقولو انه مصمم للمحرك الي قطع مسافات طويلة لان فيه ملطفات لاجزاء المحرك اللي ممكن تنشف مع الوقت وتسرب زيت فيعتبر كعلاج

انا عن نفسي العربية عاملة 312 الف كيلو ماشاء الله واتخذت قراري المتهور واشتريت خلاص زيت شل الترا التخليقي ب 240 جنية وهغيره مع الفلتر ( لان تغيير الفلتر واجب ع تغيير نوع الزيت عن اللي كان فيه ) وهشوف الموضوع لو مشى معايا كويس يبقى انا الكسبان لو ممشاش يبقى جت على قد القلوس !!
اتمنى اكون أفدت :)