مشكلة فى تويوتا كورولا موديل 94

العربية عندى تويوتا كورولا موديل 94 مانيوال . كانت بتدور من تانى او تالت مرة و تمشى طبيعى و كانت مخنوقة و بتبطل على الغيار التانى . المهم روحت لواحد ميكانيكى و فكينا البوجيهات لقيت اللى كان فيها فرنسى غيرته و جبت بتوع التويوتا الاصلى . و فكينا الكربراتير و لقينا فيه فونيه بتاعه عربية فيات غيرتها بردة بالاصلى بتاع التويوتا .
المهم مشينا مشوار واحد العربية سحبها بقى تمام قوى بعد كدة لقيت دخنة سودا من الشكمان رجعت للولد تانى لقيت بردة فى رجه فى العربية مش حلوة كدة المهم فكينا الكربراتير تانى لقينا الابرة بتاعته محشية وساخة لان اللى كان قبلى ( صاحبها السابق ) كان بيمشيها على بنزين 80 . المهم نضفنا الابرة و مشينا نجرب لقينا العربية بتعمل فرقعة زى الموتوسيكل كدة فى بداية الغيار التالت .
المهم الحمد لله اتعملت و الراجل ظبطها شوية و جربتها لغاية الـ 150 و الحمد لله مفيش فيها اى مشكلة .

جيت ادورها النهاردة الصبح دارت بعد رابع او خامس مرة . و بصراحة مبقيتش عارف دة من ايه و المارش بتاعها تدوريته تمام و سريعة ادوس بنزين بردة مش راضيه استنيت شوية و بعد كدة طولت فى التدوير لغاية م لقطت يدوبك ادوس بنزين تروح مبطلة .
بعدها بكام ثانية كدة دورت و طولت شوية دارت عادى و مشيت تمام قوى الحمد لله . نفسى اعرف ايه المشكلة دى و حلها ايه .!