الموضوع: الياريس والجيتا على طريق اكتوبر ! !

المشاركة الأصلية كتبت بواسطة ashouhdy

الجيتا كانت بتتنطط قدامى على محور التعمير فى اسكندرية و عربية بطة اوى فى الجرى و متسخنش سويق المفروض

بص كثبات بصراحة بعد الكام غرزة اللى الواد لطشهم العربية ثابتها عشرة على عشرة

كسحب انا كنت عارف انها من 0-100 بطيئة لكن كتييير اوي اسمع انها فوق ال 100 حاجة تانية ! ومكنتش بصدق بصراحة لانه كان كلام ناس اغلبها مش معاها العربية وبتتكلم بمنطق ان الالماني بطي في الطلعة وده عادي وبعد ال 100 بيجمع !

لكن اللى شفته النهارده مافيش تجميع بعد ال 100 ولا حتى بعد ال 150 ! !

المشاركة الأصلية كتبت بواسطة wshawky

هى المقارنه بين العربيتين محسومه طبعا للجيتا زى ما حضرتك قلت من ناحيه و المقارنه بين اللى كانوا سايقين العربيتين محسومه برضه و هو ده اللى فرق فى الاخر و نصيحه بلاش شد و جرى بالطريقه دى لانه خطر جداً و مالوش فايده و الطرق ما يعلم بيها الا ربنا و المفاجآت كتيره من بلاعات و حفر و ناس ماشيه عكس الاتجاه و حاجات تانيه كتير و ربنا يسترها علينا جميعا .

طبعا الجيتا كعربية ماينفعش تتقارن بالياريس كعربية

لكن كسحب برضوا مافيش مقارنة والياريس تكسب سواء فوق ال 100 و تحت ال 100

المشاركة الأصلية كتبت بواسطة ahmed1006

Ahmod بقولك ايه دلوقتي انا معايا كورولا2004 والجنط الي فيها بتاعها الاساسي الي هو 14 والكوتش برضه المقاس الصغير الي بتنزل بيه والثبات بعد ال 110 مقلق بصراحة خصوصا اني ببقي لوحدي والوزن خفيف تفتكر لو غير الكاوتش فقط لمقاس اعرض الثبات يتحسن ولا لازم اغير الكاوتش والجنوط معا كمان رايك ايه بما انك غيرت الجنوط وايه الفرق فالثبات بين الاثنين علما اني شايف ان العربية خفيفة الي حد ما لعلوها
ومعلش علي سؤالي الي مش فمكانه ..
.. مودتي ..

يا باشا ولا يهمك تسأل في اي وقت والموضوع موضوعك

شوف انا كان مقاس الكاوتش عندي 185/60/15 وكنت برضوا بقلق فوق ال 100 والعربية بتلعب وبتعرض مني وكتير اوي عامت مني وربك اللى كان بيسترها

بعد كدة جنطت ركبت مقاس 195/50/16 يعني زودت العرض حجات بسيطة وكبرت حجم الجنط

وبصراحة فرقت معايا في حبة حلوية يعني احساس ال 130 دلوقتي زي احساس ال 100 قبل ماجنطت لدرجة اني النهارده كنت ماشي على 110 وقمت بالغلط مسقط تاني فاكر اني ماشي 80

والحمد لله اني لحقت نفسي في سعتها ورحت جايب التالت والا كان زماني طيرت وش السلندر

بالنسبة لسؤالك طالما انت كدة كدة هتعرض وهتغير الكاوتش يبقى غير الكاوتش وكبر حجم الجنط نمرة بالمرة

يعني انت المقاس عندك 14 حط 15 ولو ان الكورلا تشيل 16 كمان مرتاح وممكن 17 بس بلاش عشان البلالين والعفشة ماتنشفش

العرض هو الاهم طبعا لان انت لما بتعرض مساحة الكاوتش الدركسيون بيتقل في ايدك وده بيديلك تحكم اكتر واحساس احسن بالثبات والهاندلنج

لكن انا انصحك انك طالما كدة كدة هتغير الكاوتش يبقى عرض وزود حجم الجنط حطلها جنط 16 وهتدعيلي

وطالما هتجيب مقاس مناسب مع مقاس الكاوتش الاصلي عندك يبقى مش هيحصل عندك اي اختلاف في اي حاجة ان شاء الله

وطبعا سواء الياريس او الكرولا ارتفاعها عن الارض هو اللى عامل مشاكل لكن الجنط هيفرق معاك في حبة حلوين + انك طبعا لو هبطت العربية وغيرت السوست هتلاقي كلام تاني خااااااااالص ! !

المشاركة الأصلية كتبت بواسطة ahmed1006

شكرا علي ردك Ahmod ربنا يستر طريقك
مع اني حاسس ان 16 كتير حبتين وممكن لا يتناسب مع العفشة مش متأكد اوي بصراحة والحد بيتمني انها تبقي علي 130 او 140 ثايتة مش اكتر من كده لاني لما بتعدي حاجة اكبر مني واسرع مني من جمبي بلاقي العربية اتزقت شوية بدون مقدمات ولا حتي الدركسيون بيتحرك بس بتتزق حبه من ضغط الهواء وهي خفيفة
مودتي

العفو يا باشا على ايه

وال 16 لا كبير ولا حاجة اعتقد شاسيه الياريس والكرولا قريبين جدا من بعض حتى تحس ان شكلهم قريب من بعض

وانا مش حاسس بمشاكل في العفشة والحمد لله

عموما ان شاء الله الجنط هيظبط الكلام معاك انت مقاس الكاوتش الاصلي عندك كام ؟ ؟

احمد انا عايز اشوف صور لعربيتك كلها و عايز اعرف عملت الاستيكر دة عملتة فين و بيتكلف كام

اتفضل يا باشا ده موضوع فيه صور العربية بالكامل يارب تعجبك
http://www.nilemotors.net/Nile/259627-stripes.html

شوف الموضوع كله مش مكلف لكن الاستيكر اللى على البابين ده كان اكتر حاجة مكلفة لانه معمول عمولة

يعني انا شفت الاستيكر على عربية في النت واديت الراجل صورة العربية وقلتله عايز الاستيكر ده فعمله مخصوص على مقاس العربية عندي باللون اللى انا طالبه

فكلفني 250 جنيه

هو ممكن يكون الراجل ده غالي شوية بس بيطلع الشغل نضيف عشان كدة بتعامل معاه

عملته عند محل في شارع المطبعة (شارع يربط فيصل والهرم) اسمه اوسكار هتلاقيه جمب ادريان يكاد يكون على بداية ناصية شارع الهرم