الموضوع: كـان يامـا كـان ... قصـــــــة التيــــــــدا علــى مــر الزمــان

حكاية الامير تيدا سيدان بلس 2009

ظهر فى مصر الامير تيدا فى عصر 2006
وكان تواجده قليل جدا .. لعدم الاستعانة بباقى افراد المملكة التيداوية من نيسان اليابان

الى ان جاء الامدادت من المملكة الام لتطوير وتعزيز مواصفاته
وزاد تواجده فى موديلات 2009
وابتدء بفرض سيطرته فى السوق مصرى

وقد حدث بالفعل
وكان تقيمى للامير سيدان
كالاتى

:: تقيمى الشخصى والشرح الوافى ::


فى البداية احب اوضح حاجة مهمة جدا وهى:

انا من ملاك التيدا , و ححكم بالعدل والله وبكل حيادية وحقول اللى انا عشته وشوفته فى العربية ومعاها عشان الكلام ده حتحاسب عليه قدام ربنا

واللى مش مصدقنى يجى وانا فرجه العربية واخليه يجربها عشان يصدق الكلام اللى حكمت بيه

وكمان الحمد لله انا فكيت العربية حتة حتة .. فشوفت خباياها الحمد لله

:: الشــكل والتـقفيل ::

* الشكل العام للسيارة اقدر اقول جيد وشكله برستيج اكتر منه جمال .. واهم حاجة عندى انى اركب عربية من الداخل وتريحنى فى القعدة وفى الاداء .. لان فى الاخر بعد الشكل لما يبهرنى .. وبعدين !! .. ما انا هزهق منه وحدور على اللى جوة .. سبحان الله .. زى التعامل مع الانسان .. اللى يهمك اللى جواه مش مظهره

بالنسبالى شيك لسبب لان حاسس زى ما قولت ان الشركة اهتمت بالفخامة والبرستيج الخارجى على حساب حلاوة الشكل

* من ناحية التقفيل ممتاز جدا وتحس بتقفيل يابانى محترم فى الموديل اللى معايا .. وحتى التقفيل المكسيكى الجديد مش وحش يكاد الفرق طفيف مش محسوس

* الخامات المستخدمة فى الفئات االاولى خامات جيدة جداا ومحترمة وفى الفئات الاعلى البلس نجد الجلد الطبيعى موجود فى كل الاماكن فى السيارة وداخل فى تقفيلها .. وبصراحة تقفيل العربية سواء الصالون او الماتور حاجة محترمة بجد

:: الوسع والارتفاع ::

* تتميز فئة الهاتش باك بصالون واسع وتعتبر اوسع سيارة هاتش باك فى كل موديلات الهاتش باك

* تتميز السيدان منها بالوسع والقعدة المريحة فى الكنبة الخلفية

* العربية مرتفعة من الارض وتحس انك ماشى مطمن ومرتاح جوة السيارة

ولا تحك فى مطب ولا الكلام ده .. واملاها براحتك اى اوزان ولا الدموع

* القعدة فيها روعة بسبب ارتفاع السقف والوسع الداخلى للسيارة والقعدة فيها مريحة جدا للارجل .. وكمان الراحة فى الدخول والخروج من السيارة ..

* تعليقى بالنسبة الى كراسى العربية .. كراسى السيارة من الكراسى المريحة جدا فى تنجيدها وفى قعدتها .. ومش متعبة ابدا على المسافات الطويلة او القعدة الطويلة لفترة .. والكلام ده بشهادة كل ما ساق التيدا .. وايضا بشهادة احد اصحاب المحلات المشهورة فى تركيب فرش السيارات

* مساحة الشنطة فى التيدا السيدان 467 لتر وواسعة وارتفاعها معقول عشان تقدر تحط الشنط براحتك وميكنش الشنطة ضيقة من حيث الارتفاع .. ودى طبعا ميزة كويسة جدا

* وكنبة التيدا السيدان الفئة البلس بتقسم الى تلت وتلتلين .. وده بيساعدك عشان تحط فيها اى حاجة فيها اطوال

* تتميز الفئة العالية من الهاتش باك كما موضح فى الصور السابقة بان الكنبة الخلفية بتتحرك الى الامام فيتم إنزلاق المقعد الخلفي وازاحته بمقياس 240 مم , وبذلك يحدث اتساع للشنطة الخلفية ودى ميزة جميلة جدا

* الكراسى قابلة للتعديل لراحة الركاب فيمكن إمالة المقعد الخلفي ب-40 درجة .

* الطابلوه التطعيم اللى فيه على شكل نيكل شكله تحفة بجد وشيك من الداخل , والتطعيم موجود على الاوكر من الداخل وعلى الفتيس وعلى الطابلوه وشكله شيك جدا وده موجود فى الفئات العالية طبعا

* من مميزات فرش التيدا ان الفرش سهل تنظيف جدا وخامات محترمة على سبيل الميثال زى السقف .. قماش .. تقدر تنظفه بسهولة جدا

:: اماكن التخزين فى التيدا ::

* ده اللى بتتميز بيه عن اى عربية اخرى فى فئاتها .. اماكن التخزين عديدة ..
حيث فى الابواب الامامية اماكن تخزين عديدة وايضا فى السقف جراب النظارة وايضا فى المخدع والكنسول اللى فى المنتصف بين الكرسين الامامين فى اسفله مكان للتخزين

* وفى عكس اتجاه المخدع الامامى فى الخلف ايضا مكان للتخزين يقابل الكنبة الخلفية عشان لتخزين مثلا الجرائد او ماشبه ذلك

* يوجد ايضا اماكن للتخزين فى الابواب الخلفية ومخدع خلفى وسط الكنبة فيه حامل اكواب

* الدرج الامامى الرئيسى الكبير وبداخله لمبه

:: وسـائل الامان ::

* العربية فيها استندر فرامل abs,ebd,ba وفرامل ادائها قوى ويسعف فعلا وعن تجربة فى مواقف كتير

* حزام الامان بنظام الشد

* يوجد بالعربية نظام الايموبليزر .. وهو نظام امان ضدد السرقة .. وهو فى حالة دخول السيارة بطريقة غير شريعة .. عن طريق كسر الزجاج او تدوير العربية باى مفتاح غير مفتاحها الاصلى العربية بتفصل ومتشتغلش

* العربية بسم الله ماشاء الله صاجها قوى وبدليل فى ناس عملوا حادثة بيها على سرعات 100 ودخلوا فى حاجز اسمنت خرسانى .. والكابينة سليمة

:: التكيف شكله وادائه ::

* تتميز التيدا بقوة التكيف , ونقدر نقول عليه تلاجة

* الفئة الاعلى البلس هى اللى بتتميز بوجود تكيف اتوماتيك , بتقدر تظبط درجة التبريد على درجة اللى انت عايزه مثلا "20 " وتسيبه وهو لما يوصل للدرجة دى مروحة التكيف فى الصالون بتفصل وبتهدا وبيقل درجات المروحة .. واقل درجة للتكيف 18

* اهم ميزة فى تكيف التيدا انه مش بياثر على سحب العربية , وبتقدر تعمل كيك دون وتعيش حياته وبقوة كمان وفى مرة وانا راجع من اسكندرية وصلت الى 180 ومشغل التكيف

* استهلاك البنزين عادى مع استخدام التكيف مش شرس ولا حاجة

* التيدا يوجد بيها فلتر للتكيف استندر و مكانه فى درج الطابلوه

:: الاضاءة والفوانيس ::

* تتميز التيدا بفوانيس كبيرة وتوزيع النور فيها على الارض جيد جدا واضائة قوية سواء من الخلف او من الامام

* تتميز التيدا بوجود حساس اضاءة داخلى على الطابلوه , والحساس ده وظيفته عشان لما تدخل نفق او جراج بالنهار وانت مش مشغل اضائة العربية , بيشغل نور الطابلوه على طول اتوماتيك عشان الاضاءة الداخلية للسيارة تشتغل , وبمجرد ما تخرج من النفق بيطفئ تانى على طول ,

* نور الصالون اللى فى المنتصف الصالون فى فئات بلس , لما بتخرج من السيارة وتقفلها بيتقفل بالتدريج ,

* الاضاءة الداخلية على الطابوه والعدادات شيك ومريحة للعين جدا

* نور الصالون للقراءة اللى قدام عند المرايا , قوى جدا ايضا

* طبعا بردوا يوجد اضائة داخل درج الطابلوه

* حامل الاكواب اللى فى المنتصف لمبة بتنور عليه

* زراير الزجاج الكهرباء جنب السائق كلها بتنور

* الفئات الاعلى البلس تتميز بجود فوانيس ضباب .. والفئات من 2011 الى الان بينزل كل فئات التيدا بفوجات اساسى

* يوجد اضاءة فى شنطة العربية

:: استهلاك البنزين ::

* استهلاك البنزين فى التيدا رائع جدا , وتعتبر التيدا من افضل العربيات ال1600 سى سى فى استهلاك البنزين وده راجع الى وجود بوجيهات بلاتنيوم , فبتساعد على تحسين الاستهلاك للافضل طبعا , وبتتغير عند ال100 الف

* القراءات اللى كاتبها دى فى حالة ظبط الكاوتش على المقاسات المطلوبة .. وسواقة هادية جدا .. وكمان يكون كل حاجة مظبوطة فى العربية .. يعنى العربية متكونش داخلة على صيانة واحكم على اداء البنزين .. لان ممكن يكون فلتر الهواء عاوز يتغير او العربية عاوزة تتظبط على جهاز الكمبيوتر عشان لو كان فى حاجة غلط .. يعنى من الاخر كل حاجة تكون تمام

* فى استهلاك البنزين مش بتخذلك .. اللى بيخذلك هو السواقة العنيفة والزحمة المميتة.. وعدم الاهتمام بالعربية فى الصيانات

:: تقييم العربية فى الاداء ::

* فى المناورات غرز على120 وبشهادة كل اللى ركبوا معايا ومنهم اعضاء فى النايل موتورز شهدوا على الكلام ده ثابتة ..

* على الملفات ثابتة واخدت ملفات بيها على 100 ولا الدموع

* الدريكسوين باور كهرباء وممتاز فى التعامل والاداء ومش خفيف لدرجة القلق اللى الناس بتتكلم عليه فى العربيات الكورى , بعد ال120 بيتقل على السرعات وبحس بيه وكلامى عن تجربة وكمان عن تعود .. وغير كدا لما سالت فى التوكيل هل حد جه واشتكى ان الباور بيفصل والكلام الفارغ ده .. قالولى فى عربيات بتعمل صيانة 300 الف ومفيش مشكلة فى الباور خالص لغاية دلوقتى جتلنا .. ولا شكوى

وسؤالى عن الباور الكهرباء عشان اطمن كان فى كل مراكز الخدمة .. والاجابة واحدة .. ولا شكوى .. ده غير تجربتى معاه

* العربية بسم الله ماشاء الله على الكيك دون بتعها , مخفيف وقوى جدا , اول ما تدوس عليه وتضغط جامد , تلاقى الواحد لذق فى الكورسى ورجع لورا واخد وضع استعداد الطيران ههههههههههه , وتلاقى العربية نطرت واندفعت الى الامام بقوة جبارة .. بصراحة تسارع العربية ممتاز وقوى

* صوت الماتور للعربية ناعم ولا حتحس بيه ابدا الا بعد سرعة 130 وبردوا صوته مش مزعج اوى

:: قــطع الغيــار ::

* قطع الغيار متوفرة داخل التوكيل جدا واسعارها مش غالية زيها زى قطع غيار العربيات الكورى فى التوكيل ويمكن ارخص منهم حاجة بسيطة كمان

* قطع الغيار منتشرة بره التوكيل فى محلات كثيرة فى شارع دمشق و فى الحرفين بكثرة .. سواء جديد او استيراد او انصاص منها كمان

وفى موضوعات فى القسم عن اسعار قطع الغيار فى التوكيل وخارج التوكيل للافادة وللتاكيد

:: عــزل العربيـة ::

* الاصوات الخارجية .. ولا تسمع دبة النملة اكنك فى وادى اخر

* الماتور .. صوت الماتور مش مسموع ابدا لغاية 130 والصوت بيكون مسموع ولكن مش بازعاج ابداااا

* عزل العربية من الاسفل الحرارة .. لا يوجد اى سخنية من الشمكان او الماتور توثر فى الصالون نهائى

* عزل العربية المياه والصدا .. العربية من الاسفل معزول عزل تام وكامل ببلاك اللى بيستخدم فى المراكب فى المياه .. والعزل منتشر فى اسفل العربية فى اماكن كثيرة على عكس نيسان صنى .. لان العربيتن كانوا مرفوعين قدامى وشوفتهم من تحت

* العربية فيها عزل حرارى فى صدر العربية من انحية الماتور ومن ناحية الصالون ورا الطابلوه

:: عيوب التيدا 2009 ::

* بخصوص السيدان ارتفاعها على قد ما مريح جدااا من على الارض بسبب المطبات وايضا وسعها من الداخل وارتفاع سقفها الا وانها بعد سرعة 140 بيقل الثبات .. وذلك للارتفاع العربية .. ولكن استجابة ماتورها وتجميعه عالى فى السرعات .. وهى تحتاج بالفعل الى جنوط 16 .. وبالنسبالى مش مهم ابدا السرعات العالية .. مهم عندى الراحة فى القعدة ووسع العربية .. لان كل فين وفين بجرى بالعربية ..

* الاكصدامات الخلفية ضعيفة من الاجناب

* لا يوجد فيها مرايات ضم فى كل الموديلات كان نفسى يكون فيها مرايات ضم

* زرار ظبط المرايا بعيد عن متناول اليد .. وده حال وتصميم كل سيارات نيسان مش التيدا .. ولكن بتتعود بعد كدا عليه .. بس كان يفضل انه يكون جنب منطقة زراير الزجاج الكهرباء

* الولاعة محطوطة فى مكان اسفل الكنسول اللى فى النص فبضطر ترجع ايدك لورا شوية