الفكترا بتاعة زميلي كيفتني على الاخر ! !
السلام عليكم ورحمة الله وبركاته
النهارده الصبح وانا رايح الجامعة زميلي كلمني قالي تعالى معايا نروح مع بعض
قلتله زي الفل
هو معاه فكترا B 2000 cc
مش عارف موديل كام بس تقريبا 2000
هو معدل في العفشة ومركب جنط 17 الى غير العتب والكلام ده فالعربية تقيلة وسحبها تقيل شوية والتجميع بتعها يعتبر عادي على الرغم من انها 2000 cc
بس في الثبات بسم الله ماشاء الله اللهم لا حسد
كنا ماشيين عادي جدا على دايري اكتوبر (الدايري اللى بيبدأ من اكتوبر ومربوط بعد كدة بالوصلة بتاعة المريوطية)
الدايري ده من نحية اكتوبر للي بيمشي عليه عارف انه بيبقى 3 حارات بس وملفاته رخمه الى غير انه اغلبه ترلات
المهم ماشيين مش في دماغنا حاجة وماشي على سرعة 140 - 150 (في اتجاه اكتوبر كنا خلاص قربنا ندخل على دريم بارك)
وكان زميلي سعتها بيتكلم في الموبايل
عدى من جمبنا سيراتو طاير وصوت ماتوره ماشاء الله
زميلي مش في دماغه واصلا بيتكلم في الموبايل
السيراتو بعد شوية بقى الفرق مثلا بتاع خمس ست عربيات والفرق بيزيد لان زميلي مش حارق وماشي عادي
وبرضوا زميلي بيتكلم في الموبايل ومش في دماغه حاجة ولا حتى انا والله بس مجرد ان صوت ماتوره والجري اللى بيجريه لفت انتباهي
المهم السيراتو دخل على الملف (نور الفرامل طلع والعربية هدت)
دخلنا الملف على سرعتنا (140-150) وطرنا من جمب السيراتو :bye:
وطبعا زميلي مازال بيتكلم في الموبايل ومش في دماغه اي حاجة نهائيا
انا بصراحة المنظر ده كيفني بطريقة غير عادية ! تدخل الملف على سرعتك من غير حتى لمسة فرامل واحدة بسم الله ماشاء الله ربنا يباركله في عربيته
منظر السيراتو واللى راكبنها واحنا بنطير من جمبهم في الملف كان فعلا منظر صعب :majd(4):
بنعدي من جمبهم وسط نظارات ذهول من اللى راكبنها ! !
اول ماصاحبي قفل الموبايل قلتله انت معلم ولقطة جامدة اوي لان بجد المنظر كان تحفة واحساسه جامد اوي
قالي مالك فيه ايه ؟ قلتله انت ماخدش بالك من اللى حصل من شوية ؟ قالي مانت شايفني بتكلم في الموبايل ؟
حكتله على الموضوع وقالي عادي يا معلم بتحصل كتير
وفعلا اول مالطريق بقى مستقيم صوت ماتور والسيراتو جاي طاير عايز ياخد بتاره
لكن ماحطناش في دماغنا وسبناه يطير مع نفسه :bye:
طبعا مش بحكي الموضوع ده عشان قصد حاجة او مثلا اقلل من السيراتو لا سمح الله
المقصد كله اني كذا مرة لقيت ردود من اصحاب الاوبل بيشتكو من سحبها وانها تقيلة
فاحب اقول ان دي ميزة وبجد نعمة انك تكون راكب عربية انت مطمن وانت راكبها :x1[1]:
واي عربية هتعلم عليك سحب مع اول ملف هتسلم عليها وتقولها مع السلامة :bye:
وفي نفس الوقت كاتب الموضوع عشان ناس كتيييييييير بتقول على عربيات زي الفانتزيا والجيتا ضعيفة في السحب وتجميعها على قدها
صحيح ان تجميعها على قدها بس مع اول ملف قدااااااااااااااااااااااا ااااااااااااااااااام
المهم ان اللقطة دي كيفتني على الاخر وفضلت متكيف لحد ماوصلت الجامعة :ilikeit: :ilikeit:
ربنا يباركله في عربيته ويباركلكم كلكم في عربياتكم :x1[1]: