بسم الله الرحمن الرحيم
أنا شوفت ان فية ناس حاجزة يوم الثلاثاء والخميس القادميين فقلت انبههم للطريق
زى العنوان مبيقول طريق المغامرات ودى تسمية ابنى
بيتدى بالمدخل، هتمشى من غير مشاكل لحد اول مطب صناعى ثم تبداء المغامرات،
هتلاقى فجأة الشارع تحول من اسفلت إلى رملة صحراوى مع طوب وتكسير، هتجمد قلب وتخش وتكمل،
بعد 100 متر هتلاقى العقبة التانية ...... طريق يمين وطريق شمال، وطبعاً كلنا نفضل نكون من اهل اليمين علشان لو طلع مقفول هيطلع عينك فى طريق الشمال.
حد فاهم حاجة
لأ
كويس
هما حفرين نص الشارع بعرض 3 متر وسايبين زيهم يمين وشمال الحفر علشان الى رايح والى راجع، ولكن (وآة من كلمة لكن) بما أنهم فى مصر ومفيش تنظيم بيستخدما الحارة اليمين – السليمة نسبياً – علشان ينقلوا رملة او طوب وطبعاً الحارة الشمال تتحول بقدرة قادر الى اتجاهين ويبقى يومك اسود – زى محصل فيا – لما يجى فى وشك تريلا وعايز يعدى وشايف انة استنى كتير وانت ترجع.
بعد 500 متر هتخلص اول مرحلة حفر وتخش فى الى بعديها على طول – من غير رحمة ، والمرة دى الحفرة بعمق 2 متر على الاقل وتمشى وانت باصص قدامك ومتبصش جنبك لحسن تدوخ J
بعد 100 متر حتى الان لم تحفر وان كان جارى التجهيز لحفرها على معاد الحجز بتاعكم.
واخر 100 متر وتكون وصلت لأوتو ايجيبت
انا بنصح تأجيل المشوار لحد الحفر ميخلص وانا هبلغكم فوراً.
واحد هيسأل فية طريق بديل، ايوة فية، تخش اكنت رايح مودرن موتورز وبعد ماتعدى البوابة بتاعتهم تخش يمين فى شارع جانبى صغير وتكما طوالى ثم يسار ثم يمين هتطلع عند مدرسة بريلبانس تقوم داخل شمال عكس العربيات وربنا يستر وميكونش فية تريلات فى وشك.
السبب تركيب كابلات كهرباء علشان المحطة الى بتتبنى فى اول الشارع، ايوة الى على ايدك الشمال الى التكسير بيبتدى من عنها.
راجع الفيديو دة للطريق الداخل
والصور دى للطريق وانت خارج
وهنا الاسفلت طبقتين واستك
اما دة مفش محتاج تعريف ربنا يحفظنا منة، لسة فية واحد منة داس راجل وموتة قدام المدرسة النهاردة، على حسب الى شاف الحدثة ان كان ماشى بسرعة!!!
وقدامك حبيب الملايين الغلبانين فى الطريق دة "لودر الشركة" – وهو المسيطر على الوضع وكفيل انة يكرهك فى نفسك وفى عربيتك لو السواق بتاعة مكنش عادل الطاسة عدل.
ودى الرملة الى ممكن واحد رخم يدخلك فيها، ابقى اعمل حسابك على دروس فى الغرز، قدامى نص نقل غرز والسواق كان غشيم فضل يفرك فية لحد مفرقع.