الموضوع: عيوب فيلوستر 2012 تجربه شخصيه veloster problems 2012

السلام عليكم ورحمه الله وبركاته
انا يسعدني اني اكون اول من يبدا بالنقاش حول عيوب فيلوستر في المنتدى ودي اول مشاركه ليا واتمنى اني افيد ناس كتيره عندها تساؤلات عن عيوب العربيه دي.

انا اشتريت اعلى فئه منها وتكلفتها 165 الف جنيه وكنت مبهور جدا بشكلها وفعلا شكلها ملفت جدا جدا والاوبشن الي فيها بس للاسف مسالتش عن عيوبها كويس... كل اللي لقيتو عنها على النت مواصفات فيلوستر او تقرير فيلوستر في حين ان مفيش حد اتكلم على عيوب فيلوتسر

اتحركت بالعربيه من المعرض واتصدمت بالعفشه الناشفه جدا في ابسط الحفر اللي في شوارعنا بس العفشه كانت مش طبيعيه حتى لو كانت ناشفه عشان الجنوط بقيت اقول ازاي عربيه تنزل بالعفشه دي... عرفت بعديها ان العجل لازم يتظبط وبالفعل ظبط العجل على 30 نيتروجين ولكن الفرق مش كبير بعديها... لما كنت باخد حفره بالغلط وتكون حفره بسيطه كنت بسمع صوت بيوجعني انا اكتر من العربيه.

تاني يوم كنت ماشي على الدائري الفجر والطريق فاضي قلت اجرب اجري بيها... العربيه ثبات تام في السرعه والكيرفات في الطرق النظيفه...فجأه لقيت نفسي باخد مطب هواء واستغربت جدا من اللي حصل... لقيت نفسي فارقت الكرسي تماما وراسي خبطت في السقف والدريكسيون اتحرك مني من غير قصد وقتها... هديت سرعتي خالص وبقيت مزهول من اللي حصل اللي عمره ماحصل معايا في الجين 2 مثلا... واتكررت الحركه ده اكتر من مره على سرعات من 100 ل130 وكل اللي قاعد معايا في العربيه خبطو في السقف خصوصا اللي كان قاعد ورا الخبطه بتبقى اقوى... انا في اليوم ده رجعت للمعرض وجه واحد يتمن العربيه وهيا ماشيه 600 كيلو جابتلي ساعتها 150 الف لقيت نفسي هخسر 15 الف + 7400 تامين (تامين غبور) قررت اني اسيب العربيه معايا شهر او اتنين وبعدين لما اجي ابيعها هتتباع بنفس السعر.

يومين بعديها وكنت ماشي في طريق وخدت حفره من غير ما اشوفها اصلا وده بسبب كرسي السائق وتصميم العربيه بيخليك مش شايف حوالي 2 متر قدام العربيه + العربيه اللي بتكون قدامك فانت مش شايف الطريق خالص... لازم تسيب مسافه كبيره بينك وبين اللي قدامك لما بعمل كده بلاقي العربيات بتكسر عليا
المهم ان في الحفره دي الفردتين اليمين فرقعو... طبعا وقفت العربيه وقلت اتصل بالتامين يجيب ونش وده اللي كنت اعرفه عن تامين غبور قبل ما ادفع الفلوس اتفاجت ان رقم المسؤول عن التامين مغلق فقلت انا هتصرف وخلاص نزلت الاسبير وخدت الفرده لبتاع الكاوتش بعد شارعين.... كنت احدف الفرده في الشارع واقعد اجري وراها هههههههه المهم الراجل قلي الفرده دي باظت ومتتصلحش لأن القطع كبير وانا شفتها بنفسي رحت جبتله الفرده التانيه قال نفس الكلام المهم حط شمبر للعجله عشان اعرف اروح البيت... وبالفعل العربيه وصلت البيت والعجله نامت علطول.

العربيه بقت مركونه تحت البيت مبتتحركش وبدات قصتي مع التوكيل والتامين ورحله عذاب تانيه. اللي كنت اعرفه عن تامين غبور ان الونش مجانا وبيطلبو محضر اذا كانت التكلفه اكتر من 5000 جنيه المهم كلمت المسؤول وحكتلو على اللي حصل قالي معرفش وروح قليوب قسم الهياكل اسال هناك. مش واخد باله ان العربيه واقفه مبتتحركش وان المفروض ونش يجي يشيلها ولما بقولو كده بيقولي بنس اللفظ: اعملك ايه روحلهم!... رحت قليوب قالولي هناك انك هتدفع تمن الونش ولازم تعمل محضر واللي عرفتو كمان ان العجل مش موجود في مصر ولا في التوكيل ولازم اسيب العربيه اسبوعين في التوكيل! في حين ان المسؤول المفروض ميقوليش روح اسال في قليوب ويقولي التفاصيل دي كلها في التليفون ويوفر عليا مشوار زي ده عشان اعرف تفاصيل مش اكتر!

اذا كانت الشركه منزله العربيه من غير قطع غيار ومعندهاش مشكله ان العميل يسيب عربيته اسبوعين في التوكيل وهيا لسه جديده... فالموضوع مش سهل طبعا عليا ولا على اي عميل اعتقد.

المهم انا ريحت دماغي ورحت اشتريت الفردتين اردئ نوع الفرده الواحده ب700 جنيه ومشيت بالعربيه يومين كمان بالظبط ولقيت فرده تانيه ظهر فيها بلونه (من الفرد القديمه بتاعت العربيه الاصليه) بقيت مدايق جدا وريحت دماغي برده وجبت فردتين كمان وبقيت ماشي ب4 فرد جداد... خدت العربيه من بتاع اشرفكو مدينه مصر للمهدنسين نزلت من العربيه لقيت فرده من الجداد ظهر فيها بلونه!!! كلمت الشركه وعملت شكوى وحكيت اللي حصل وقالتلي هنرد عليك في خلال 48 ساعه والرد جه بعد 4 ايام ودي مش حاجه بسطه انه يقول للعميل كلمه ومنفذهاش! ولقيت الرد على الشكوى انهم هيكلموني تاني في خلال يومين يقوليلي اذا كانت هتدخل في التامين ولا الضمان. مش فاهمين ان المشكله مش في العجل انما دي حاجه في العربيه نفسها ايا كان عيب في الجنط او العفشه. انا ساعتها مقدرتش امسك نفسي ورحت للتوكيل في ابو رواش وحكيت مشكلتي كلها وكان طلبي ان العربيه دي مش لازماني في حاجه وعايز فلوسي... طبعا الكلام ده اترفض تماما والحل كان انهم هيشتروا العربيه مني مستعمله بسعر كويس واخد بدلها اي عربيه هيونداي ( انا قولت ابقى ابيع العربيه دي زيرو لاي معرض قبل ما تعلق نمر) رحت تاني يوم عشان كان الوقت اتأخر.

لقيت عميل معاه نفس العربيه راكن بره ومركب الاسبير وداخل يسال... المهم خدو العربيه يفحصوها اكتر من 4 ساعات ولقيت الراجل اللي بيقيم العربيه جاي يقولي العربيه هينزل في تمنها عشان راشه كبوت!!! انا سمعت الكلام ده وفجرت فيهم كلهم وعليت صوتي لغايه ما طلعت للمدير ولقيتهم بيقولولي ان العربيه هنخدها ب 145 الف!!! وهبقى مجبر اني اخد من عندهم هيونداي واتصرف في بيعها وكده قمت مروح ورحت بعتها لتاجر ب145 امبارح والحمد لله اني خلصت منها... اتفاجئت من حاجه تانيه وانا بلف على المعارض لقيت العربيه في منها كتير بيتباع كسر زيرو...انا كنت مبسوط جدا جدا لما بعت العربيه اكتر من فرحتي لما اشتريتها... فقلت لازم اعمل موضوع في اسرع وقت.

ده غير كان عندي مشكله بسيطه ان فتحه السقف بتطلع صوت وهيا مفتوحه.
ونسيت حاجه مهمه تانيه ان العربيه بتعوم لوعديت على اي حاجه بسيطه في الطريق (طوب او اسفلت زياده او اي حاجه من اللي بنشوفها في شوارعنا)

انا شايف ان العربيه كويسه جدا بس مش في مصر! للاسف التوكيل مش طالب مواصفات في العربيه تتناسق مع بلدنا. التوكيل كل اللي غيره في العربيه عن اللي بتنزل بره انه شال السماعات المحترمه وحط سماعات عاديه وشال الكاميرا الخلفيه وال GPS وقلل الهورس باور... طبعا عشان الجمارك بس اعتقد انه المفروض يبص على حجات تانيه اهم.

انا كنت شاري عربيه ب165 الف جنيه ومتوقع اني هبقى في قمه الرفاهيه بس للاسف خسرت وقت وبهدله وفلوس!

ياريت يا جماعه الي معاهم العربيه دي يشاروكو معانا في الموضوع وكل واحد يقول اللي المشاكل الي قابلتو عشان نفيد الناس كلها