الموضوع: تقرير عن تركيب عازل حراري لصني 2010

ماتيجوا نشوف الفكرة جت ازاي ..

بص بقى يا سيدي .. الفكرة جت من عربية أوبترا خليجي جاية من السعودية .. ده عربية واحد صاحبي معمول فيها عازل حراري اسمه Zipert
.. المهم كنت بركب معاه كتير في عز الصيف .. وألاقي العربية مش سخنة ولا حاجة .. السخونية بس من الازاز اللي قدام عشان مش مركبه فيه .. العربية كانت تحفة بسبب العازل ده .. المهم اجي اركب عربيتي الاقيها نار الله الموقدة .. ولعةةةةةةةةة .. استنى 5 دقايق كده عشان تبرد .. المهم اتخنقت قوي من الموضوع ده .. قلت أما أقلده .. سألته عملته بكام .. تخيلوا قال لي ايه .. 2500 ريال .. قلتله ازاي أُمّال لو عملت اللي قدام كان هيبقى بكام قال لي 3000 .. قلتله شكرا .. يا ريتني مسالتك هههههههههه .. المهم نيست الموضوع ده اسبوع كده ..

المرحلة التالية ..

كنت رايح المعادي .. لقت محل اكسسوارات مكتوب عليه تركيب عوازل حرارية .. قلت الله واكبر .. قلت اسال كده بكام .. لقيته بيقولي 300 جنيه .. قلتله بجد مكنتش مصدق السعر طبعا ارخص بكتير من بتاع صاحبي .. قلتله ايه فرصة سعيدة وهجيلك بعدين .. بصراحة مكنش معايا فلوس ساعتها هههههههه ..

شوفوا بقى الصدفة البحتة ..

ماشي أنا في أمان الله في شارع كئيب كده اسمه شارع التوفيقية .. شارع زحمة مووووووت .. أمة لا اله الا الله هناك المهم .. قلت اخرم من الزحمة ده .. لقت واحد بتاع فاميه وعوازل حرارية .. بيبيع الرولات نفسها .. وسألته إيه الفرق قال لي رول الفاميه بيبقى رقيق قوي .. لكن رول العازل بيبقى سميك جدا وبيديك درجة فاميه .. قلتله بكام الرول قالي بـ 40 جنيه .. قلتله هات تلاتة عشان العربية كلها بـ ورا وقدام .. طبعا الحساب كان 3 رول بـ 120 جنيه ..

التركيب ..

قبل ممشي من عند بتاع العازل قال لي ممكن تركبه عدي عند أي واحد بتاع فاميه .. رحت رايح عند واحد صاحبي بتاع فاميه قلتله عايز اركبه .. تخليوا التركيب خد قد إيه .. 4 ساعات .. كله بسبب الازاز قدام وورا .. صعبين جدا .. بس مخدش مني ولا مليم تركيب .. وحلف ميت يمين ما هو واخد ولا مليم ..
المهم اتراكبه الحمد لله ..

طبعا التكلفة كلها 120 جنيه + 5 لتر بنزين + شحططة هههههه = 130 جنيه بدل 3000 ريال ..

تجربة العربية ..

العربية بقت ما شاء الله تحفة ..

أولا.. شكلها بقى شبابي قوي بسبب الفاميه ..

ثانيا.. بقيت باوقفها في الشمس عدي من غير قلق ..

ثالثا.. التكييف بقى اداء تحفة لإن مابياخدش وقت للتبريد ..

العيب الوحيد .. الازاز اللي قدام لإنه مغيم .. وبالذات بليل .. فعشان كده ركبت لمض اقوي Orsam Night Breaker Plus

احب تكون تجربتي عجبتكم ..
تحياتي للاخوة ..