كنت حموت على الدائري لدرجة نسيت اني دكتور

**Ahmed A Rahman** · 05-12-2011 05:01 AM

المشاركة الأصلية كتبت بواسطة abouleila

كان الله فى عونك فى موقف زى ده
وانتى بتحكى شايف الشريط قدام عينى ...منظر بشع
لو كنت ادخلت فى الموضوع مكنتش هتفيد بقدر ما هضر
انت حسيت ان الموت بيجرى وراك ...وانت بتجرى من قدامه

زى ما قال شهدى طلع حاجات كتير لله مش حاجه واحده بس
طبعا لا اتغديت ولا اتعشيت لحد دلوقتى هههههههه

وحياتك وانا راجع دخلت كارفور وقعدت اشتري في حاجات مش محتاجها عشان معديش من الحته دي ثاني
ودخلت الامارات مصر قعدت افول العربية وبعدين روحت

ببص على الناحية الثانية (اللي انا كنت فيها الصبح) لقيت 4 عربيات نقل لابسين في بعض مع ميكروباص في الحارة الشمال (وخابطين في الجزيرة اللي في النص) !!!!!!!!!!!!!!!!!!!!!!!!!!!!!!

حادثة ثانية في نفس الاتجاه !!!!!!!!!!!!!!!!!!!!!!!!!!!!!!!!!!!!

المشاركة الأصلية كتبت بواسطة pro_samir

لا حول ولا قوة إلا بالله .. حمد الله علي سلامتك

حصل مع والدي حاجه زي كده في طريق الغردقه للصعيد علي ما أذكر وكان متحرك مع اتوبيسات السياحه تبع شغله أيامها ، بيمشو كلهم ورا بعض بسرعات عاليه وهو كان ماشي جنبهم في الشمال و قدامه عربيه بيجو 7 راكب ..

شاف في المرايه اتوبيس مرسيدس الكبير 50 راكب mcv جاي وراه من بعيد وحس بقلق ميعرفش سببه .. ربنا ألهمه لقي حته فاضيه بين الاتوبيسات في اليمين راح محشور فيها .. الكلام ده علي 120:140 تقريبا مش فاكر .. خد يمينه والاتوبيس ده عدي منه ركب علي البيجو بسرعته فعصها في الأرض زي علبة الصلصه .. بيقولي العربيه اتساوت بالأرض وطرشت دم يمين وشمال منظر بشع .. وغالبا سواق الاتوبيس ده كان نايم

ربنا يحفظنا جميعا

يا ساتر يا رب غالبا هو ده اللي حصل النهارده

**nono533223** · 05-12-2011 06:05 AM

الحمد لله علي سلامتك فعلا لازم تطلع حاجة.....ولا حول ولا قوة الا بالله

**tutankhamoun** · 05-12-2011 06:21 AM

و بعدين في الدائري الملعون ؟؟؟؟؟؟؟؟؟؟؟؟؟؟
الواحد يعمل أيه بس ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟
سواقين أهمال على الأخر (ملاكي و نقل و كل الأنواع )
و مفيش شـــــــــــــــرطـــــــ ـــــــــــــــــــــــة

فين اللي ماسكين البلد يحمونا من نفسنا (علشان أحنا خلاص معندناش تمييز للصح و للغلط )

حرام اللي بيحصل على الطرق ده (موتى بأرقام خزعبلية - خراب للأقتصاد القومي - خراب للسياحة "حوادث اتوبيسات السياحة اليومية" )
لازم نشوف حل أو يشوفوا حل

و الحمد لله على خروجك من الموقف ده سليم معافى

**Dr_Mido** · 05-12-2011 06:33 AM

المشاركة الأصلية كتبت بواسطة tutankhamoun

و بعدين في الدائري الملعون ؟؟؟؟؟؟؟؟؟؟؟؟؟؟
الواحد يعمل أيه بس ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟
سواقين أهمال على الأخر (ملاكي و نقل و كل الأنواع )
و مفيش شـــــــــــــــرطـــــــ ـــــــــــــــــــــــة

فين اللي ماسكين البلد يحمونا من نفسنا (علشان أحنا خلاص معندناش تمييز للصح و للغلط )

حرام اللي بيحصل على الطرق ده (موتى بأرقام خزعبلية - خراب للأقتصاد القومي - خراب للسياحة "حوادث اتوبيسات السياحة اليومية" )
لازم نشوف حل أو يشوفوا حل

و الحمد لله على خروجك من الموقف ده سليم معافى

اتفق معاك و الاهم كمان صيانه الطريق المعفن دة

اللى بيطلعو طلعه دائرى المنيب باتجاة اكتوبر فى كميه نقر و حفر و مطابت هوا و اسفلت عايم غير طبيعيه اساسا للى ميعرفش مكانها هيلبسها طريق عاوز الحرق

**Dr_Mido** · 05-12-2011 06:34 AM

الف الف سلامه يادكتور والحمد لله على رجوعك بيتك سالم من مقبرة السيارات اللى اسمها الدائرى

**prisoner** · 05-12-2011 08:15 AM

لا اله الا الله سيدنا محمد رسول الله انا لله وانا اليه راجعون موقف مريب جدا وسبحان من له الدوام انا بصراحة مش مصدق من هول المفاجاة والقدر اللى خلاك تدخل يمين وانت عارف ومتاكد انك غلطان بس سبحان الله علشان قدر حد تانى وقال انا اللى زعلان كنت جاى امبارح من واجب عزاء من شارع الهرم والطريق وانا رايح كان زفت جدا وتعبت من السواقة وانا راجع كان صلاح سالم كان فاضى تقريبا وقولت اعوض الوقت اللى اتاخرته جامد حوالى ذهاب فقط ساعتين ونصف من شيراتون للهرم وبعد نفق الملك الصالح لقيت نقرة او حفرة مش عارف ايه دى رزعت العربية من ناحية اليمين رزعه جامدة وحاسس انا جت فى قلبى وزعلت جدا ومتنكد خايف يكون حصل حاجة فى العفشة او الجنط او الكاوتش كلهم اغلى من بعض عندى بس الحمد لله والشكر لله والف حمد الله على السلامة يا دكتور واظن انت كنت متماسك فى الموقف ده ممكن غيرك كان ميحطش منطق وربنا يرحم كل الناس اللى اتاذوا بسبب الحادث الاليم وربنا يستر طريقنا لا حول ولا قوة الا بالله

**kar!m** · 05-12-2011 08:51 AM

حمد لله على سلامتك يا دكتور .. موقف صعب فعلا.

أكيد انت كنت قايل الأذكار :-)

**zocor742** · 05-12-2011 09:12 AM

الحمد لله ربنا كتبلك عمر جديد
اى حد مكانك على الاقل كان هيفقد الوعى لو اعصابة ضعيفة
لازم حضرتك هتحس بزهول ومش هتقدر تستوعب الموقف
حمدلله على سلامتك واشكر الله كثيرا