تجربة فلتر k&n مع سيفيك الجيل الثامن
صباح الخير على احلى عصابه
انا كنت ركبت فلتر K&N الداخلي زي بتاع الفابريقه اول ما استلمت العربيه ولاحظت تحسن في الاداء بس عشان العربيه كانت في التليين الموضوع ماكانش فارق جامد و بالمناسبه السيفيك بتحتاج وقت طويل يمكن يوصل ل7000 كم عشان تحس انها حفظت وده السبب ان الواحد كان حاسس ان العربيه سحبها عادي بس بعد كده الدنيا بتتحسن
المهم عملت حوالي 15000 كم من غير ما انضف الفلتر قلت اعدي على عادل وجدي اعمله صيانه واول ما الفلتر ما طلع جالي حالة ذهول من كتر الوساخه اللي شبه الشحم اللي مغطيه الفلتر لدرجة الواحد استغرب ازاي العربيه كانت ماشيه و بتسحب
المهم تم عمل اللازم من تنضيف و غسيل وتزييت و بالمناسبه اشتريت cleaning kit من حماده غزي امبارح ب 165 جنيه عشان اعمله بنفسي و اوفر الفلوس و المشاوير خصوصا اني مركب نفس الفلتر في عربية المدام الكورولا
النتيجه بعد خمسه ايام تجربه
تحسن ملحوظ في السحب و قل احساس النقلات و مافيش delay بين النقلات و تجميع على اقل rpm فمش محتاج تسقط نقله برجلك كل شويه لدرجة ان الواحد طفي الكاسيت عشان يستمتع بصوت الموتور وهو عمال يزيد مع كل لمسه بنزين و نعومه في الاداء و متعه في السواقه
وانا حبيت انقل تجربتي عشان انا عارف ان كل ملاك الجيل التامن بالذات بيخافوا على الضمان بس الفلتر الداخلي ما بيخرجشي العربيه من الضمان وانا سألت بنفسي في التوكيل ولقيت مهندس الضمان مركبه في عربيته
وعلى فكره الفلتر ما بيتغيرش عشان كل مره بتنضفه بيرجع جديد يعني يعتبر ارخص بكتير على المدي الطويل من بتاع التوكيل اللي بيتغير و هو تمنه 415 جنيه
