الموضوع: مشكلة فى الفيفورت 94....*

عندي نفس المشكله في الفليشيا شد علي وش السلندر

السلام عليكم
الموضوع ده لاحظته عندي في فيليشيا 97 من فترة وهو وجود قطرات مياه في زيت المحرك (تظهر بوضوح فعلا في غطاء الزيت)، وقمت بشراء علبة مادة مالئة للشقوق لسد التسريبات وتعويض أي جوان متآكل، وكان تم تجربتها سابقا في إلانترا وفي بي إم دبليو، وبفضل الله الموضوع إلى الآن (بعد قطع حوالي 1500كم) لا توجد مشاكل والقطرات اختفت من الزيت... ولعموم الفائدة والنصح اشتريتها من محطة توتال بمبلغ 32ج.م وموجودة أيضا في محطة موبيل بحوالي 40ج.م وهي عبار عن عبوة بيضاء بلاستيك بها سائل قوامه غليظ وشبيه بعصير الفراولة! العلبة مكتوب عليها heavy duty engine block seal وهي ماركة gunk والغطاء مبرشم. وللإستخدام رج الرجاجة جيدا وتكون منقص مياه الردياتير مش القربة بس قبل التشغيل ودي حاجة مهمة جدا !!!!! لازم يكون الردياتير ناقص عشان معندناش في السكودا غطاء ردياتير ولازم المادة تكون جوة الردياتير عند التشغيل،،، فحضرتك تفضي القربة، وتفضي مياه الردياتير بفك الخرطوم السميك الخارج من أسفل القربة للردياتير وتنزل من المياه... وبعدين تركب الخرطوم بإحكام وترج العبوة وتصبها في القربة ووراها المياه بالتالي المادة هتكون دخلت الردياتير ومعاها المياه وتشغل المحرك (لازم يكون بارد) والعربية واقفة لمدة بسيطة ويكون غطاء الردياتير (القربة) مفتوح لطرد أي وجود للهواء وإكمال الدورة السليمة مع متابعة الحرارة وترك المادة لتدور في المحرك كله... وبصراحة التعليمات بتقول بعد ربع ساعة ممكن تفضي الردياتير وتحط مياه جديدة، لكن بصراحة من التجارب باسيب المياه بالمادة ولغاية النهاردة وبفضل الله محصلش نقص للمياه أو سخونة أو تسريب ولا يوجد نقاط في الزيت. آسف جدا للإطالة بس حبيت أنصح، وممكن الموضوع يتحل بتكلفة بسيطة وبدون فك وتركيب وإصلاحات.

المشاركة الأصلية كتبت بواسطة sakr1964

الله عليك ياكبير جزاك الله خيرا....* اخى انا فعلا بعت مع صديق لى كان مسافر الى القاهرة واشتراه من محطة موبل ب34 جنية بس ليا استفسار بعد ما ادور العربية والمادة بداخل الريداتير اترك السيارة فى وضع الدوران كد ايه؟؟؟؟ ولا اخلى السائل يدور ولما يرجع فى القربة ابطل؟؟؟؟ وممكن ادور العربية وامشى بيها مشوار كبير ولا اسيبها فترة من الوقت ....*

السلام عليكم
بإذن الله تجربتك تنجح وعربيتك ترجع زيرو من غير فك ولا ربط... المهم هو الإلتزام بالخطوات الآتية:
1- تفتح الكبوت وتقول بسم الله
2- العربية لازم تكون باردة خالص، يعني تكون راكنها من بليل مثلا والتجربة في الصباح
3- تحضر جنبك شوية حاجات عشان متتلبخش زي جركن مياه أو اتنين، ومفك عشان تفك خرطوم الردياتير وتربط، وعلبة المادة،
(((( قبل ماتدور العربية)))
4- تيجي على قربة المياه بتاعت الردياتير تلاقي تحتها خرطوم تخين نازل منها متجه للردياتير تفكه خالص وتنزله لتحت لغاية ما تفضي المياه.
5- تركبه مرة تانية بإحكام
6- ترج علبة المادة رجا جيدا....
7- تفتحها وتفضي المادة كلها في قربة الردياتير وتدور العربية وخلال 3 ثواني تكون واقف جنب القربة وبتفض الجركن اللي معاك في القربة
8- هتلاقي طبعا المادة اتسحبت مع المياه للردياتير.. وإياك متفضيش الردياتير الأول لأنك لو معملتش كدة هتفض المادة في القربة ومش هتخش قي الردياتير ومش هتدور في الموتور ونعجن وتنشف وهتدوخك.
9- بعد إضافة المياه للمنسوب الطبيعي (( متملاش القربة على اآخر)) وده الطبيعي.
10- سيب الغطاء مفتوح والعربية دايرة على السلانسية لمدة 5-10 دقائق حسب حالة الجو مع متابعة مؤشر الحرارة لأن لازم العربية تسخن كويس والمادة عملة تدور مع دورة التبريد.
11- إغلق غطاء القربة جيدا بعد التأكد من منسوب المياه مظبوط وإن مفيش هواء في الدورة
12- بالنسبة لي مغيرتش ولا فضيت المياه اللي فيها المادة لغاية اللحظة دي، بس العبوة مكتوب عليها إنك تفضي المياه وتحط مياه جديدة، وبالنسبالي الموضوع مفيهوش مشاكل لأن الموضوع ده عملته قبل كدة في عربية إلانترا وسيبنا المياه برضه عادي.
13- إتحرك عادي بعربيتك مع ملاحظة الحرارة، وتاني يوم تكشف على مياه القربة وشوف المشاكل السابقة انتهت أم لا!!!
وربنا يوفقك وأنا تحت أمرك